Të ndihmojmë të tjerët që të mësojnë kërkesat e Perëndisë

«Nevoja është vënë mbi mua. Vërtet, mjerë unë, nëse nuk e shpall lajmin e mirë!»​—1. KORINTASVE 9:16, BR.

1, 2. (a) Në cilën vepër të dyfishtë kërkon Jehovai prej nesh që të marrim pjesë? (b) Çfarë duhet të mësojnë njerëzit me zemër të ndershme, për t’u bërë nënshtetas të Mbretërisë së Perëndisë?

JEHOVAI ka një lajm të mirë për njerëzimin. Ai ka një Mbretëri dhe dëshiron që njerëzit kudo që janë, të dëgjojnë për të! Pasi e mësojmë këtë lajm të mirë, Perëndia kërkon prej nesh që ta ndajmë atë me të tjerët. Kjo është një vepër e dyfishtë. Së pari, ne duhet të shpallim lajmin e mirë të Mbretërisë së Perëndisë. Në profecinë e tij për «përfundimin e sistemit të gjërave», Jezui tha: «Ky lajm i mirë i mbretërisë do të predikohet në të gjithë tokën e banuar për dëshmi në të gjitha kombet dhe atëherë do të vijë fundi.»​—Mateu 24:3, 14, BR.

² Aspekti i dytë i kësaj vepre përfshin mësimin e atyre që i përgjigjen në mënyrë të favorshme shpalljes së Mbretërisë. Pas ringjalljes së tij, Jezui i tha një grupi të madh të dishepujve të tij: «Shkoni, pra, dhe bëni dishepuj prej njerëzve të të gjitha kombeve, duke i pagëzuar në emër të Atit, të Birit dhe të frymës së shenjtë, duke i mësuar ata që të mbajnë të gjitha gjërat që ju urdhërova. Dhe ja, unë jam me ju të gjitha ditët, deri në përfundim të sistemit të gjërave.» (Mateu 28:19, 20, BR) ‘Gjërat që Krishti ka urdhëruar’ nuk vijnë prej tij; ai i mësoi të tjerët që të mbajnë urdhërimet apo kërkesat e Perëndisë. (Gjoni 14:23, 24; 15:10) Kështu, pra, të mësosh të tjerët ‘që të mbajnë gjërat që ka urdhëruar Krishti’, përfshin dhënien e ndihmës atyre, që të mësojnë kërkesat e Perëndisë. Për t’u bërë nënshtetas të Mbretërisë së Perëndisë, njerëzit me zemër të ndershme duhet të plotësojnë kërkesat e Tij.

3. Çfarë është Mbretëria e Perëndisë dhe çfarë do të kryejë ajo, që ky mesazh i Mbretërisë të quhet lajmi i mirë?

³ Çfarë është Mbretëria e Perëndisë? Ç’gjë do të kryejë ajo, që e bën këtë mesazh të Mbretërisë të quhet lajm i mirë? Mbretëria e Perëndisë është një qeveri qiellore. Ajo është shumë e çmuar për zemrën e Jehovait, pasi përbën mjetin nëpërmjet të cilit ai do të shenjtërojë emrin e tij, duke e pastruar nga të gjitha sharjet. Mbretëria është instrumenti që Jehovai do të përdorë, për të bërë që vullneti i tij të kryhet në tokë, ashtu si në qiell. Ja, pse Jezui na mësoi që të lutemi për ardhjen e Mbretërisë së Perëndisë dhe na nxiti që ta vëmë atë në vend të parë në jetën tonë. (Mateu 6:9, 10, 33) A e kupton, pra, përse është kaq e rëndësishme për Jehovain që t’i mësojmë të tjerët për Mbretërinë e tij?

