A e kemi tani të hapur derën për të shërbyer si pionierë?
1 Shkrimi i vitit 1999, na kujton se jemi ende brenda «ditës së shpëtimit» të Jehovait. (2. Kor. 6:2) Por shpejt dita e tij e shpëtimit do të mbarojë. Atëherë do të fillojë «dita e gjykimit». (2. Pjet. 2:9) Ndërsa Jehovai vazhdon t’i ofrojë mundësi shpëtimi njerëzimit, sa rrëqethëse është të shohim si përgjigje një rritje të paparë ndonjëherë në numrin e personave!
2 Dëshmitarët e Jehovait e kanë përballuar sfidën e arritjes së personave të ndjeshëm ndaj mesazhit përpara se të jetë tepër vonë. Për shumë lajmëtarë të Mbretërisë kjo ka nënkuptuar fillimin e shërbimit si pionier. A e kemi tani të hapur derën për të shërbyer si pionierë? Përse pyesim?
3 Tregohet çmueshmëri: Siç u njoftua në Shërbimi ynë i Mbretërisë, janar 1999, kuota e orëve për pionierët e rregullt dhe ndihmës u reduktua. Për të plotësuar kuotën e re, pionierët e rregullt duhet të kushtojnë 70 orë në shërbim çdo muaj, për të arritur totalin prej 840 orësh të vitit të shërbimit. Pionierët ndihmës do të harxhojnë 50 orë në shërbim çdo muaj. Më poshtë jepen disa prej shprehjeve të shumta të çmueshmërisë, që u morën për shkak të këtyre rregullimeve:
«Çfarë dhurate e bekuar nga Ati ynë qiellor!»
«Nuk ka fjalë për të shprehur emocionet e gëzimit, dashurisë dhe të mirënjohjes për këtë masë të marrë!»
«Kjo gjë do t’i bëjë programet tona shumë më të lehta për t’u plotësuar!»
«Ne lutemi që sa më shumë lajmëtarë të fillojnë tani shërbimin e plotkohor dhe të gëzojnë bekimet që vijnë kur i shërben Jehovait pa u kursyer.»
4 Ndërsa i afrohemi kulmit të ditës së shpëtimit të Perëndisë, duket qartë se Jehovai dëshiron që populli i tij të lëshojë një britmë të fundit e të fuqishme lëvdimi. Shtrirja dhe intensiteti i këtij mesazhi është shtuar nga (1) rritja e vazhdueshme e numrit të lajmëtarëve të Mbretërisë dhe (2) nga përpjekjet e secilit lajmëtar për të bërë edhe më shumë brenda mundësive të tij në veprën e predikimit të Mbretërisë. Jehovai, ai «që bën të rritet», ka bërë që të dyja këto mënyra të kenë sukses, duke bekuar frymën e gatshme të të gjithë atyre që kanë pranuar shpëtimin.—1. Kor. 3:6, 7; Psal. 110:3.
5 Të mos e humbim qëllimin e saj: Pavli e kishte fjalën për ditën e shpëtimit të Jehovait kur i këshilloi të krishterët e tjerë: «Duke punuar bashkë me të [Jehovain], ju këshillojmë, gjithashtu, që të mos pranojmë dashamirësinë e pamerituar të Perëndisë duke humbur qëllimin e saj.» Ne nuk do ta «humbim qëllimin e saj», nëse e shohim këtë periudhë si «kohë veçanërisht të pranueshme» për të punuar për shpëtimin e të tjerëve në çdo rast. (2. Kor. 6:1, 2, BR) Sot, fjalët e Pavlit marrin një urgjencë edhe më të madhe. Të krishterët që shfaqin një dashuri të përzemërt për Jehovain, e konsiderojnë një privilegj të marrin pjesë në masën më të plotë që është e mundur në shërbimin që ai u ka caktuar. A mundemi tani të marrim pjesë në një masë më të plotë në këtë vepër, duke shërbyer si pionierë të rregullt?
6 Është një synim i arsyeshëm: Synimi ynë në Shqipëri është që deri më 1 shtator të këtij viti, të shohim të regjistrohen si pionierë të rregullt 350 lajmëtarë. Besojmë se ky është një synim i arsyeshëm dhe i arritshëm. Përse jemi kaq të sigurt? Në prill të vitit 1998 vumë re se 275 vëllezër e motra shërbyen si pionierë ndihmës. Shumica raportoi 60 orë, vetëm 10 orë më pak se kuota e re e pionierëve të rregullt. Edhe nëse vetëm 70 prej atyre që kanë shërbyer si pionierë ndihmës regjistrohen si pionierë të rregullt përpara mbarimit të këtij viti shërbimi, mund ta fillojmë shtatorin me 350 ose më shumë pionierë që shërbejnë në kohë të plotë!
7 Nevojitet një program: A duket akoma disi jashtë mundësisë sonë sasia e 70 orëve në muaj? Ndoshta do të jetë një ndihmë për ne, po ta shohim këtë mundësi nga këndvështrimi i 17 orëve në javë. Duke përdorur programet model në faqen tjetër, të përpiqemi të krijojmë një program për shërbimin si pionier i rregullt, që do t’i përshtatej rrethanave tona personale. Në përpilimin e tij të flasim me pionierë me përvojë për të mësuar prej tyre se në ç’mënyrë e ekuilibrojnë shërbimin si pionier me përgjegjësitë personale dhe familjare. Të pyesim mbikëqyrësin e qarkut tonë se si e programojnë pionierët në qark aktvitetin e tyre të shërbimit çdo javë. Pastaj t’i drejtohemi Jehovait për të pasur bekimin e tij mbi planet tona për t’u bërë pionierë.—Prov. 16:3.
