«Mblidh popullin»
1. Ç’ngjashmëri ka mes kongreseve krahinore e ndërkombëtare dhe grumbullimit historik të izraelitëve pak pasi dolën nga Egjipti?
1 Pak kohë pasi dolën nga Egjipti, Jehovai urdhëroi Moisiun të ‘mblidhte popullin’ në malin Sinai që të dëgjonte fjalët e Tij, që t’i frikësohej Atij dhe t’u mësonte bijve udhët e Perëndisë. (Ligj. 4:10-13) Duhet të ketë qenë vërtet një rast i paharrueshëm dhe besimforcues! Në muajt vijues, populli i Jehovait do të mblidhet nëpër kongrese krahinore dhe ndërkombëtare që të mësohet nga Ai. Ç’duhet të bëjmë që të përfitojmë plotësisht nga ky rast?
2. Ç’duhet të bëjmë që të ‘jemi gati’ për kongresin?
2 ‘Jini gati’: Jehovai i urdhëroi izraelitët ‘të ishin gati’ për këtë grumbullim historik në malin Sinai. (Dal. 19:10, 11) Edhe sot, jo vetëm ata që do të mbajnë pjesët, por të gjithë ata që do të ndjekin kongreset, duhet të përgatiten mirë. Për shembull, shumë vetave do t’u duhet t’i rregullojnë gjërat që të jenë pushim nga puna në ato ditë. Ndoshta situata jote ngjan me atë të Nehemisë. Ai dëshironte të merrte leje nga detyra si kupëmbajtësi i mbretit Artakserks që të shkonte në Jerusalem dhe të ndihmonte për të rindërtuar muret e tij, por e dinte se mbreti mund të mos ishte dakord. Nehemia bëri një lutje dhe pastaj me guxim ia paraqiti me respekt të thellë kërkesën e tij. Mbreti i dha leje dhe madje mbështeti projektin e ndërtimit. (Neh. 2:1-9) Përveç lejes nga puna, a je organizuar për udhëtimin dhe a e ke konfirmuar strehimin? Me kënaqësi, pleqtë do të ndihmojnë të gjithë ata që do të kenë nevojë për mbështetje. Planifiko që të arrish herët në çdo sesion dhe ji gati ‘t’u kushtosh më shumë vëmendje se zakonisht’ gjërave që do të dëgjosh.—Hebr. 2:1.
3. Çfarë do të na ndihmojë të përgatitim zemrën për programin?
3 Të jemi gati për kongresin do të thotë edhe të përgatitim zemrën tonë që të dëgjojmë e të mësojmë. (Ezd. 7:10) Fleta e programit të kongresit do të postohet që më përpara në sitin jw.org/sq. Aty do të renditen titujt e të gjitha fjalimeve dhe një ose dy shkrime kyçe për çdo fjalim. Ky është një material i shkëlqyer për t’u trajtuar në Adhurimin Familjar gjatë javëve para kongresit ku jeni caktuar. Disa lajmëtarë e shtypin fletën e programit dhe e përdorin për të mbajtur shënime të shkurtra gjatë kongresit.
4. Si mund të përfitojnë prindërit nga kongreset për t’i mësuar fëmijët?
4 ‘Mësoji bijtë e tu’: Sipas Ligjit, një nga qëllimet e grumbullimit të popullit në malin Sinai ishte që prindërit izraelitë ‘t’i mësonin bijtë e tyre’. (Ligj. 4:10) Kongresi u jep prindërve sot një mundësi të mrekullueshme për të bërë njësoj. Prindërit duhet t’i ulin fëmijët pranë tyre gjatë sesioneve dhe t’i ndihmojnë të jenë të vëmendshëm. Në fund të çdo dite kongresi dhe në javët më vonë gjatë adhurimit familjar, familjet mund të bisedojnë së bashku rreth programit.
5. Si do të nxjerrim dobi nga pjesëmarrja në kongresin e ardhshëm?
5 Grumbullimi i rëndësishëm në malin Sinai i ndihmoi izraelitët të çmonin privilegjin e pashoq që kishin si populli i Perëndisë. (Ligj. 4:7, 8) Kongresi ynë i ardhshëm është bërë enkas që të na ndihmojë po njësoj. Për tri ditë do të dalim nga shkretëtira e egër e botës së Satanait dhe do të shijojmë programin freskues frymor e shoqërinë ndërtuese në parajsën tonë frymore. (Isa. 35:7-9) Le të mos braktisim këtë mundësi për të ndenjur së bashku e për të inkurajuar njëri-tjetrin, tani që dita e Jehovait po afron!—Hebr. 10:24, 25.