Të shpallim mesazhin e Mbretërisë
1 «Duhet t’ua shpall lajmin e mirë të mbretërisë së Perëndisë, . . . sepse për këtë u dërgova.» (Luka 4:43) Me këto fjalë Jezui tregoi qartë temën e shërbimit të tij, pra Mbretërinë e Perëndisë. Edhe mesazhi që shpallim ne sot përqendrohet te Mbretëria, ashtu si u paratha te Mateu 24:14: «Ky lajm i mirë i mbretërisë do të predikohet në gjithë tokën e banuar si dëshmi për të gjitha kombet; dhe atëherë do të vijë fundi.» Cilat të vërteta rreth Mbretërisë së Perëndisë kanë nevojë të dëgjojnë njerëzit?
2 Mbretëria e Perëndisë tani sundon në qiej dhe shumë shpejt do të zëvendësojë çdo sundim njerëzor. Djalli tashmë është dëbuar nga qielli dhe ky sistem i lig ka hyrë në ditët e tij të fundit. (Zbul. 12:10, 12) Sistemi i vjetër i lig i Satanait do të shkatërrohet plotësisht, por Mbretëria e Perëndisë nuk do të tundet nga vendi. Ajo do të mbetet përgjithmonë.—Dan. 2:44; Heb. 12:28.
3 Mbretëria do të plotësojë dëshirat e shëndetshme të të gjithë njerëzve të bindur. Do të sigurojë lehtësim nga vuajtjet e shkaktuara nga lufta, krimi, shtypja, dhe nga varfëria. (Ps. 46:8, 9; 72:12-14) Do të ketë ushqim me bollëk për të gjithë. (Ps. 72:16; Isa. 25:6) Sëmundjet dhe gjymtimet do të jenë veçse gjëra të së shkuarës. (Isa. 33:24; 35:5, 6) Ndërsa njerëzimi shkon drejt përsosmërisë, toka do të transformohet në një parajsë dhe njerëzit do të banojnë në harmoni me njëri-tjetrin.—Isa. 11:6-9.
4 Tregojmë se duam të jemi nënshtetas të Mbretërisë së Perëndisë nga mënyra si jetojmë tani. Mesazhi i Mbretërisë duhet të ndikojë në gjithë udhën e jetës sonë, përfshirë edhe qëllimet e përparësitë tona. Për shembull, ndonëse kemi detyrimin për t’u kujdesur për familjen tonë, nuk mund të lejojmë që shqetësimet për gjërat materiale t’u zënë frymën interesave të Mbretërisë. (Mat. 13:22; 1 Tim. 5:8) Por duhet t’i vëmë veshin këshillës së Jezuit: «Vazhdoni, pra, të kërkoni më parë mbretërinë dhe drejtësinë e tij dhe të gjitha këto gjëra të tjera [gjërat materiale të nevojshme për jetën] do t’ju shtohen.»—Mat. 6:33.
5 Sa ka ende kohë, është urgjente që njerëzit të dëgjojnë mesazhin e Mbretërisë dhe të ndikohen nga ai. Le t’i ndihmojmë ata të bëjnë kështu, duke «përdorur argumentime bindëse lidhur me mbretërinë e Perëndisë».—Vep 19:8.