Kishte një mur të madh e të lartë dhe dymbëdhjetë porta. Te portat kishte dymbëdhjetë engjëj, dhe në to ishin shkruar emrat e dymbëdhjetë fiseve të bijve të Izraelit.

Zbulesa 21:11b-

4. Nga duket se Jerusalemi i Ri nuk është kombi i Izraelit?

⁴ Në portat e tij ishin shkruar emrat e 12 fiseve të Izraelit. Prandaj, ky qytet simbolik përbëhet nga 144.000 njerëz që janë vulosur «nga çdo fis i bijve të Izraelit». (Zbulesa 7:4-8)

5. Ç’përfaqësojnë ‘muri i madh e i lartë’ i Jerusalemit të Ri dhe fakti që në çdo hyrje ishin vendosur engjëj?

⁵ Qyteti simbolik kishte një mur të madh. Në kohët e lashta, muret e qytetit ngriheshin për të qenë të sigurt e për t’u mbrojtur nga armiqtë. ‘Muri i madh e i lartë’ i Jerusalemit të Ri tregon se qyteti është i sigurt frymësisht. Asnjë armik i drejtësisë, asnjë person i papastër ose i pandershëm, nuk do të arrijë kurrë të hyjë atje. (Zbulesa 21:27) Kurse për ata që lejohen të hyjnë në këtë qytet të bukur, është njësoj sikur të hyjnë në parajsë. (Zbulesa 2:7) Pasi u nxor jashtë Adami, në hyrje të parajsës fillestare u vendosën kerubinët që të mos linin të futeshin njerëzit e papastër. (Zanafilla 3:24) Po ashtu, në çdo hyrje të qytetit të shenjtë të Jerusalemit ishin vendosur engjëj që të ruanin sigurinë frymore të qytetit. Vërtet, gjatë ditëve të fundit engjëjt e kanë ruajtur nga ndotja babilonike kongregacionin e të krishterëve të mirosur, që bëhet Jerusalemi i Ri.​—Mateu 13:41.