Të imitojmë drejtësinë e Jehovait

¹ Jehovai «e do drejtësinë». (Psal. 37:28) Ja përse, ndonëse ka dekretuar që kjo botë e padrejtë do të shkatërrohet, ai ka marrë masa që më parë të jepet një paralajmërim. (Mar. 13:10) Kjo u jep mundësinë njerëzve që të pendohen dhe të shpëtojnë. (2 Pjet. 3:9) A bëjmë përpjekje për të imituar drejtësinë e Jehovait? A na shtyn mjerimi dhe vuajtja e njerëzimit që t’ua japim edhe të tjerëve shpresën e Mbretërisë? (Prov. 3:27) Dashuria për drejtësi do të na nxitë të jemi të zellshëm në veprën e predikimit.

² Të shfaqim paanësi në predikim: Duke ua shpallur të gjithëve me paanësi qëllimin e Perëndisë, ne ‘zbatojmë drejtësinë’. (Mik. 6:8) Duhet ta shmangim prirjen që kemi si të papërsosur për të paragjykuar të tjerët duke u nisur nga pamja e jashtme. (Jak. 2:1-4, 9) Vullneti i Jehovait «është që njerëz të çdo lloji të shpëtojnë dhe të arrijnë në njohurinë e saktë të së vërtetës». (1 Tim. 2:4) E vërteta e Fjalës së Perëndisë mund të ndikojë te njerëzit që të bëjnë ndryshime të mëdha në jetën e tyre. (Hebr. 4:12) Kur e vlerësojmë këtë fakt, mund të nxitemi që t’i shohim me besim njerëzit, madje edhe ata që më parë kanë bërë një vesh të shurdhër.

³ Një motër që punonte në një dyqan, gati trembej nga pamja e jashtme e një klienti të rregullt. Megjithatë, kur erdhi çasti i përshtatshëm, ajo u përpoq t’i tregonte për parajsën që Perëndia ka premtuar. Ai iu përgjigj vrazhdë që nuk u besonte përrallave dhe që ishte një hipí e narkoman. Por motra nuk u dorëzua. Një ditë ai e pyeti se ç’mendonte për flokët e tij të gjatë. Ajo me takt i shpjegoi se çfarë thoshte Bibla për këtë gjë. (1 Kor. 11:14) Për motrën ishte një surprizë e këndshme kur të nesërmen ai erdhi i qethur e i rruar. Kërkoi një studim biblik dhe një vëlla pranoi me gëzim që t’ia drejtonte studimin. Ai bëri përparim, iu kushtua Perëndisë dhe u pagëzua. Ashtu si ky njeri, shumë të tjerë që sot i shërbejnë Jehovait, janë mirënjohës për paanësinë dhe këmbënguljen që shfaqën ata që i dhanë mesazhin e Mbretërisë.

⁴ Shumë shpejt Jehovai do ta zhdukë padrejtësinë nga faqja e dheut. (2 Pjet. 3:10, 13) Në këtë pak kohë që na ka mbetur, le të imitojmë drejtësinë e Jehovait duke u dhënë mundësi të gjithë njerëzve të shpëtojnë nga shkatërrimi i ardhshëm i botës së padrejtë të Satanait.​—1 Gjon. 2:17.

Të drejtojmë studime biblike që bëjnë përparim​—Pjesa 1.

Çfarë është një studim biblik?

¹ Çdo muaj, populli i Perëndisë drejton në të gjithë botën, rreth gjashtë milionë studime biblike. Duke përdorur metoda të mira mësimdhënieje, mund t’i ndihmojmë studentët biblikë që të bëjnë përparim deri në kushtim e pagëzim dhe të bëhen «të kualifikuar aq sa duhet për të mësuar të tjerët». (2 Tim. 2:2) A do t’ju pëlqente që t’i ndihmonit studentët tuaj të përparonin deri në këtë pikë? Duke filluar me këtë numër, Shërbimi ynë i Mbretërisë do të ketë një seri artikujsh që do të shpjegojnë aspektet themelore se si të drejtojmë studime biblike që bëjnë përparim.

² Kur mund të raportohet një studim?: Nëse rregullisht dhe sistematikisht bëni biseda biblike, edhe pse të shkurtra, gjatë të cilave përdorni Biblën dhe një nga botimet e rekomanduara, atëherë jeni duke drejtuar një studim biblik. Kjo vlen edhe kur studimi zhvillohet te dera ose me anë të telefonit. Studimi mund të raportohet nëse është bërë dy herë pasi studentit i është treguar se si kryhet një studim biblik dhe duket se studimi do të vazhdojë.

³ Broshura Çfarë kërkon? dhe libri Njohuria janë botimet që përdoren për të drejtuar shumë studime biblike. Nëse studentët i kanë mbaruar këto botime dhe është e qartë se, edhe pse ngadalë, studenti po bën përparim dhe po e rrit vlerësimin për atë që po mëson, atëherë mund ta vazhdojmë studimin me librin Të adhurojmë. Broshura Ti mund të jesh miku i Perëndisë! mund të përdoret me ata njerëz që kanë arsimim të kufizuar dhe aftësi jo të mira leximi.

⁴ Vepra e studimit biblik ka qenë frytdhënëse pasi ka ndihmuar me miliona njerëz të bëhen dishepuj të vërtetë të Jezu Krishtit. (Mat. 28:19, 20) Nëse zbatojmë sugjerimet që do të na jepen në artikujt e ardhshëm të kësaj serie, mund të drejtojmë studime që bëjnë përparim.