EBED-MELEKU

[shërbëtor i mbretit].

Eunuk etiopas nga shtëpia e mbretit Zedekia, i cili tregoi me veprimet e tij se e mbështeste plotësisht veprën e Jeremisë, profetit të Jehovait. Kur princat e Judës e akuzuan pa të drejtë Jereminë për kryengritje, Zedekia e dorëzoi profetin në duart e tyre. Ata e morën dhe e hodhën në sternën me llucë të Malkijahut në Oborrin e Rojës, që të vdiste urie. (Jr 38:4-6) Edhe pse ishte në rrezik për shkak të urrejtjes së egër që mbizotëronte ndaj Jeremisë dhe mesazhit të tij, me guxim Ebed-Meleku iu afrua në publik mbretit që ishte ulur te Porta e Beniaminit dhe ndërhyri duke i dalë në mbrojtje Jeremisë. Zedekia e pranoi kërkesën. Më pas, me urdhër të mbretit, Ebed-Meleku shkoi te sterna me 30 burra, zbriti me litarë lecka e copa pëlhure të vjetra që Jeremia t’i vinte nën sqetulla dhe ta nxirrnin nga sterna. (Jr 38:7-13) Ka të ngjarë që Zedekia e urdhëroi Ebed-Melekun të merrte me vete 30 burra, jo se kaq nevojiteshin për ta nxjerrë Jereminë nga sterna, por që t’ia dilnin mbanë edhe nëse princat ose priftërinjtë kundërviheshin. Për këtë vepër të mirë ndaj profetit të Perëndisë, Jehovai e siguroi Ebed-Melekun nëpërmjet Jeremisë se do t’i siguronte një rrugëdalje që të mbijetonte gjatë rrethimit babilonas.​—Jr 39:15-18; shih EUNUK.