Përse të kemi frikë tani nga Perëndia i vërtetë?
«Ki frikë nga Perëndia i vërtetë dhe mbaj urdhërimet e tij. Ky është i gjithë detyrimi i njeriut.»—EKLISIASTIU 12:13, BR.
1, 2. Përse një frikë e drejtë është e përshtatshme?
NJERIU bën mirë të ketë një frikë të shëndetshme e plot nderim ndaj Perëndisë. Po, ne na bën mirë të kemi frikë nga Perëndia Jehova, edhe pse shumë lloje frikash janë shqetësuese nga ana emocionale dhe madje shkatërrimtare për mirëqenien tonë.—Psalmi 112:1; Eklisiastiu 8:12.
2 Krijuesi e di këtë. I nxitur nga dashuria për krijesat e veta, ai urdhëron që të gjithë të kenë frikë prej tij e ta adhurojnë. Lexojmë: «Pashë një engjëll tjetër që fluturonte përmes qiellit dhe kishte lajmin e mirë të përhershëm, që t’ua shpallte si sihariq atyre që banojnë mbi tokë dhe çdo kombi, fisi, gjuhe dhe populli, duke thënë me zë të lartë: ‘Kini frikë nga Perëndia dhe jepini lavdi, sepse ora e gjykimit prej tij erdhi, prandaj adhuroni Atë që bëri qiellin dhe tokën.’»—Zbulesa 14:6, 7, BR.
3. Çfarë bëri Krijuesi për prindërit tanë të parë?
3 Sigurisht që nuk duhet ta shpërfillim Krijuesin e të gjitha gjërave, Burimin e jetës, pasi ai është pronari ynë dhe i këtij planeti. (Psalmi 24:1) Duke shprehur dashurinë e tij të madhe, Jehovai u dha fëmijëve të tij tokësorë jetë dhe u siguroi një vend të mrekullueshëm për të jetuar, një parajsë të bukur. Megjithatë, kjo dhuratë e mrekullueshme nuk iu dha pa kushte. Në fakt, iu dha që ta kishte në kujdes. Prindërit tanë të parë duhej të kujdeseshin për shtëpinë e tyre e ta përhapnin derisa të kishin populluar e nënshtruar mbarë tokën. Ata kishin privilegje dhe përgjegjësi kundrejt kafshëve të tokës, zogjve dhe peshqve, kundrejt të gjitha krijesave të tjera, që do të jetonin në tokë bashkë me ta dhe pasardhësit e tyre. Për këtë gjë të madhe që ishte nën kujdesin e tij, njeriu do të jepte llogari.
4. Çfarë ka bërë njeriu me veprat e krijimit të Perëndisë?
4 Pavarësisht nga fillimet e mrekullueshme, shiko se ç’ka bërë njeriu për të ndotur shtëpinë e tij të bukur tokësore! Me një mungesë të paturpshme respekti për pronësinë e Perëndisë mbi këtë xhevahir, njerëzit e kanë fëlliqur tokën. Ndotja ka arritur deri në atë pikë, sa kërcënon ekzistencën e gjithnjë e më shumë lloje kafshësh, zogjsh e peshqish. Perëndia ynë i drejtë e i dashur s’ka për të lejuar që kjo të vazhdojë përgjithmonë. Plaçkitja e tokës kërkon që dikush të japë llogari, nga e cila shumë veta kanë përse të tremben. Nga ana tjetër, për ata që me respekt besojnë në Perëndinë, është ngushëlluese të dinë se ç’do të ndodhë. Jehovai do të kërkojë llogari dhe toka do të bëhet si më parë. Ky është me të vërtetë një sihariq për të gjithë banorët zemërdrejtë të tokës.
5, 6. Si do t’i përgjigjet Jehovai asaj që ka bërë njeriu me veprat e krijimit të Tij?
5 Nëpërmjet kujt do ta kryejë Perëndia gjykimin e tij? Nëpërmjet Jezu Krishtit, i cili tashmë ndodhet mbi fron, si Mbret i Mbretërisë qiellore të Perëndisë. Me anë të këtij Biri qiellor, Jehovai do t’i japë fund sistemit të tanishëm të pistë e rebel. (2. Selanikasve 1:6-9; Zbulesa 19:11) Në këtë mënyrë, ai do t’u sjellë lehtësim atyre që kanë frikë prej tij dhe njëkohësisht do të çlirojë e do të mbrojë shtëpinë tonë tokësore.
