Çfarë është ‘shkak ngazëllimi’ për ty?

1. Çfarë shkaku për ngazëllim kemi në fund të çdo muaji?

¹ Kur afron fundi i muajit dhe të gjithë duhet të dorëzojnë raportin e shërbimit, çfarë është ‘shkak ngazëllimi’ për ty? (Gal. 6:4) Qoftë nëse jemi pionierë specialë që raportojmë 130 orë, qoftë nëse jemi lajmëtarë të miratuar për të raportuar 15 minuta, të gjithë duhet të gëzohemi që kemi arritur t’i shërbejmë Jehovait me gjithë zemër.​—Psal. 100:2.

2. Pse duhet të përpiqemi fort në shërbim të Jehovait?

² Si Zotëria Sovran i universit, Jehovai meriton t’i japim më të mirën. (Mal. 1:6) Nga dashuria për të, i kemi kushtuar jetën që të bëjmë vullnetin e tij. Prandaj, në fund të ditës ose në fund të muajit, nëse jemi të sigurt se kemi dhënë «frytet e para» të kohës, talenteve dhe fuqive tona në shërbim të Jehovait, atëherë kemi shkak për t’u ngazëlluar. (Prov. 3:9) Por, nëse ndërgjegjja na thotë se ka vend për përmirësim, atëherë është mirë të mendojmë si të përmirësojmë.​—Rom. 2:15.

3. Pse nuk është e mençur të krahasohemi me të tjerët?

³ ‘Jo të krahasohemi me një tjetër’: Nuk është e mençur të krahasohemi me të tjerët ose me kohën kur kishim më shumë energji. Rrethanat ndryshojnë. Po kështu edhe aftësitë. Krahasimi shpesh çon në konkurrencë ose ndjenja pavlefshmërie. (Gal. 5:26; 6:4) Jezui nuk bënte krahasime. Përkundrazi, jepte lavdërime në bazë të asaj që mund të bënte personi.​—Mar. 14:6-9.

4. Ç’mësime me vlerë nxjerrim nga ilustrimi i Jezuit për talentat?

⁴ Në ilustrimin që Jezui bëri për talentat, çdo punëtor mori talenta «sipas aftësive të veta». (Mat. 25:15) Kur zotëria u kthye dhe kërkoi t’i raportonin se çfarë kishin bërë, ata që kishin punuar me zell sipas aftësive dhe rrethanave, morën lavdërime dhe gëzuan me zotërinë e tyre. (Mat. 25:21, 23) Po kështu edhe ne, ndërsa jemi të angazhuar në veprën e predikimit për Mbretërinë, mund të jemi të sigurt se kemi miratimin hyjnor dhe shkak për ngazëllim.