Një sfidë, por jo një barrë

4. Si mund të ilustrohet se detyrimi ynë për të predikuar lajmin e mirë nuk është një barrë?

⁴ A është një barrë predikimi i këtij lajmi të mirë? Absolutisht jo! Le ta ilustrojmë në këtë mënyrë: Një baba ka detyrimin për ta siguruar familjen e tij materialisht. Mosbërja e kësaj gjëje është njësoj sikur të hedhësh poshtë besimin e krishterë. Apostulli Pavël shkroi: «Sigurisht, nëse dikush nuk siguron për të vetët dhe veçanërisht për ata që janë anëtarë të familjes së tij, ai ka mohuar besimin dhe është më keq se një person pa besim.» (1. Timoteut 5:8, BR) A përbën një barrë ky detyrim për një burrë të krishterë? Jo, nëse e do familjen e tij, pasi në këtë rast ai dëshiron ta ketë atë të siguruar.

5. Edhe pse vepra e predikimit dhe e bërjes së dishepujve është një detyrim, përse duhet të jemi të kënaqur që marrim pjesë në të?

⁵ Po njësoj, vepra e predikimit dhe e bërjes së dishepujve është një detyrim, një kërkesë, nga e cila varet vetë jeta jonë. Këtë, Pavli e shprehu me fjalët: «Nevoja është vënë mbi mua. Vërtet, mjerë unë, nëse nuk e shpall lajmin e mirë!» (1. Korintasve 9:16, BR; krahaso Ezekielin 33:7-9.) Megjithatë, ajo që na shtyn për të predikuar është dashuria e jo thjesht detyra. Mbi të gjitha, ne duam Perëndinë, por duam, gjithashtu, edhe të afërmit tanë dhe e dimë se sa e rëndësishme është për ta që të dëgjojnë lajmin e mirë. (Mateu 22:37-39) Ai u jep atyre një shpresë për të ardhmen, shpresën se Mbretëria e Perëndisë së shpejti do të ndreqë padrejtësitë, do të heqë çdo lloj shtypjeje dhe do të vendosë paqen dhe unitetin, gjithçka për të bekuar përjetësisht ata që i nënshtrohen sundimit të tij të drejtë. A nuk ndihemi të kënaqur, madje të drithëruar, për ta ndarë këtë lajm të mirë me të tjerët?​—Psalmi 110:3.

6. Përse vepra e predikimit dhe ajo e bërjes së dishepujve paraqet një sfidë të vërtetë?

⁶ Në të njëjtën kohë, kjo vepër e predikimit dhe e bërjes së dishepujve paraqet një sfidë të vërtetë. Njerëzit ndryshojnë. Jo të gjithë kanë të njëjtat interesa apo aftësi. Disa janë të arsimuar mirë e ndërkohë të tjerët kanë një arsimim shumë të ulët. Leximi që njëherë e një kohë konsiderohej si një mundësi për të kaluar kohën në një mënyrë të preferueshme, tani shpeshherë shikohet si një punë. Aliteracia, e cila përcaktohet si «cilësia apo gjendja e të qenit i aftë për të lexuar, por i painteresuar për ta bërë», është një problem gjithnjë e në rritje, edhe në ato vende që mburren për mesataren e lartë që kanë në shkrim e këndim. Si mund t’i ndihmojmë, atëherë, njerëzit me mjedise dhe interesa kaq të ndryshme për të mësuar se çfarë kërkon Perëndia?​—Krahaso 1. Korintasve 9:20-23.

Të pajisur siç duhet për të ndihmuar të tjerët

7. Si na ka pajisur «skllavi i besueshëm dhe i matur», për të ndihmuar të tjerët që të mësojnë kërkesat e Perëndisë?

⁷ Një detyrë e vështirë është më e lehtë për t’u kryer, kur ke veglat apo pajisjet që duhen. Një vegël që është e përshtatshme për një punë të veçantë sot, nesër mund të modifikohet apo edhe të zëvendësohet për shkak të nevojave që kanë ndryshuar. Po njësoj është edhe me shpalljen e mesazhit të Mbretërisë së Perëndisë që na është ngarkuar. Me kalimin e viteve, «skllavi i besueshëm dhe i matur» na ka siguruar pikërisht veglat e duhura, botime të bëra sidomos për t’u përdorur në drejtimin e studimeve biblike në shtëpi. (Mateu 24:45) Në këtë mënyrë, ne kemi qenë të pajisur për t’i ndihmuar njerëzit e «të gjitha kombeve, fiseve . . . dhe gjuhëve» që të mësojnë kërkesat e Perëndisë. (Zbulesa 7:9, BR) Herë pas here, për të plotësuar nevojat që kanë ndryshuar në fushën botërore, janë vënë në dispozicion instrumente të tjera. Le të marrim në shqyrtim pak shembuj.