6 Si do të ndodhë kjo? Bibla flet për një mjerim të madh që po vjen, i cili do të arrijë kulmin në luftën e Harmagedonit. (Zbulesa 7:14; 16:16) Ky do të jetë gjykimi i Perëndisë kundër këtij sistemi të ndotur gjërash dhe kundër atyre që e ndotin. A do të mbesë gjallë ndonjë njeri? Po! Do të jenë ata që nuk kanë një frikë të sëmurë e të dobët nga Perëndia, por një frikë me respekt e plot nderim ndaj tij. Ata do të lirohen.—Proverbat 2:21, 22.
Një shfaqje mahnitëse e fuqisë
7. Përse ndërhyri Perëndia në mbështetje të Izraelit në ditët e Moisiut?
7 Ky veprim dramatik nga Perëndia Jehova mund të përfytyrohet nga një veprim i fuqishëm që ai kreu në mbështetje të adhuruesve të tij, gati 1.500 vjet para erës sonë. Fuqia e madhe ushtarake e Egjiptit kishte skllavëruar fuqinë punëtore të emigrantëve izraelitë dhe madje u përpoq të kryente një lloj gjenocidi, kur sundimtari i tij, Faraoni, urdhëroi vdekjen e të gjithë të sapolindurve meshkuj izraelitë. Që të triumfonte mbi Egjiptin, Perëndia duhej të sillte çlirimin e Izraelit nga ai sistem shtypës politik, po, lirinë nga një komb i ndotur me adhurimin e shumë perëndive.
8, 9. Si iu përgjigjën Moisiu dhe izraelitët ndërhyrjes së Perëndisë?
8 Të Dalët, kreu 15, tregon reagimin e Izraelit pas lirimit nga Egjipti. Shqyrtimi i këtij tregimi do të na ndihmojë për të kuptuar se si mund të lirohen të krishterët nga sistemi i tanishëm, që është frymësisht dhe fizikisht i fëlliqur. Le të shqyrtojmë kreun 15 të librit Të Dalët, duke u përqendruar mbi vargjet e zgjedhura, për të mësuar se përse duhet të zgjedhim frikën ndaj Jehovait, Perëndisë së vërtetë. Le të fillojmë me vargjet 1 dhe 2:
9 «Në atë kohë, Moisiu dhe bijtë e Izraelit vazhduan t’i këndonin këtë këngë Jehovait e të thoshin: ‘Më lini t’i këndoj Jehovait, sepse është lartësuar shumë. Kuaj dhe kalorës i flaku në det. Forca dhe fuqia ime është Jah, sepse shërben për shpëtimin tim.’»—BR.
10. Çfarë çoi në shkatërrimin e ushtrisë së Egjiptit nga ana e Perëndisë?
10 Anembanë globit, njerëzit e njohin tregimin se si e liroi Jehovai Izraelin nga Egjipti. Ai lëshoi plagë mbi atë fuqi botërore derisa më në fund Faraoni i la izraelitët të shkonin. Por më pas, ushtria e Faraonit rendi pas këtij populli të pambrojtur dhe u duk sikur e zuri në grackë në brigjet e Detit të Kuq. Edhe pse dukej sikur bijtë e Izraelit do ta humbnin shpejt lirinë e tyre të sapofituar, Jehovai kishte diçka tjetër në mendje. Në mënyrë të mrekullueshme, ai çeli një shteg përmes detit dhe e shpëtoi popullin e vet. Kur egjiptianët u turrën nga prapa, ai e mbylli Detin e Kuq mbi ta, duke mbytur Faraonin dhe forcat e tij ushtarake.—Të Dalët 14:1-31.
11. Cili ishte rezultati i veprimit të Perëndisë kundër Egjiptit?
11 Shkatërrimi i forcave ushtarake të Egjiptit e lartësoi Jehovain në sytë e adhuruesve të tij dhe emri i tij u bë gjerësisht i njohur. (Josiu 2:9, 10; 4:23, 24) Po, emri i tij u ngrit mbi perënditë e rreme e të pafuqishme të Egjiptit, të cilat nuk ishin në gjendje të shpëtonin adhuruesit e tyre. Besimi në hyjnitë e tyre, në njeriun e vdekshëm dhe në fuqinë ushtarake solli një zhgënjim të hidhur. (Psalmi 146:3) Nuk habitemi që izraelitët u nxitën për të kënduar lavdi, që pasqyronin një frikë të shëndetshme nga Perëndia i gjallë, i cili fuqimisht e shpëtoi popullin e tij!
