Kutia e pyetjes

◼ Çfarë informacioni duhet paraqitur në mbledhjet për shërbim?

Qëllimi i një mbledhjeje për shërbim është të na ndihmojë të përqendrohemi në veprimtarinë pasuese​—shërbimin. Prandaj, drejtuesi duhet të jetë i përgatitur mirë dhe gati të japë diçka nxitëse, specifike dhe praktike. Nëse shkrimi i ditës lidhet drejtpërdrejt me veprën e predikimit, ai mund të lexohet dhe të diskutohet shkurtimisht. Megjithatë, mbledhja duhet përqendruar kryesisht te vepra që do të bëhet, për t’i ndihmuar të gjithë ata që do të japin dëshmi të jenë të përgatitur më mirë për ta kryer shërbimin atë ditë.​—2 Tim. 4:5.

Mund të diskutohen pika praktike nga Shërbimi ynë i Mbretërisë për t’i njohur të gjithë me literaturën që do të ofrohet atë muaj dhe me mënyrën se si ajo mund të prezantohet. Në ditën e revistave mund të demonstrohet një prezantim nga pjesa «Çfarë të themi rreth revistave?». Mund të diskutohet ose të demonstrohet një aspekt i shërbimit, p.sh.: si të përdoret Bibla në derë, si të trajtohet ndonjë kundërshtim i mundshëm, si të ofrohet një studim biblik ose si të ndiqet interesi i gjetur.

Mbledhjet për shërbim duhet të jenë jo më shumë se 10 deri 15 minuta, kohë që përfshin dhe organizimin e grupeve, caktimin e territorit dhe lutjen. Në përfundim të saj, çdo i pranishëm duhet të dijë se me kë dhe ku do të punojë e duhet të nisen pa humbur kohë për në territor. Duke mbajtur parasysh që kjo mbledhje është e shkurtër, është e rëndësishme që të gjithë të arrijnë në kohë. Kur mbledhja për shërbim bëhet pas ndonjërës nga mbledhjet e kongregacionit, p.sh., pas studimit të Kullës së Rojës, ajo duhet të jetë më e shkurtër. S’ka nevojë që të diskutohet shkrimi i ditës pasi tashmë në mbledhje është gëzuar një diskutim i shkëlqyer biblik.

Për të drejtuar çdo mbledhje për shërbim, duhen caktuar që më përpara vëllezër të pagëzuar të kualifikuar. Nëse ndonjë ditë të veçantë, nuk ka asnjë vëlla për të drejtuar këtë mbledhje, pleqtë duhet të caktojnë se cilat motra të pagëzuara mund ta bëjnë këtë kur paraqitet nevoja. Ndërkohë që qëndron ulur, motra mund të fillojë një diskutim në grup të shkrimit të ditës ose të pikave të tjera që kanë të bëjnë me shërbimin, duke bërë komente të shkurtra. Në këto raste ajo duhet ta ketë kokën të mbuluar.

Mbledhjet për shërbim janë mundësi të shkëlqyera për t’u nxitur dhe pajisur për shërbimin tonë. Sa më mirë të përgatitet drejtuesi, aq më tepër dobi do të nxjerrin të gjithë.