8. (a) Çfarë pjese pati libri «Qoftë Perëndia i vërtetë» në çuarjen përpara të arsimimit biblik? (b) Çfarë instrumenti u sigurua për veprën e studimeve biblike në vitin 1968 dhe në ç’mënyrë ishte bërë ai veçanërisht? (c) Si ndihmoi libri E vërteta në veprën e bërjes së dishepujve?

⁸ Nga 1946-a deri në 1968-n, libri «Qoftë Perëndia i vërtetë» (angl.) u përdor si një instrument i fuqishëm për arsimimin biblik dhe u botuan rreth 19.246.710 kopje në 54 gjuhë. Libri E vërteta që të çon në jetën e përhershme, (angl.), i cili doli në vitin 1968, u përdor për shumë vite me efektshmëri në studimin e Biblës me personat e interesuar. Më parë, nuk ishte e pazakontë për disa që të studionin për shumë vjet me Dëshmitarët e Jehovait pa u pagëzuar. Megjithatë, ky instrument ishte bërë për të angazhuar studentin, duke e inkurajuar për të zbatuar atë që mësonte. Me çfarë rezultati? Libri Dëshmitarët e Jehovait: Lajmëtarë të Mbretërisë së Perëndisë, (angl.), deklaron: «Për tre vjet shërbimi, duke filluar nga 1 shtator 1968 deri më 31 gusht 1971, u pagëzuan një numër prej 434.906 personash, që përbëjnë më shumë se dyfishin e numrit të të pagëzuarve gjatë tre vjetëve të mëparshëm të shërbimit!» Që nga vënia në qarkullim e tij, libri E vërteta ka arritur një shpërndarje mahnitëse me mbi 107.000.000 kopje në 117 gjuhë.

9. Ç’tipar të veçantë ka libri Ti mund të jetosh përgjithmonë në parajsë mbi Tokë dhe çfarë ndikimi pati ai në radhët e lajmëtarëve të Mbretërisë?

⁹ Në vitin 1982, libri Ti mund të jetosh përgjithmonë në parajsë mbi Tokë, u bë libri kryesor për përdorim në drejtimin e studimeve biblike. Kjo vegël ka mbi 150 ilustrime të gjalla, secila me diçitura domethënëse që theksojnë në mënyrë të përmbledhur atë çka mësojmë nga figurat. Numri i fletushkës Shërbimi Ynë i Mbretërisë për tetor-in 1982, (angl.), deklaronte: «Në rreth 20 vjetët, në të cilët libri «Qoftë Perëndia i vërtetë» ishte libri ynë kryesor që përdornim për studime (nga 1946 deri nga mesi i viteve ’60), mbi 1.000.000 lajmëtarë të rinj të Mbretërisë iu shtuan radhëve tona. Pas kësaj, u shtuan 1.000.000 lajmëtarë të tjerë, kur libri E vërteta që të çon në jetën e përhershme, pasi u vu në qarkullim në vitin 1968, u bë libri kryesor për studim. A do të shohim një shtim të ngjashëm në radhët e lajmëtarëve të Mbretërisë, me përdorimin e librit të ri për studime, Ti mund të jetosh përgjithmonë në parajsë mbi Tokë? Patjetër, po të jetë vullneti i Jehovait!» Siç u bë e dukshme, ishte vullneti i Jehovait, sepse nga 1982-shi deri në 1995-n, mbi 2.700.000 të tjerë iu shtuan radhëve të lajmëtarëve të Mbretërisë!