12, 13. Çfarë mësimi duhet të nxjerrim nga fitorja e Perëndisë në Detin e Kuq?
12 Në mënyrë të ngjashme, ne duhet të pranojmë se asnjë perëndi e rreme e kohëve tona dhe asnjë superfuqi, edhe pse e pajisur me armë bërthamore, nuk mund të matet me Jehovain. Ai ka mundësi dhe do ta lirojë popullin e tij. «Ai vepron si të dojë me ushtrinë e qiellit dhe me banorët e dheut. Askush nuk mund t’ia ndalë dorën ose t’i thotë: ‘Çfarë po bën?’» (Danieli 4:35) Kur e kapim plotësisht kuptimin e këtyre fjalëve, edhe ne jemi të nxitur që me lumturi t’i këndojmë lavdi.
13 Kënga e fitores pranë Detit të Kuq vazhdon: «Jehovai është një burrë lufte. Jehova është emri i tij.» Ky Luftëtar i pathyeshëm, pra, nuk është ndonjë trillim anonim i imagjinatës së njeriut. Ai ka një emër! Është ‘Ai që shkakton të bëhet’, Krijuesi i Madh, Ai «emri i të cilit është Jehova, . . . Më i Larti mbi të gjithë tokën». (Të Dalët 3:14; 15:3-5, BR; Psalmi 83:18, BR) A nuk bashkohesh me mendimin se për ata egjiptianë të lashtë do të kishte qenë e mençur të kishin një ndjenjë frike të arsyeshme dhe me respekt ndaj të Plotfuqishmit, në vend se ta kundërshtonin atë?
14. Si u tregua vlera e frikës hyjnore në Detin e Kuq?
14 Si Projektues i tokës, Krijuesi i detit i ka nën kontroll të plotë masat e ujit. (Të Dalët 15:8) Duke vënë në përdorim edhe kontrollin që ka mbi erërat, ai kreu atë që ngjante e pamundur. Ai i ndau diku ujërat e thella dhe i bëri të ktheheshin mbrapsht, duke krijuar një korridor me faqe të ujëta, nëpër të cilin kaloi populli i tij. Përfytyro skenën: miliona masa ujë deti të grumbulluara lart në formën e mureve paralele, duke formuar një rrugë mbrojtëse shpëtimi për Izraelin. Po, ata që shfaqën një frikë të shëndetshme ndaj Perëndisë gjetën mbrojtje. Pastaj, Jehovai i lëshoi ujërat, duke lejuar që ato të derdheshin si një rrebesh i fuqishëm, duke përmbytur forcat e Faraonit dhe të gjitha pajisjet e tyre. Çfarë shfaqje e fuqisë hyjnore mbi perënditë e pavlefshme dhe mbi forcën ushtarake njerëzore! Sigurisht, Jehovai është ai prej të cilit duhet të kemi frikë, apo jo?—Të Dalët 14:21, 22, 28; 15:8.
Të shfaqim frikën tonë ndaj Perëndisë
15. Cila duhet të jetë përgjigjja jonë kundrejt veprave të fuqishme të Perëndisë?
15 Po të kishim shpëtuar shëndoshë e mirë bashkë me Moisiun, sigurisht edhe ne do të ndiheshim të nxitur të këndonim: «Cili midis perëndive është si ti, o Jehova? Kush është si ti, që e ke dëftuar veten të fuqishëm në shenjtëri? Ai, prej të cilit duhet pasur frikë me këngë lavdie, Ai që bën mrekulli.» (Të Dalët 15:11, BR) Ndjenja të tilla kanë ushtuar përgjatë shekujve që nga ajo kohë. Në librin e fundit të Biblës, apostulli Gjon përshkruan një grup me shërbëtorë besnikë të mirosur të Perëndisë: «Ata këndojnë këngën e Moisiut, skllavit të Perëndisë dhe këngën e Qengjit.» Ç’është kjo këngë e madhe? «Të mëdha e të mrekullueshme janë veprat e tua, Perëndi Jehova, i Plotfuqishmi. Të drejta e të vërteta janë rrugët e tua, Mbret i përjetësisë. Në të vërtetë, kush nuk do të ketë frikë prej teje, Jehova, e të lavdërojë emrin tënd, sepse vetëm ti je besnik?»—Zbulesa 15:2-4, BR.
16, 17. Cilin zhvillim të mrekullueshëm po shohim të ndodhë sot?
