Si të fillojmë studime biblike me ata që pranojnë revistat?
1. Cili është synimi ynë kur japim revista?
1 Zakonisht, kur jemi në shërbim të shtunave, ofrojmë revistat Kulla e Rojës dhe Zgjohuni! Megjithatë, ky është vetëm hapi i parë drejt synimit tonë për t’u mësuar të vërtetën atyre me zemër të sinqertë. Më poshtë gjenden disa sugjerime se si të ofrojmë në një rivizitë librin Çfarë mëson vërtet Bibla? për të filluar një studim biblik. Ato mund t’i përshtatni me territorin dhe mund t’i shprehni me fjalët tuaja. Mund të përdorni edhe prezantime të tjera që ju duken të efektshme.
2. Si mund t’i përdorim faqet e para të librit Çfarë mëson vërtet Bibla? për të filluar një studim biblik?
2 Të përdorim faqet e para të librit: Kur të ktheheni, mund të thoni: «Revistat që ju lashë na e drejtojnë vëmendjen te Bibla. Shikoni pse është kaq i rëndësishëm leximi i Biblës.» Lexojini Isainë 48:17, 18; Gjonin 17:3 ose ndonjë shkrim tjetër të përshtatshëm. Pastaj, pasi ia keni prezantuar dhe ia keni dhënë librin Çfarë mëson vërtet Bibla? mund të vazhdoni si më poshtë:
◼ «Bibla na jep një shpresë të vërtetë për të ardhmen.» Tregojini të zotit të shtëpisë faqet 4 e 5, dhe pyeteni: «Cili nga këto premtime do të donit të përmbushej?» Drejtojani vëmendjen te kapitulli që flet për premtimin biblik që zgjodhi dhe, nëse ai ka mundësi, shqyrtoni shkurtimisht një ose dy paragrafë.
◼ Ose mund të thoni: «Bibla u përgjigjet pyetjeve më të rëndësishme të jetës.» Drejtojani vëmendjen te faqja 6, dhe pyeteni nëse i ka bërë vetes ndonjë nga pyetjet në fund të faqes. Shkoni te kapitulli që i përgjigjet pyetjes dhe shqyrtoni shkurtimisht një a dy paragrafë.
◼ Ose mund të ndaleni te disa nga titujt në tabelën e përmbajtjes dhe pyeteni se cila nga ato tema i intereson. Hapeni librin në atë kapitull dhe demonstrojini shkurtimisht se si bëhet një studim biblik.
3. Si mund të fillojmë një studim biblik pasi kemi lënë revista që flasin për (a) keqësimin e kushteve botërore? (b) familjen? (c) besueshmërinë e Biblës?
3 Lër një pyetje pezull që në vizitën e parë: Një metodë tjetër është duke hedhur bazat për t’u kthyer përsëri. Pasi i zoti i shtëpisë pranon revistat, bëjini një pyetje dhe premtojini se do t’i jepni përgjigje kur të ktheheni herën tjetër. Përpiquni të lini takim me të për t’u kthyer në një orar të caktuar dhe sigurohuni që të jeni të përpiktë. (Mat. 5:37) Kur të ktheheni, kujtojini të zotit të shtëpisë pyetjen që kishit lënë pezull dhe lexoni e diskutoni shkurtimisht përgjigjen nga libri Çfarë mëson vërtet Bibla? Jepini një libër që t’ju ndjekë edhe ai. Ja disa shembuj:
◼ Nëse revista që keni lënë flet për keqësimin e kushteve botërore, mund të thoni: «Herën tjetër mund të flasim për përgjigjen që i jep Bibla kësaj pyetjeje: Çfarë ndryshimesh do të sjellë Perëndia në tokë?» Përdorni faqet 4 dhe 5 kur të ktheheni për ta vizituar përsëri. Ose mund ta pyesni: «A e ka fajin Perëndia për tragjeditë që ndodhin?» Kur të ktheheni për ta vizituar, tregojini të zotit të shtëpisë paragrafët 7 dhe 8 të kapitullit 1.
◼ Nëse revista që keni lënë flet për familjen, para se të largoheni, mund të bëni këtë pyetje: «Çfarë mund të bëjë çdo pjesëtar i familjes që familja të jetë më e lumtur?» Kur të ktheheni, shqyrtoni paragrafin 4 të kapitullit 14.
◼ Nëse revista që keni lënë flet për besueshmërinë e Biblës, mund të lini këtë pyetje pezull: «A është Bibla shkencërisht e saktë?» Pastaj, gjatë rivizitës, shqyrtoni paragrafin 8 të kapitullit 2.
4. Çfarë duhet të bëjmë nëse i zoti i shtëpisë nuk e pranon librin Çfarë mëson vërtet Bibla?
4 Në fund të çdo bisede, lini një pyetje pezull për vizitën tjetër. Kur studimi biblik të bëhet i qëndrueshëm, filloni ta shqyrtoni librin sistematikisht nga fillimi në fund. Po sikur i zoti i shtëpisë të mos e pranojë librin Çfarë mëson vërtet Bibla? Mund të vazhdoni t’i çoni revistat dhe të zhvilloni biseda biblike me të. Ndërsa rritni interesin e tij, me kalimin e kohës mund ta pranojë një studim biblik.
5. Pse duhet të përpiqemi të bëjmë më shumë sesa thjesht t’u lëmë revista njerëzve?
5 Revistat Kulla e Rojës dhe Zgjohuni! mund ta nxisin një person të studiojë se çfarë mëson vërtet Bibla. Prandaj, bëni përpjekje të veçanta për të filluar studime biblike me ata që pranojnë revistat. Në këtë mënyrë, do t’u bindemi udhëzimeve të Jezuit për ‘të bërë dishepuj, duke i mësuar’.—Mat. 28:19, 20.