10. Cila vegël e re u sigurua në vitin 1995 dhe përse duhet t’i aftësojë ajo studentët e Biblës për të bërë një përparim fare të shpejtë frymor?

¹⁰ «E korra është me të vërtetë e madhe, por punëtorët janë pak»,​—tha Jezui. (Mateu 9:37) E korra është me të vërtetë e madhe. Ka akoma shumë për të bërë. Në disa vende, njerëzit duhet të presin të regjistruar nëpër lista për studime biblike. Kështu, me qëllimin për ta përhapur njohurinë e Perëndisë më shpejt, në 1995-n, «skllavi i besueshëm dhe i matur» na siguroi një vegël të re, librin 192-faqësh me titull Njohuria që të çon në jetën e përhershme. Ky instrument i vlefshëm nuk përqendrohet në doktrinat e rreme. Ai i paraqet të vërtetat biblike në një mënyrë pozitive. Shpresojmë që ai t’u mundësojë studentëve të Biblës, që të bëjnë një përparim frymor fare të shpejtë. Libri Njohuria me 45.500.000 kopje të shtypura në 125 gjuhë dhe që ka nisur të përkthehet në 21 gjuhë të tjera, tashmë ka pasur një ndikim në fushën botërore.

11. Cila vegël e efektshme u vu në dispozicion për të ndihmuar në mësimin e atyre që janë analfabetë apo që nuk lexojnë mirë dhe si i ka kontribuar në një masë të madhe programit tonë të mësimit global?

¹¹ Në ndonjë rast, ‘skllavi i besueshëm’ ka siguruar vegla të bëra për një auditor të veçantë apo të kufizuar. Për shembull, ç’mund të thuhet për ata njerëz që mund të kenë nevojë për ndihmë të veçantë, për shkak të mjedisit të tyre kulturor apo fetar? Si mund t’i ndihmojmë ata që të mësojnë kërkesat e Perëndisë? Në 1982-shin, morëm pikërisht atë që na duhej: broshurën 32-faqëshe Gëzo jetën në tokë përgjithmonë! Ky botim me shumë ilustrime ka qenë një vegël e efektshme për të mësuar ata që janë analfabetë apo që nuk lexojnë mirë. Ai përmban një prezantim shumë të thjeshtë dhe të lehtë për t’u kuptuar të mësimeve biblike bazë. Që nga vënia e saj në qarkullim, broshura Gëzo jetën i ka kontribuar në një masë të madhe programit tonë të mësimit botëror. Janë shtypur mbi 105.100.000 kopje në 239 gjuhë, duke e bërë atë botimin më të përkthyer që Shoqata Watch Tower ka nxjerrë deri më tani!

12, 13. (a) Cilin mjet tjetër ka siguruar ‘skllavi i besueshëm’ që nga viti 1990, për të arritur auditorin e gjerë? (b) Si mund t’i përdorim videot e Shoqatës gjatë shërbimit tonë në fushë? (c) Cila vegël e re u sigurua kohët e fundit, për të dhënë ndihmesë në veprën tonë të bërjes së dishepujve?

¹² Duke filluar nga viti 1990, përveç botimeve të shtypura, ‘skllavi i besueshëm’ na ka siguruar një mjet arsimimi, i cili ofron një tjetër mënyrë për të arritur një auditor të gjerë: videokasetat. Në tetor të atij viti, doli videoja 55-minutëshe Dëshmitarët e Jehovait: Organizata pas emrit, e cila ishte videoja e parë e prodhuar deri në atë kohë nga Shoqata Watch Tower. Prezantimi i bukur dhe informativ, i cili u vu në dispozicion në 35 gjuhë, tregon për organizatën mbarëbotërore të popullit të devotshëm të Jehovait, e cila përmbush urdhrin e Jezuit për të shpallur lajmin e mirë në të gjithë tokën. Videoja është bërë për të ndihmuar sidomos në veprën tonë të bërjes së dishepujve. Lajmëtarët e Mbretërisë nuk humbën kohë për ta vënë në përdorim këtë vegël të re gjatë shërbimit në fushë. Disa e merrnin në çantat e tyre të librave, gjithmonë të gatshëm për ta shfaqur apo për t’ua dhënë hua personave të interesuar. Shpejt pas daljes së saj, një mbikëqyrës udhëtues shkroi: «Videot janë bërë mjete që i përkasin shekullit të 21-të për të arritur mendjet dhe zemrat e miliona personave, e prandaj, shpresojmë që kjo video të jetë vetëm e para në vargun e gjatë të videove që do të përdorë Shoqata, për të çuar përpara veprën mbarëbotërore të Mbretërisë.» Në të vërtetë, video të tjera dolën, duke përfshirë atë me tri seri Bibla: Një libër faktesh dhe profecish dhe Dëshmitarët e Jehovait qëndrojnë të patundur kundër sulmit nazist. Nëse videot e Shoqatës janë në dispozicion në gjuhën tënde, a i ke përdorur ato gjatë shërbimit në fushë?a

