Një vegël e re për të ndihmuar njerëzit që të mësojnë kërkesat e Perëndisë
«PREZANTIMI i saj i thjeshtë, i drejtpërdrejtë dhe me mirësjellje do të sjellë rezultate përtej parashikimeve. Temat paraqiten në mënyrë kaq të thjeshtë dhe të këndshme, sa çdo person që kërkon me sinqeritet, do të nxitet për të thënë: ‘Perëndia është me të vërtetë midis jush.’» (1. Korintasve 14:25) Me këto fjalë e përshkroi një Dëshmitar i Jehovait nga Tailanda, broshurën e re Çfarë kërkon Perëndia prej nesh? Ajo u nxor nga Shoqata Watch Tower, në kongresin krahinor «Lajmëtarë të paqes hyjnore», gjatë vitit 1996-97.
Kjo broshurë 32-faqëshe plot me ngjyra është bërë si një kurs për studimin e Biblës. Në të trajtohen mësimet bazë biblike. Mënyra e të shprehurit në të është e thjeshtë, e përmbledhur dhe shpjegon qartë atë që Perëndia kërkon prej nesh. Lexuesit nuk duhet të kenë vështirësi për ta kuptuar. Si mund të drejtosh një studim biblik me këtë broshurë të re?
Përdor pyetjet. Në fillim të çdo mësimi gjenden pyetjet. Pas çdo pyetjeje, do të gjesh në kllapa numrat e paragrafëve, në të cilët gjenden përgjigjet. Këto pyetje mund të përdoren si një ndihmë si për parathënien, ashtu edhe për rishikimin e mësimit. Për shembull, në fillim të një studimi biblik në shtëpi, mund t’i drejtosh studentit pyetjet për të nxjerrë komentet e tij. Ne vend se të korrigjosh menjëherë çdo përgjigje të gabuar, mund të vazhdosh studimin. Në fund të mësimit mund të kthehesh tek pyetjet, për të parë nëse studenti është në gjendje tani t’u përgjigjet atyre në harmoni me Biblën.
Gjej shkrimet. Në çdo mësim, deklaratat e shkurtra mbi të vërtetat biblike shoqërohen nga shkrime që i mbështesin. Duke qenë se shumica e shkrimeve janë përmendur e jo cituar, është e rëndësishme që ta inkurajosh studentin për t’i gjetur këto vargje në Biblën e vet. Para se të mund ta zbatojë Fjalën e Perëndisë në jetë, ai duhet ta lexojë dhe të meditojë mbi të.—Josiu 1:8.
Thekso figurat. Broshura ka ilustrime me bollëk me fotografi dhe piktura, me më shumë se 50 vepra arti në të gjithën. Këto nuk janë vënë vetëm për të tërhequr shikimin, por edhe si ndihmëse të mëtejshme për të mësuar. Për shembull, dy mësimet e fundit, (nga një faqe secili, në faqet ballore) titullohen «Të ndihmojmë të tjerët që të kryejnë vullnetin e Perëndisë» dhe «Vendimi yt për t’i shërbyer Perëndisë». Fotografitë që shtrihen në të dyja faqet ndjekin progresin frymor të të njëjtit person dhe e tregojnë atë duke dhënë dëshmi joformale, duke marrë pjesë në veprën shtëpi më shtëpi, duke bërë dedikimin e tij dhe në fund, duke u pagëzuar. Duke e drejtuar vëmendjen e studentit drejt këtyre figurave, e ndihmon atë të kuptojë hapat që kërkohen për t’i shërbyer Perëndisë.
Po nëse një person i interesuar nuk lexon mirë apo nuk është aspak në gjendje të lexojë? Shoqata po e vë në dispozicion këtë broshurë të re në kaseta, në disa gjuhë. Kaseta përmban tekstin e broshurës, si edhe shumë nga shkrimet e përmendura. Ajo është regjistruar si më poshtë: «Lexohet pyetja e parë, ndiqet nga paragrafi (apo paragrafët) që i përgjigjen asaj, bashkë me disa nga shkrimet e përmendura. Pas kësaj, lexohet pyetja tjetër, ndiqet nga teksti dhe shkrimet që i japin përgjigje e kështu me radhë. Studenti mund ta dëgjojë regjistrimin, ndërsa përgatitet për studimin. Kaseta mund të përdoret edhe gjatë drejtimit të studimit.
Ata që ishin të pranishëm në kongres, prisnin me padurim që ta përdornin këtë broshurë të re gjatë shërbimit në fushë. Për shembull, pak ditë pasi morën broshurën, dy pionierë (ungjilltarë të plotë kohorë) nga Shtetet e Bashkuara, ia lanë atë një çifti të ri, të cilin kishin vizituar. Kur ky çift pa përmbajtjen, mësimi «Praktika që Perëndia i urren», tërhoqi vëmendjen e tyre. «Gjithmonë më është thënë se Perëndia kurrë nuk mund të urrejë; ai është i tëri dashuri,—tha gruaja e re.—Këtë do të lexoj të parin.» Kur dy pionierët u kthyen javën tjetër, kjo grua e re tha: «Po lexoja broshurën e re. Është shumë e vështirë që të bëjmë të gjitha gjërat që duhet të bëjmë. Jehovai nuk është i kënaqur me ne; ne nuk jemi të martuar. Por kemi marrë një vendim. Kemi marrë masat për t’u martuar të premten që vjen.» Duke përqafuar këtë çift pionierësh, ata shtuan: «Ju kërkojmë ndjesë që nuk mund të bëjmë studim të zakonshëm, por marrja e këtij vendimi na hoqi një peshë të rëndë nga vetja.»
Me çdo mënyrë, përdor broshurën e re Çfarë kërkon? Ajo është një vegël e shkëlqyer, për të ndihmuar të tjerët që të mësojnë kërkesat e Perëndisë.
[Figurat në faqen 17]
Si do ta përdorësh broshurën e re?