16 Edhe sot ka adhurues të liruar, të cilët nuk vlerësojnë vetëm veprën krijuese të duarve të Perëndisë, por edhe dekretet e tij. Njerëz nga të gjitha kombet janë liruar frymësisht dhe janë ndarë nga kjo botë e fëlliqur, sepse i pranojnë dhe i vënë në praktikë dekretet e drejta të Perëndisë. Çdo vit, qindra e mijëra persona ikin prej kësaj bote të korruptuar, për të banuar në organizatën e pastër dhe të drejtë të adhuruesve të Jehovait. Së shpejti, pasi të jetë ekzekutuar gjykimi i zjarrtë i Perëndisë mbi fenë e rreme dhe mbi pjesën tjetër të këtij sistemi të lig, ata do të jetojnë përgjithmonë në një botë të re të drejtë.
17 Në përputhje me Zbulesën 14:6, 7, sot njerëzimi po dëgjon një mesazh paralajmërues gjykimi, i cili shpallet prej Dëshmitarëve të Jehovait nën drejtimin engjëllor. Vitin e shkuar, në më shumë se 230 vende, rreth pesë milion Dëshmitarë shpallën lajmin e mirë të Mbretërisë së Perëndisë dhe orën e tij të gjykimit. Për të mësuar njerëzit e tjerë se si të mbijetojnë, Dëshmitarët bëjnë vizita të rregullta nëpër shtëpitë e njerëzve, duke drejtuar studime biblike pa pagesë. Çdo vit, qindra e mijëra njerëz mësojnë në këtë mënyrë aq sa t’i frikësohen me vetëdije Perëndisë së vërtetë, i dedikojnë atij jetën e tyre dhe pagëzohen. Sa kënaqësi është që këta persona kanë filluar të druajnë Perëndinë e vërtetë!—Luka 1:49-51; Veprat 9:31; krahaso Hebrenjve 11:7.
18. Si ilustrohet se engjëjt janë të përfshirë në predikimin tonë?
18 A është e vërtetë që engjëjt janë të përfshirë në këtë vepër predikimi? E pra, është sigurisht e qartë se drejtimi engjëllor i ka çuar shpesh Dëshmitarët e Jehovait në ndonjë shtëpi ku shpirtra të dëshpëruar mezi prisnin, madje luteshin për të pasur ndihmë frymore! Për shembull, dy Dëshmitare të Jehovait të shoqëruara nga një djalë i vogël po flisnin për lajmin e mirë në një ishull të Karaibeve. Ndërsa mbrëmja po afrohej, dy të rriturat vendosën t’i jepnin fund për atë ditë. Por ndryshe nga zakonisht, djali këmbëngulte të vizitonin edhe shtëpinë tjetër. Kur e pa që të rriturat s’kishin qejf ta bënin këtë në atë moment, ai shkoi vetë dhe trokiti. Derën e hapi një grua e re. Kur panë këtë, dy të rriturat u afruan dhe folën me të. Ajo i ftoi brenda dhe shpjegoi se tamam në çastin që dëgjoi trokitjen në derë, ajo po lutej që Perëndia t’i dërgonte Dëshmitarët për të mësuar Biblën me të. Kështu u morën masat për një studim biblik.
19. Çfarë duhet të theksojmë si një përfitim prej frikës që tregojmë ndaj Perëndisë?
19 Ndërsa përhapim me besnikëri mesazhin e gjykimit të Perëndisë, ne mësojmë edhe dekretet e tij të drejta. Kur këto zbatohen në jetën e njerëzve, si rezultat vijnë bekime fizike dhe frymore. Për shembull, Bibla është shumë e qartë në dënimin që i bën çdo lloj imoraliteti seksual. (Romakëve 1:26, 27, 32) Sot, normat hyjnore në përgjithësi nuk përfillen në botë. Cili është rezultati? Martesat përfundojnë me ndarje apo divorce. Kriminaliteti është në rritje. Sëmundjet sakatuese të transmetuara seksualisht, të cilat janë bërë pandemike në këtë shekull të 20-të, janë përhapur. Në të vërtetë, sëmundja e frikshme SIDA në një masë të madhe përhapet nga imoraliteti seksual. Por, a s’ka dalë frika me respekt ndaj Perëndisë një mbrojtje për adhuruesit e vërtetë?—2. Korintasve 7:1; Filipianëve 2:12; shiko edhe Veprat 15:28, 29.