¹³ Kohët e fundit, u vu në dispozicion një vegël e re, broshura Çfarë kërkon Perëndia prej nesh?, për të na ndihmuar në veprën e bërjes së dishepujve. Për ç’arsye u botua ajo? Si mund të përdoret?

Të shqyrtojmë një vegël të re

14, 15. Për kë është bërë broshura Çfarë kërkon? dhe ç’përmban ajo?

¹⁴ Botimi i ri Çfarë kërkon Perëndia prej nesh?, është bërë për njerëz që tashmë besojnë në Perëndinë dhe e respektojnë Biblën. Në përgatitjen e kësaj broshure ndihmuan mbikëqyrës udhëtues si edhe misionarë të stërvitur në Galaad, që kishin shumë vite përvoje në vendet në zhvillim. Ajo përmban një kurs të plotë studimi, i cili trajton mësimet bazë të Biblës. Mënyra e të shprehurit është e ngrohtë, e thjeshtë dhe e drejtpërdrejtë. Në të njëjtën kohë, teksti nuk është tepër i thjeshtësuar. Ai nuk paraqet vetëm «qumësht», por edhe ‘ushqim të fortë’ nga fjala e Perëndisë, në një mënyrë të tillë që shumica e njerëzve duhet të jetë në gjendje ta kuptojë.​—Hebrenjve 5:12-14.

¹⁵ Vitet e fundit, lajmëtarët e Mbretërisë nga vende të ndryshme kanë kërkuar tamam një botim të tillë. Për shembull, zyra e Shoqatës Watch Tower në Papua Guinenë e Re, shkruante: «Njerëzit janë të pështjelluar nga mësimet kontradiktore fetare. Ata kanë nevojë për deklarata të përmbledhura të së vërtetës, të mbështetura nga disa vargje biblike, të cilat mund t’i kërkojnë në Biblën e tyre. Ata kanë nevojë për një prezantim të qartë dhe specifik të asaj se çfarë kërkon Perëndia nga të krishterët e vërtetë dhe cilat zakone e praktika janë të papranueshme prej tij.» Broshura Çfarë kërkon? është tamam ajo që na duhet për t’i ndihmuar ata të mësojnë kërkesat e Perëndisë.

16. (a) Kush mund të përfitojë në mënyrë të veçantë nga shpjegimi i thjeshtë që bëhet në broshurën e re? (b) Si mund të përfitojnë personat e territorit tënd nga broshura Çfarë kërkon?

¹⁶ Si mund ta përdorësh këtë instrument të ri? Së pari, ai mund të përdoret për të studiuar me njerëz që kanë vështirësi në lexim apo që mund të mos kenë prirje për të lexuar.b Këta individë mund të përfitojnë nga shpjegimi i thjeshtë që bëhet në broshurë. Pas rishikimit të një kopjeje të këtij botimi të dërguar para kohe, zyrat Watch Tower shkruajnë si më poshtë: «Broshura do të jetë shumë e dobishme në shumë pjesë të vendit, ku njerëzit nuk janë të prirë për të lexuar në një masë të gjerë.» (Brazil) «Ka vërtet shumë emigrantë, të cilët nuk mund të lexojnë në gjuhën e tyre amtare dhe që akoma kanë disa vështirësi për të lexuar frëngjisht. Kjo broshurë mund të përdoret si një ndihmë në studimin me persona të tillë.» (Francë) A mund të mendosh për personat e territorit tënd, të cilët mund të përfitojnë nga broshura Çfarë kërkon?

