Dita e Jehovait është afër

¹ Të krishterët e dëshirojnë me zjarr ardhjen e ditës së Jehovait, kur ai të shkatërrojë sistemin e tanishëm dhe të sjellë një botë të re e të drejtë. (2 Pjet. 3:12, 13) Meqenëse nuk e dimë me saktësi se kur do të vijë ajo ditë, duhet të qëndrojmë gjithmonë vigjilentë dhe të ndihmojmë edhe të tjerët që të jenë po kështu. (Ezek. 33:7-9; Mat. 24:42-44) Meditimi rreth Fjalës profetike të Perëndisë do të na e forcojë bindjen se «dita e madhe e Jehovait është afër».​—Sof. 1:14, BR.

² Marshimi i fuqive botërore: Ashtu siç dokumentohet te Zbulesa 17:9-11, apostulli Gjon përmend ‘shtatë mbretër’, të cilët përfaqësojnë ardhjen e shtatë fuqive botërore njëra pas tjetrës. Gjoni përmend edhe ‘një mbret të tetë’, që në ditët e sotme simbolizon Kombet e Bashkuara. A duhet të presim që në skenë të hyjnë fuqi të tjera botërore? Jo, profecia thotë se ky mbret i tetë «shkon në shkatërrim», dhe më pas nuk përmenden më mbretër të tjerë tokësorë. A ju ndihmon kjo profeci që të kuptoni se në ç’pikë ndodhet njerëzimi në rrjedhën e kohës?

³ Danieli 2:31-45 na ndihmon të kuptojmë ardhjen e ditës së Jehovait. Në këtë profeci, shëmbëlltyra e madhe që sheh Nabukodonosori në ëndërr tregon në mënyrë simbolike ardhjen njëra pas tjetrës të fuqive botërore. Çdonjëra prej këtyre fuqive është shfaqur tashmë. Po tani, në cilin moment të rrjedhës së historisë po jetojmë? Në atë periudhë që simbolizohet nga pjesa e fundit e këmbëve të shëmbëlltyrës. Profecia përshkruan në mënyrë të gjallë se çfarë do të ndodhë më pas. Sundimi njerëzor do të shkatërrohet tërësisht, duke ia lënë kështu vendin ‘një mbretërie që nuk do të shkatërrohet kurrë’. A e kuptoni se si kjo gjë tregon se dita e Jehovait është afër?

⁴ Prova të tjera: Jemi dëshmitarë okularë të provave të tjera që tregojnë se dita e Jehovait është afër. Shohim përmbushjen e asaj që paratha apostulli Pavël në lidhje me karakteristikat e njerëzve «në ditët e fundit». (2 Tim. 3:1-5) Dhe po marrim pjesë në dëshminë mbarëbotërore që duhet dhënë para se të vijë fundi. (Mat. 24:14) Le të pasqyrojmë nëpërmjet shërbimit tonë urgjencën e thirrjes së engjëllit: «Kini frikë Perëndinë dhe jepini lavdi, sepse ka mbërritur ora e gjykimit prej tij.»​—Zbul. 14:6, 7.

Të drejtojmë studime biblike që bëjnë përparim​—Pjesa 9

T’i përgatitim studentët për të dhënë dëshmi joformale

¹ Kur Andrea dhe Filipi e kuptuan se Jezui ishte Mesia i premtuar, nuk u përmbajtën dot pa ua dhënë të tjerëve këtë lajm entuziazmues. (Gjoni 1:40-45) Edhe sot, studentët biblikë nxiten të flasin me të tjerët, kur fillojnë të krijojnë besim te ajo që po mësojnë. (2 Kor. 4:13) Si t’i inkurajojmë që të dëshmojnë në mënyrë joformale dhe si t’i përgatitim që ta bëjnë sa më mirë këtë?

² Mund ta pyesim studentin nëse ka folur me të tjerët për ato gjëra që ka mësuar nga Bibla. Ndoshta ka miq ose pjesëtarë të familjes së tij që mund t’i ftojë të ulen aty me ne ndërsa zhvillojmë studimin. Ta pyesim nëse ndonjë shok pune, shok shkolle ose ndonjë i njohur tjetër ka treguar interes. Kështu studenti mund të fillojë të japë dëshmi. Ta ndihmojmë që të kuptojë se duhet të tregojë aftësi dalluese, respekt dhe të jetë i sjellshëm kur flet me të tjerët për Perëndinë Jehova dhe për qëllimet e tij.​—Kolos. 4:6; 2 Tim. 2:24, 25.

³ Kur flet me të tjerët për atë që beson: Është shumë e rëndësishme ta stërvitim studentin të përdorë Fjalën e Perëndisë kur flet me të tjerët për atë që beson. Në momente të caktuara gjatë studimit, ta pyesim studentin: «Si do ta përdorje Biblën për t’ia shpjeguar familjes sate këtë të vërtetë që mësove?» ose «Çfarë shkrimi do të përdorje për t’ia vërtetuar këtë gjë një shokut tënd?» Të dëgjojmë se si u përgjigjet këtyre pyetjeve, dhe t’i tregojmë si ta mbështetë në Shkrime atë që u mëson të tjerëve. (2 Tim. 2:15) Në këtë mënyrë po e përgatitim studentin për të dëshmuar edhe në mënyrë joformale, edhe për veprën e organizuar të predikimit, kur të kualifikohet.

⁴ Është e mençur ta përgatitim studentin biblik për të përballuar kundërshtimet. (Mat. 10:36; Luka 8:13; 2 Tim. 3:12) Kur të tjerët ngrenë pyetje ose bëjnë ndonjë koment për Dëshmitarët e Jehovait, kjo mund t’i krijojë mundësinë studentit që të japë dëshmi. Broshura Dëshmitarët e Jehovait​—Kush janë? Çfarë besojnë? mund ta pajisë që të jetë «gati për t’i paraqitur një mbrojtje kujtdo». (1 Pjet. 3:15) Të rinjtë në të vërtetën mund të përdorin këtë broshurë, kur miqtë dhe familjarët i kundërshtojnë, edhe pse të nisur nga motive të mira. Ajo ka informacione të sakta që mund të përdoren për t’i ndihmuar të kuptojnë bindjet dhe veprimtaritë tona të bazuara në Bibël.