Predikimi për Mbretërinë​—Një privilegj i çmuar

¹ Çdo ditë, i gjithë njerëzimi përfiton nga të mirat që Jehovai siguron me bujari për të mbështetur jetën. (Mat. 5:45) Por, të paktë janë ata që gëzojnë privilegjin e mrekullueshëm që t’i shfaqin çmueshmërinë Krijuesit duke predikuar lajmin e mirë për Mbretërinë e Perëndisë. (Mat. 24:14) Sa e vlerësoni ju këtë privilegj të çmuar?

² Predikimi për Mbretërinë nderon Perëndinë dhe u sjell shpresë dhe paqe njerëzve që janë të stresuar nga kohët e turbullta që kalojnë sot. (Hebr. 13:15) Për ata që e pranojnë këtë mesazh do të thotë jetë e përhershme. (Gjoni 17:3) Cila është ajo karrierë apo ai profesion që ofron këto gjëra të mrekullueshme? Apostulli Pavël e tregonte vlerësimin e tij për shërbimin në mënyrën se si e kryente atë. Për të ishte vërtet një thesar.​—Vep. 20:20, 21, 24; 2 Kor. 4:1, 7.

³ Të tregojmë vlerësim për këtë privilegj të çmuar: Një mënyrë se si tregojmë vlerësim për privilegjin e predikimit është duke i dhënë rëndësi cilësisë së shërbimit tonë. A përpiqemi të përgatitim më parë një prezantim që do të prekë zemrat e dëgjuesve? A mund të bëjmë diçka për t’u përmirësuar në përdorimin e Shkrimeve dhe për të arsyetuar më mirë me njerëzit? A përpiqemi ta punojmë të gjithë territorin që na është caktuar? A dimë si të fillojmë dhe të drejtojmë një studim biblik? Ashtu si të krishterët besnikë, në të shkuarën dhe tani, pikëpamja e duhur për këtë vepër na nxit të veprojmë dhe na bën që ta shohim vërtet si një privilegj.​—Mat. 25:14-23.

⁴ Na ngushëllon vërtet fakti që përpjekjet tona të zellshme për të marrë pjesë në shërbim, edhe atëherë kur jetojmë me problemet e moshës së shkuar, kur nuk jemi mirë me shëndet ose kur kemi probleme të tjera, vlerësohen jashtë mase. Fjala e Perëndisë na siguron se Jehovai i vlerëson këto përpjekje që bëjmë për t’i shërbyer, madje edhe ato përpjekje që mund të mos vihen re nga të tjerët.​—Luka 21:1-4.

⁵ Predikimi për Mbretërinë është burim i një kënaqësie të madhe. Një motër 92-vjeçare tha: «Çfarë privilegji kur kthej kokën pas e kujtoj ato 80 vite shërbimi që ia kam kushtuar Perëndisë. Nuk jam penduar fare! Po ta filloja nga e para jetën, nuk do të ndryshoja asgjë, sepse është e vërtetë se ‘mirësia e Perëndisë vlen më tepër se jeta’.» (Psal. 63:3) Le të tregojmë edhe ne vlerësimin tonë për veprën e predikimit të Mbretërisë, për këtë privilegj që na e ka dhënë Perëndia!

Të drejtojmë studime biblike që bëjnë përparim​—Pjesa 12

T’i ndihmojmë studentët të fillojnë e të drejtojnë studime biblike

¹ Kur studenti ynë fillon të marrë pjesë në shërbim mund të jetë pak i frikësuar kur mendon për të filluar dhe për të drejtuar vetë studime biblike. Si mund t’i ndihmojmë që të fitojnë më tepër siguri në këtë aspekt të rëndësishëm të shërbimit?​—Mat. 24:14; 28:19, 20.

² Kur studenti biblik kualifikohet si lajmëtar i papagëzuar, ka mundësi që tashmë të jetë regjistruar në Shkollën e Shërbimit Teokratik. Stërvitja që merr gjatë përgatitjes dhe përmbushjes së caktimeve në këtë shkollë, do ta ndihmojë që të aftësohet në ato pika të mësimdhënies për të cilat ka nevojë, «një punëtor që s’ka pse t’i vijë turp për asgjë, që e përdor drejt fjalën e së vërtetës».​—2 Tim. 2:15.

³ Ta mësojmë me anë të shembullit tonë: Jezui i stërviti dishepujt e tij duke u dhënë udhëzime të qarta dhe duke u lënë një shembull të mrekullueshëm. Ai tha: «Kushdo që është i mësuar në mënyrë të përsosur, do të jetë si mësuesi i tij.» (Luka 6:40) Është shumë e rëndësishme që të imitoni Jezuin, duke lënë një shembull të mirë në shërbimin që bëni. Kur studenti ju vëzhgon në shërbim, ai do ta kuptojë se qëllimi i rivizitave është që të fillohen studime biblike.

⁴ Shpjegoji studentit se kur t’i ofrojë të interesuarit një studim, nuk është e nevojshme që t’ia përshkruajë me hollësi si zhvillohet studimi. Shpesh është mirë që t’ia demonstrojë se si bëhet një studim biblik duke përdorur një ose ndoshta dy paragrafë nga një libër a broshurë studimi. Për këtë mund të gjeni sugjerime praktike te faqja tetë e kësaj fletëpalosjeje dhe te Shërbimi ynë i Mbretërisë janar 2002, faqja 6.

⁵ Kur është e përshtatshme, ftoje studentin të të shoqërojë ty ose një lajmëtar tjetër me përvojë në ndonjë studim tjetër biblik. Ai mund të përfshihet duke komentuar për ndonjë paragraf ose shkrim kryesor. Kështu, duke vëzhguar, studenti do të mësojë më shumë për të drejtuar studime biblike që bëjnë përparim. (Prov. 27:17; 2 Tim. 2:2) Ta përgëzojmë dhe t’i tregojmë se si mund të përmirësojë.

⁶ Stërvitja për të qenë mësues të Fjalës së Perëndisë do t’i pajisë lajmëtarët e rinj për ‘veprën e mirë’ që përfshin fillimin dhe drejtimin e studimeve biblike. (2 Tim. 3:17) Sa bukur është të punosh krah për krah me ta për të përhapur ftesën e mrekullueshme: «Le të vijë; kushdo që dëshiron të marrë falas ujin e jetës!»​—Zbul. 22:17.