17. Në ç’mënyrë mund të jetë e dobishme broshura e re në shumë vende dhe përse?

¹⁷ Së dyti, në shumë vende broshura mund të jetë e dobishme për fillimin e studimeve biblike me njerëz me frikë Perëndie, pavarësisht nga fakti se sa të arsimuar janë. Sigurisht, duhen bërë përpjekje për të filluar studime me librin Njohuria që të çon në jetën e përhershme. Por në disa raste, mund të jetë më e lehtë për të filluar një studim me një broshurë e më pas, në një moment të përshtatshëm, studimi duhet të kalohet në librin Njohuria, i cili është ndihma jonë kryesore dhe e preferuar për studime. Në lidhje me këtë përdorim të broshurës Çfarë kërkon?, zyrat Watch Tower shkruajnë: «Të fillosh një studim biblik është e vështirë dhe mundësitë për të filluar një studim duken më të favorshme, kur lajmëtarët fillojnë me një broshurë.» (Gjermani) «Një broshurë e këtij lloji, do të jetë më e efektshme në fillimin e studimeve të reja biblike, të cilat më pas, mund të vazhdohen me librin Njohuria.» (Itali) «Ndonëse japonezët kanë një nivel të lartë arsimimi, mjaft kanë një njohuri shumë të kufizuar për Biblën dhe mësimet e saj bazë. Broshura duhet të shërbejë si një gur kalimi i shkëlqyeshëm për tek libri Njohuria.»​—Japoni.

18. Çfarë nuk duhet të harrojmë për plotësimin e kërkesave të Perëndisë?

¹⁸ Zyrat e Shoqatës anembanë botës e kanë kërkuar këtë broshurë dhe është dhënë miratimi për përkthimin e saj në 221 gjuhë. Qoftë i vlefshëm ky botim i ri në ndihmesën që do t’u japim të tjerëve për të mësuar se çfarë kërkon Perëndia Jehova prej tyre! Ne nga ana jonë, le të mos harrojmë se plotësimi i kërkesave të Perëndisë, duke përfshirë urdhrin për të predikuar dhe për të bërë dishepuj, na jep mundësinë e çmuar për t’i treguar Jehovait se sa shumë e duam. Po, ajo që kërkon Perëndia prej nesh, nuk është një barrë. Ajo është mënyra më e mirë për të jetuar!​—Psalmi 19:7-11.

[Shënimet]

A mund të shpjegosh?

◻ Në cilën vepër të dyfishtë kërkon Jehovai prej shërbëtorëve të tij që të marrin pjesë?

◻ Përse detyrimi ynë për të predikuar dhe për të bërë dishepuj nuk është një barrë?

◻ Cilat vegla na ka siguruar «skllavi i besueshëm dhe i matur», për të përdorur në veprën e predikimit dhe të bërjes së dishepujve?

◻ Për kë është bërë broshura Çfarë kërkon? dhe si mund ta përdorim atë në shërbimin tonë?

[Figura në faqen 24]

Vepra jonë e predikimit dhe e bërjes së dishepujve nuk është një barrë

[Figurat në faqen 26]

«Qoftë Perëndia i vërtetë» (1946, rishikuar në 1952): 19.250.000 kopje në 54 gjuhë (treguar në anglisht)

«E vërteta që të çon në jetën e përhershme» (1968): 107.000.000 në 117 gjuhë (treguar në frëngjisht)

«Ti mund të jetosh përgjithmonë në parajsë mbi Tokë» (1982): 80.900.000 në 130 gjuhë (treguar në rusisht)

«Njohuria që të çon në jetën e përhershme» (1995): 45.500.000 në 125 gjuhë (treguar në gjermanisht)