Të jetojmë në lartësinë e kushtimit tonë
1 Kurdo që të jemi pagëzuar, kohët e fundit a dhjetëvjeçarë më parë, me siguri e mbajmë mend këtë ngjarje historike të jetës sonë. Pagëzimi ynë nuk është fundi, por fillimi i një jete të kushtuar ndaj shërbimit, e cila mund të zgjatë përgjithmonë. (1 Gjon. 2:17) Çfarë përfshin të jetojmë në lartësinë e kushtimit tonë?
2 Të ndjekim shembullin e Krishtit: Pasi u pagëzua, Jezui «nisi veprën e tij», duke shpallur «lajmin e mirë të mbretërisë së Perëndisë». (Luka 3:23; 4:43) Po kështu edhe ne, pasi e simbolizojmë kushtimin tonë ndaj Jehovait me anë të pagëzimit, bëhemi shërbëtorë të emëruar zyrtarisht të lajmit të mirë. Ndonëse mund të na duhet shumë kohë dhe përpjekje për të siguruar gjërat e domosdoshme materiale, karriera ose vepra jonë kryesore është shërbimi i krishterë. (Mat. 6:33) Në vend që të përpiqen të arrijnë pasurinë ose famën, ata që i janë kushtuar Perëndisë përpiqen ‘t’i japin lavdi shërbimit të tyre’, siç bëri apostulli Pavël. (Rom. 11:13) A e çmojmë privilegjin për t’i shërbyer Jehovait dhe a e përdorim sa më plotësisht këtë privilegj?
3 Siç ndodhi edhe në rastin e Jezuit, ne duhet ‘t’i kundërvihemi Djallit’. (Jak. 4:7) Satanai e tundoi Jezuin pasi Ai u pagëzua e, po ashtu edhe sot i vë në shënjestër shërbëtorët e kushtuar të Jehovait. (Luka 4:1-13) Duke qenë të rrethuar nga bota e Satanait, duhet të kemi vetëdisiplinë, duke shmangur çdo gjë që mund të na ndotë mendjen ose të na korruptojë zemrën. (Prov. 4:23; Mat. 5:29, 30) Të krishterët paralajmërohen se ‘nuk marrin dot pjesë edhe në «tryezën e Jehovait», edhe në tryezën e demonëve’. (1 Kor. 10:21) Kjo kërkon nga ana jonë të ruhemi nga zbavitja jo e shëndetshme, nga shoqëritë e këqija dhe nga rreziqet në Internet. Kërkon edhe të shmangim materialet apostate. Të jemi syçelë ndaj këtyre taktikave të Satanait, si edhe ndaj të tjerave, do të na ndihmojë që të jetojmë në lartësinë e kushtimit tonë.
4 Të përdorim masat që na ka siguruar Perëndia: Për të na ndihmuar që të jetojmë në lartësinë e kushtimit tonë, Jehovai na ka siguruar ndihmë nëpërmjet Fjalës së tij dhe kongregacionit të krishterë. Le ta bëjmë leximin e Biblës dhe lutjet që i drejtojmë Jehovait pjesë të veprimtarive tona të përditshme. (Jos. 1:8; 1 Sel. 5:17) Të gjejmë kënaqësi nga mbledhjet e kongregacionit. (Psal. 122:1) Të shoqërohemi me ata që i frikësohen Jehovait dhe që ruajnë urdhërimet e tij.—Psal. 119:63.
5 Me mbështetjen e Jehovait mund të jetojmë në lartësinë e kushtimit që i kemi bërë dhe mund t’i shërbejmë atij përgjithmonë me gëzim.—Psal. 22:26, 27; Filip. 4:13.