T’i ndihmojmë të tjerët të nxjerrin dobi nga shpërblesa
Përkujtimi i vdekjes së Krishtit do të mbahet më 12 prill
1. Cila është një mënyrë me të cilën populli i Perëndisë shpreh vlerësimin për shpërblesën?
1 «Faleminderit Perëndisë për dhuratën e tij të papërshkrueshme falas!» (2 Kor. 9:15) Këto fjalë shprehin mjaft mirë atë që ndiejmë për mirësinë dhe dashamirësinë që tregon Perëndia ndaj popullit të tij me anë të Birit të tij, Jezu Krishtit. Një vlerësim i tillë do të duket qartë kur të mblidhemi së bashku më 12 prill për të mbajtur Përkujtimin e vdekjes së Krishtit.
2. Cilët vijnë në Përkujtim përveç shërbëtorëve të Jehovait dhe çfarë duhet të bëjnë që të nxjerrin dobi nga shpërblesa?
2 Bashkë me shërbëtorët e Jehovait, gati dhjetë milionë të tjerë janë të pranishëm çdo vit në Përkujtim. Në këtë mënyrë ata tregojnë në njëfarë mase vlerësimin e tyre për flijimin e Krishtit. Megjithatë, që të nxjerrin dobi nga shpërblesa, duhet të tregojnë besim tek ajo. (Gjoni 3:16, 36) Si mund t’i ndihmojmë të krijojnë një besim të tillë? Këtë vit, gjatë periudhës së Përkujtimit, duhet t’i inkurajojmë që të studiojnë Biblën dhe të ndjekin mbledhjet javore të kongregacionit. Më poshtë gjenden disa sugjerime për këtë.
3. Si mund të fillojmë një studim biblik, ndërsa bëjmë ftesat për Përkujtimin?
3 Studimet biblike: Kur ftoni të interesuarit për në Përkujtim, pse nuk provoni të filloni një studim biblik me ta me librin Çfarë mëson vërtet Bibla. Përpiquni t’i shpjegoni për Përkujtimin duke trajtuar temën: «Darka e Zotërisë, një përkujtim që nderon Perëndinë» në faqet 206-208. Mund ta trajtoni këtë informacion në një ose dy vizita, ndoshta edhe si studim biblik në derën e të zotit të shtëpisë. Pasi keni shqyrtuar këto faqe, studenti ndoshta dëshiron të shqyrtojë kapitullin 5 me titull «Shpërblesa—Dhurata më e madhe e Perëndisë». Sapo të vendoset një rutinë e rregullt studimi, filloni që nga kapitulli i parë.
4. Me kë mund të fillojmë një studim biblik gjatë periudhës së Përkujtimit?
4 Po me kë mund të fillojmë një studim biblik duke përdorur metodën e mësipërme? Ndoshta disa nga shokët e punës, të shkollës ose fqinjët do t’i mirëpritnin këto biseda. Vëllezërit mund ta përdorin këtë metodë me burrat jobesimtarë të motrave në kongregacion. Të mos harrojmë pastaj edhe të afërmit tanë që nuk janë Dëshmitarë. Për më tepër, duhet të bëjmë përpjekje të veçanta për të ftuar në Përkujtim edhe ata që më parë shoqëroheshin në mënyrë aktive me kongregacionin. (Luka 15:3-7) Le të përpiqemi t’i ndihmojmë që edhe këta të nxjerrin dobi nga shpërblesa.
5. Si mund t’i inkurajojmë studentët dhe të interesuarit që të ndjekin mbledhjet javore të kongregacionit?
5 Mbledhjet e kongregacionit: Përkujtimi mund të jetë mbledhja e parë që ndjekin shumë studentë biblikë dhe të interesuar. Si mund t’i ndihmojmë që të nxjerrin dobi edhe nga mbledhjet e tjera të kongregacionit? Shërbimi ynë i Mbretërisë prill 2005, në faqen 8 jepte sugjerimet e mëposhtme: «Thuaji temën e fjalimit publik për atë javë. Tregoji materialin që do të trajtohet gjatë Studimit të Kullës së Rojës dhe në Studimin e Librit të Kongregacionit. Përshkruaji Shkollën e Shërbimit Teokratik dhe Mbledhjen e Shërbimit. Kur ke një caktim në shkollë, ndoshta mund t’i bësh provat me të. Tregoji pika interesante që ke dëgjuar në mbledhje. Përdor figurat që janë në botimet tona për ta ndihmuar të krijojë një ide se si zhvillohen mbledhjet. Që herën e parë që drejton studimin me të, ftoje të vijë në një mbledhje.»
6. Trego dy mënyra me të cilat mund t’i ndihmojmë njerëzit me zemër të sinqertë të nxjerrin dobi nga shpërblesa.
6 Kur njerëzit me zemër të sinqertë bëjnë një studim të rregullt biblik dhe ndjekin rregullisht mbledhjet e kongregacionit, zakonisht përparojnë shumë shpejt nga ana frymore. Prandaj, le t’i inkurajojmë të tjerët të nxjerrin dobi nga këto masa frymore dhe nga dhurata më e madhe e Perëndisë, nga shpërblesa.