8 Ta bëjmë një projekt familjar: A kemi menduar ta bëjmë një projekt familjar shërbimin si pionier? Mund të ulemi si familje dhe të diskutojmë lidhur me të. Me një planifikim të kujdesshëm dhe bashkëpunim të mirë, një ose dy anëtarë të familjes mund të arrijnë të shërbejnë si pionierë. Kuptohet, pas një vlerësimi të ndershëm të rrethanave, disa prej nesh do të shohin se nuk mund të shërbejnë menjëherë si pionierë të rregullt. Nëse është kështu, ta vëmë këtë lloj shërbimi si një synim për të ardhmen. Megjithatë, le të fillojmë të bëjmë plane për të pasur një datë të përcaktuar që të nisim shërbimin si pionierë. Ndoshta mund të shërbejmë si pionierë ndihmës disa herë gjatë vitit, që të arrijmë gradualisht synimin për t’u bërë pionierë të rregullt.
9 Më shumë se 280 pionierë po shërbejnë aktualisht në Shqipëri në situata të ndryshme. Jo të gjithë gëzojnë shëndet të mirë. Shumë prej tyre kanë përgjegjësi serioze familjare. Disa të tjerë nuk janë më të rinj dhe duhet të përballojnë kufizimin e moshës së tyre. Në shumë raste vëllezërit kanë edhe përgjegjësi në kongregacion. Të gjithë këta po «blejnë kohën e volitshme» për të shërbyer si pionierë, gjë që në shumë raste ka nënkuptuar bërjen e një jete më të thjeshtë, por megjithatë, më të kënaqshme.—Kolos. 4:5, BR.
10 A duhet ta thjeshtojmë jetën? Thjeshtimi i jetës mund të jetë për ne çelësi që hap derën drejt shërbimit si pionier. A është jeta jonë ngjashëm një shtëpie të madhe me dhoma dhe orendi të panevojshme, që kërkon shumë kohë, para dhe punë për t’u mbajtur? Nëse po, përshtatja me rrethana më modeste mund të na lejojë që të shërbejmë si pionierë. A mund ta reduktojmë sasinë e kohës që kalojmë në punë? A mund të marrim kohë nga aktivitetet jo dhe aq të rëndësishme, apo të tregojmë më shumë ekuilibër lidhur me sasinë e kohës që harxhojmë për t’u shlodhur?
11 Në 1. Timoteut 6:8, Bibla na këshillon: «Kur kemi çfarë të hamë e të veshim, të jemi të kënaqur me kaq.» Të jemi të kënaqur me pak është një faktor i rëndësishëm nëse duam të bëjmë çmos në shërbim të Jehovait dhe e bën më të lehtë që t’u japim përparësi interesave frymore. (Mat. 6:22, 33) Në faqen 104 të Libri vjetor 1998 (anglisht), në raportin mbi Japoninë ofrohen sugjerime të ndryshme lidhur me arsyen se përse në këtë vend ka një frymë kaq të shkëlqyer pionieri. Le të shqyrtojmë një prej tyre: «Në përgjithësi është e vërtetë se shtëpitë japoneze janë shumë modeste, kështu që nuk duhet shumë kohë për t’i mirëmbajtur dhe pjesa më e madhe, bëjnë si traditë, një jetë të thjeshtë.» A nuk është ky thelbi i 1. Timoteut 6:8?
12 Përreth globit, përpara se t’i vijë fundi ditës së shpëtimit të Jehovait, shërbëtorët e Perëndisë po predikojnë lajmin e mirë me një intensitet rritjeje të paparë ndonjëherë. Në mënyrë të lavdërueshme, vitin e kaluar morën pjesë çdo muaj, në disa forma të shërbimit si pionier, mesatarisht rreth 700.000 lajmëtarë. A mund të bëjmë disa rregullime në jetë që t’u bashkohemi atyre? Jemi të ftuar të shqyrtojmë me kujdes dhe në lutje rrethanat tona, në përgjigje të pyetjes: «A e kemi tani të hapur derën për të shërbyer si pionierë?»
[Diçitura në faqen 3]
SYNIMI: 350 PIONIERË TË RREGULLT!
[Kutia në faqen 4]
Programe model për pionierë të rregullt
Kërkohen: 17 orë në javë
Një ditë jave dhe fundjava
Dita Orë
E premte 8
E shtunë 6
E dielë 3
Shuma e orëve: 17
Dy ditë jave dhe e shtuna
Dita Orë
E martë 7
E enjte 7
E shtunë 3
Shuma e orëve: 17
Tre ditë jave dhe e diela
Dita Orë
E hënë 5
E mërkurë 5
E premte 5
E dielë 2
Shuma e orëve: 17
Dy mbrëmje dhe fundjava
Dita Orë
E hënë 3
E mërkurë 3
E shtunë 8
E dielë 3
Shuma e orëve: 17
Krijo programin tënd si pionier i rregullt
Dita Orë
E hënë
E martë
E mërkurë
E enjte
E premte
E shtunë
E dielë
Shuma e orëve: 17