TË RINJTË PYESIN
A duhet ta zgjeroj rrethin e miqve?
«Ndihem rehat në rrethin tim shoqëror dhe e kam shumë të vështirë të zë shokë të rinj.»—Alani.
«Kam pak miq dhe më mjaftojnë. S’jam tip i futur dhe e kam të vështirë t’u flas atyre që s’i njoh.»—Sara.
A ndihesh edhe ti si Alani e Sara? A ke një rreth të ngushtë miqsh nga i cili e ke të vështirë të dalësh?
Nëse po, ky artikull është për ty.
Problemet me grupet shoqërore
S’ka asgjë të keqe të kesh një rreth të ngushtë shokësh. Kur je pjesë e një grupi, ndihesh rehat dhe i pranuar për atë që je, me të mirat e të këqijat.
«Ndihesh mirë kur pëlqehesh nga të tjerët dhe je pjesë e një grupi. Kur je i ri, thjesht do që të të pranojnë.»—Kerëni, 19 vjeçe.
A e dini? Jezui kishte shumë miq, përfshirë 12 apostujt, por të ngushtë kishte vetëm tre prej tyre: Pjetrin, Jakovin dhe Gjonin.—Marku 9:2; Luka 8:51.
Megjithatë, kur shoqërohesh vetëm me një grup të veçantë miqsh dhe mënjanon të tjerët, mund të kesh pasoja. Për shembull:
Mund t’u presësh rrugën miqësive të tjera fantastike.
«Kur ke vetëm miq që janë si ti, i mohon vetes eksperienca dhe njohje të reja e fantastike.»—Evani, 21 vjeç.
Mund të ngjash si snob.
«Kur rri vetëm me një grup miqsh, mund të lësh përshtypjen se nuk dëshiron të flasësh me asnjë tjetër.»—Sara, 17 vjeçe.
Mund të përfshihesh në bullizëm.
«Ti vetë mbase nuk do të keqtrajtoje asnjë, por nëse grupi yt i miqve e bën këtë, papritur të duket OK—madje edhe gallatë.»—Xhejmsi, 17 vjeç.
Mund të futesh në telashe, sidomos nëse do që të jesh me çdo kusht pjesë e atij grupi.
«Në një rreth të ngushtë shoqëror mjafton që njëri të jetë problematik dhe i gjithë grupi do të futet në telashe.»—Martina, 17 vjeçe.
Ja ç’mund të bësh
Analizo standardet e tua
Pyet veten: «Çfarë standardesh mundohem të kem? Miqtë ma bëjnë më të lehtë apo më të vështirë të jetoj sipas tyre? A do të paguaja çfarëdolloj çmimi për të mos e humbur këtë miqësi?»
Parimi biblik: «Shoqëritë e këqija prishin zakonet e dobishme.»—1 Korintasve 15:33.
«Nëse je në një rreth shoqëror që s’ka standardet e tua, mund të bësh gjëra që përndryshe s’do t’i kishe bërë kurrë.»—Elena, 14 vjeçe.
Shqyrto përparësitë
Pyet veten: «A jam i lidhur kaq shumë me miqtë, sa do të bëja kompromis me standardet e mia si e si të mos i humbja? Si do të veproja nëse një shok do të bënte diçka të gabuar?»
Parimi biblik: «Të gjithë ata që i kam për zemër, unë i qortoj.»—Zbulesa 3:19.
«Nëse dikush nga grupi futet në telashe dhe s’e ke të qartë se kujt t’i qëndrosh besnik, mund të të duket tradhti të tregosh.»—Melania, 22 vjeçe.
Bëj miq të rinj
Pyet veten: «A mund të nxjerr dobi nëse e zgjeroj rrethin tim shoqëror me disa që nuk i njoh edhe aq?»
Parimi biblik: ‘Shih me interes jo vetëm çështjet e tua, por edhe ato të të tjerëve.’—Filipianëve 2:4.
«Fëmijët që nuk kanë popullaritet, thjesht mund të kenë rrethana të vështira familjare. Ama kur i njeh, e kupton se janë fantastikë në mënyrën e tyre.»—Brajani, 19 vjeç.
Përfundimi: S’ka asgjë të keqe të kesh një grup miqsh të ngushtë. Por në të njëjtën kohë mund të nxjerrësh dobi nëse e zgjeron këtë grup. Bibla thotë: «Kush ujit me bollëk, edhe ai vetë do të ujitet me bollëk.»—Proverbat 11:25.