Marku 1:15—«Mbretëria e Perëndisë është afër»

«Koha e caktuar është përmbushur dhe Mbretëria e Perëndisë është afruar. Pendohuni dhe kini besim te lajmi i mirë.»—Marku 1:15, Përkthimi Bota e Re.

«U mbush koha dhe mbretëria e Perëndisë është afër. Pendohuni dhe besoni ungjillin.»—Marku 1:15, Diodati i Ri.

Kuptimi i Markut 1:15

Jezu Krishti u tha njerëzve se Mbretëria e Perëndisëa është «afër» ose «është afruar», sepse ai, si Mbret i ardhshëm i kësaj Mbretërie, ishte i pranishëm mes tyre.

Jezui nuk po thoshte se Mbretëria kishte filluar tashmë të qeveriste. Në fakt, më vonë u tregoi dishepujve se Mbretëria do të vinte në të ardhmen. (Veprat 1:6, 7) Gjithsesi, Jezui erdhi fiks në kohë, në vitin që Bibla kishte parathënë se do të shfaqej si Mbret i ardhshëm.b Ndaj ai mund të thoshte me plot gojën: «Koha e caktuar është përmbushur», sepse kishte ardhur koha që të fillonte veprën e predikimit të ungjillit, ose të lajmit të mirë, për Mbretërinë.—Luka 4:16-21, 43.

Që njerëzit të nxirrnin dobi nga lajmi i mirë për Mbretërinë, duhej të pendoheshin, pra të ndienin keqardhje për mëkatet e së kaluarës dhe të jetonin në harmoni me normat e Perëndisë. Ata që u penduan, treguan besim te lajmi i mirë për Mbretërinë që do të vinte.

Konteksti i Markut 1:15

Jezui i tha këto fjalë në Galile kur filloi veprën e predikimit. Siç përmendet edhe te tregimi paralel i Mateut 4:17, «që nga ajo kohë» Jezui nisi të predikonte për Mbretërinë e Perëndisë. Tema kryesore e shërbimit të tij ishte Mbretëria. Faktikisht, ajo përmendet më shumë se 100 herë në të 4 Ungjijtëc, në shumicën e rasteve nga Jezui. Në Bibël tregohet se Jezui foli për Mbretërinë e Perëndisë më shumë se për çdo gjë tjetër.