T’i ndihmojmë të tjerët që të bëhen miq të Perëndisë
1 Sot po u mësohen udhët e Jehovait njerëzve nga të gjitha kombet. (Isa. 2:2, 3) Por, që të «japin fryt me qëndrueshmëri», ata duhet të zhvillojnë dashuri për Jehovain. (Luka 8:15; Mar. 12:30) Pa këtë dashuri, nuk do të kenë forcën e duhur për t’iu kundërvënë ndikimeve të dëmshme ose nuk do të kenë guximin e duhur për të bërë atë që është e drejtë. Një mënyrë për t’i ndihmuar të tjerët që të krijojnë një marrëdhënie të mirë me Jehovain, është të zhvillojmë tek ata çmueshmërinë për cilësitë e tij. T’i nxitim që të shqyrtojnë me kujdes informacionin që gjendet në librin T’i afrohemi Jehovait.
2 Me shembullin tonë: Veprimet tona mund të ndikojnë fuqimisht në zemrën e studentëve të Biblës. Kur e shohin se ne e çmojmë shumë miqësinë tonë me Jehovain dhe kur shohin si ndikon kjo miqësi në jetën tonë, mund të nxiten që të zhvillojnë edhe vetë një marrëdhënie të tillë të ngushtë. (Luka 6:40) Po, shpeshherë, shembulli ynë ndikon te të tjerët më shumë sesa fjalët që themi.
3 Një mënyrë kryesore se si prindërit i mësojnë fëmijët ta duan Jehovain është me anë të shembullit të tyre. (Ligj. 6:4-9) Një çift që donte t’i rriste fëmijët në të vërtetën, kërkoi këshilla nga disa prindër të suksesshëm. «Të gjitha sugjerimet që na dhanë ata me të cilët fola, rrihnin në një pikë: te shembulli prindëror»,—tha burri. Kështu, me mënyrën se si jetojnë, prindërit mund t’u japin fëmijëve të tyre një shembull të gjallë se çfarë do të thotë të jesh «mik i Jehovait».—Jak. 2:23.
4 Me lutje nga zemra: Mund t’i ndihmojmë të tjerët që të zhvillojnë miqësinë me Jehovain edhe duke u mësuar që të luten nga zemra. Mund t’u tregojmë lutjen model të Jezuit, si edhe lutjet e shumta të zjarrta që janë dokumentuar në Shkrime. (Mat. 6:9, 10) Edhe duke dëgjuar lutjet tona, fëmijët tanë dhe studentët e Biblës mund të mësojnë se si të luten. Kur dëgjojnë shprehjet që na dalin nga zemra, ata kuptojnë ndjenjat që kemi për Jehovain. Duhet t’i nxitim që ‘të ngulmojnë në lutje’ kur hasin sprova. (Rom. 12:12) Ndërsa përjetojnë ndihmën e Jehovait në kohë nevoje, do të fillojnë t’i besojnë dhe ta duan si një mik të vërtetë.—Psal. 34:8; Filip. 4:6, 7.