Rezultatet e frikës ndaj Perëndisë tani
20. Si ilustrohet se të tjerët e njohin reputacionin e Dëshmitarëve të Jehovait?
20 Bekimet janë të bollshme për ata që i frikësohen Perëndisë dhe ndjekin dekretet e tij. Le të shqyrtojmë një ngjarje që ilustron njohjen gjithnjë në rritje të faktit se Dëshmitarët e Jehovait formojnë një vëllazëri paqësore me të krishterë të drejtë e me moral. Disa Dëshmitarë, delegatë në një kongres ndërkombëtar në Amerikën e Jugut, qëndronin në një hotel që u përdor një natë edhe nga disa jo Dëshmitarë për një mbledhje të kryesuar nga presidenti i atij kombi. Ndërsa një skuadër sigurimi po çonte me të shpejtë presidentin në ashensor, një Dëshmitare që nuk e dinte se kush ishte në ashensor hyri brenda, duke i zënë krejt në befasi njerëzit e sigurimit! Duke e kuptuar se ç’kishte bërë, Dëshmitarja kërkoi të falur për ndërhyrjen. U tregoi distinktivin e kongresit, që e identifikonte si një Dëshmitare dhe u tha se ajo nuk përbënte ndonjë rrezik për presidentin. Duke buzëqeshur, një prej rojeve tha: «Sikur të gjithë njerëzit të ishin si Dëshmitarët e Jehovait, s’do të kishim nevojë për këtë lloj sigurie.»—Isaia 2:2-4.
21. Cilat rrugë veprimi janë të hapura për njerëzit sot?
21 Këta lloj njerëzish Jehovai po i mbledh tani dhe po i përgatit për të ‘dalë nga mjerimi i madh’ që do t’i japë fund këtij sistemi. (Zbulesa 7:9, 10, 14, BR) Kjo mbijetesë s’ka për të qenë diçka e rastësishme. Për të mbijetuar, një person duhet të ketë frikë nga Jehovai, ta pranojë atë si Sovranin e drejtë e t’i dedikohet atij. Megjithatë, është fakt se shumica nuk do të kultivojë atë lloj frike e cila meriton mbrojtje. (Psalmi 2:1-6) Sipas të gjitha dëshmive të mundshme, Sundimtari i zgjedhur nga Jehovai, Jezu Krishti, ka filluar të sundojë si Mbret qysh prej vitit kritik 1914. Kjo do të thotë se s’ka edhe shumë kohë për individët që të zhvillojnë e të shfaqin një frikë të shëndetshme ndaj Jehovait. Megjithatë, Krijuesi ynë po lejon që individët, madje edhe ata me një pozitë të fuqishme, të përgjigjen: «Tani, pra, o mbretër, tregohuni të urtë; pranoni ndreqjen, o gjyqtarë të dheut. Shërbeni me frikë Zotin dhe gëzohuni me drithma. Nënshtrohuni Birit, që të mos zemërohet dhe të mos vdisni rrugës, sepse zemërimi i tij mund të ndizet në një çast. Lum ata që gjejnë strehë tek ai.»—Psalmi 2:7-12.
22. Ç’përmban e ardhmja për ata që i frikësohen Perëndisë tani?
22 Le të jemi midis atyre që do ta lavdërojnë Krijuesin tonë, si Ai që na liron! Megjithatë, kjo kërkon prej nesh që të kemi frikë nga Perëndia i vërtetë tani! (Krahaso Psalmin 2:11; Hebrenjve 12:28; 1. Pjetrit 1:17.) Ne duhet të vazhdojmë të mësojmë dekretet e tij të drejta e t’i bindemi atij. Kënga e Moisiut dhe e Qengjit, që gjendet në Zbulesën 15:3, 4, do të ngrihet me një crescendo kur Jehovai të çrrënjosë të gjithë ligësinë nga toka e të fillojë të shërojë njerëzit dhe shtëpinë e tyre tokësore nga pasojat ndotëse të mëkatit. Atëherë, me gjithë zemër, ne do të këndojmë: «Të mëdha e të mrekullueshme janë veprat e tua, Perëndi Jehova, i Plotfuqishmi. Të drejta e të vërteta janë rrugët e tua, Mbret i përjetësisë. Në të vërtetë, kush nuk do të ketë frikë prej teje, Jehova, e të lavdërojë emrin tënd?»
A të kujtohet?
◻ Përse Jehovai e meriton që të kemi një frikë të shëndetshme ndaj tij?
◻ Çfarë u bë e dukshme nga bëmat e Perëndisë pranë Detit të Kuq?
◻ Cilat dobi vijnë nga frika me respekt që tregojmë ndaj Perëndisë?
◻ Cila e ardhme i pret ata që i frikësohen tani Perëndisë së vërtetë?