Të përgatitemi për të studiuar profecitë e Isaisë!
1 «Adhuruesit besnikë mund të jenë të sigurt se Jehovai, . . . nuk do ta lërë botën e Satanait të ekzistojë as për një ditë më shumë sesa e kërkon drejtësia.» Çfarë thënieje inkurajuese! Nga është marrë ky citim? Është marrë nga libri Profecitë e Isaisë: Dritë për gjithë njerëzimin I. A na japin profecitë e Isaisë arsye për të nxjerrë një përfundim që na e ngroh kaq shumë zemrën? Po! Në këtë libër të Biblës, tema e shpëtimit theksohet fort e në mënyrë të qartë. (Isa. 25:9) Për këtë arsye, studimi i kësaj pjese të Fjalës së Perëndisë në Studimin e Librit të kongregacionit do të jetë një nxitje e madhe për ne. A do të jemi atje çdo javë për ta shijuar atë? Përse duhet të jemi?
2 Në Isainë 30:20 (BR), Jehovai quhet ‘Mësuesi ynë i Madh’. Çdo i krishterë duhet të dëgjojë me kujdes ndërsa Jehovai na flet me anë të faqeve të Fjalës së tij dhe me anë të botimeve të bazuara në Bibël, të cilat janë siguruar nga ‘skllavi i besueshëm dhe i matur’. (Mat. 24:45; Isa. 48:17, 18) Kjo është pa dyshim e vërtetë për librin Profecitë e Isaisë I. Si mund të përfitoni në masën më të plotë duke e studiuar atë?
3 Përgatituni për të marrë pjesë: Lini mjaft kohë mënjanë çdo javë për t’u përgatitur për studimin e librit. Lexoni materialin e caktuar paragraf pas paragrafi. Mendoni rreth çdo pyetjeje të shtypur. Nënvizoni përgjigjet në librin tuaj. Vargjet e cituara nga Isaia janë të shtypura me shkronja më të theksuara. Lexojini ato me kujdes. Për sa u takon shkrimeve të tjera që janë dhënë si referime, kërkojini për të parë se si lidhen me materialin. Meditoni rreth asaj që po mësoni. Më pas ndani me grupin e studimit të librit frytet e përgatitjes suaj.
4 Vëllai që drejton studimin e librit duhet t’i ndihmojë të gjithë të pranishmit që ta përdorin mirë Biblën dhe të çmojnë vlerën praktike të materialit që po trajtohet. Nëse ftoheni për të bërë komentin e parë, jepni një përgjigje të thjeshtë e të drejtpërdrejtë. Nëse dikush tjetër tashmë e ka bërë këtë, ju mund ta zgjeroni atë pikë që po diskutohet. Ndoshta mund të tregoni se si një shkrim kyç e mbështet atë argument. Përpiquni të komentoni me fjalët tuaja dhe shijoni kënaqësinë e pjesëmarrjes në diskutim.
5 Le të shqyrtojmë së bashku me etje mesazhin e çmuar të librit të Isaisë. Ai do të na nxitë të jetojmë çdo ditë duke pritur me gëzim shpëtimin e Jehovait.—Isa. 30:18.