KAPITULLI 28

Si të mos bie në kurthin e homoseksualizmit?

«Gjatë adoleshencës bëja luftë me veten ngaqë më tërhiqnin djemtë e tjerë. Brenda meje e dija se këto mendime nuk ishin normale.»​—Olefi.

«U puthëm një a dy herë me shoqen time. Por, ngaqë ende më pëlqenin djemtë, thosha me vete se mbase isha biseksuale.»​—Sara.

ZOR se mund të mohohet që për homoseksualizmin flitet më hapur sot se 30 a 40 vjet më parë. Dhe guxo të thuash se je kundër tij! Ka të ngjarë të të bombardojnë me kritika. Ami 16-vjeçare thotë: «Një vajzë më tha se duhet të kisha paragjykime për racat e tjera, përderisa paragjykoja edhe homoseksualizmin!»

Qëndrimi tolerant i këtyre kohëve i ka nxitur disa të rinj që të eksperimentojnë me marrëdhëniet me individë të të njëjtit seks. «Shumë vajza në shkollën time thonë se janë lezbike, biseksuale ose ‘bi-kurioze’»,—thotë Beki, një vajzë 15-vjeçare. Krista, një vajzë tjetër 18-vjeçare, thotë se edhe në shkollën e saj është njësoj. «Dy shoqe klase më kanë propozuar,—thotë ajo.—Njëra më shkroi një pusullë ku më pyeste nëse kisha qejf ta provoja se si ishte të shkoje me një vajzë.»

Tani që marrëdhëniet homoseksuale reklamohen kaq hapur, ndoshta pyet veten: «A është vërtet e gabuar të jesh homoseksual? Ç’të bëj nëse më tërheq dikush i seksit tim? A do të thotë kjo se jam gei?»

Çfarë mendon Perëndia për homoseksualizmin?

Sot, shumë njerëz, madje edhe disa klerikë, e marrin lehtë çështjen e homoseksualizmit. Megjithatë, Bibla, Fjala e Perëndisë, është shumë e qartë në këtë pikë. Ajo na thotë se Perëndia Jehova krijoi mashkullin dhe femrën, dhe se qëllimi i tij ishte që dëshirat seksuale të plotësoheshin vetëm brenda lidhjes martesore mes një burri dhe një gruaje. (Zanafilla 1:27, 28; 2:24) Prandaj, nuk është çudi që Bibla i dënon marrëdhëniet homoseksuale.​—Romakëve 1:26, 27.

Disa do të thoshin se Biblës i ka ikur koha. Por, pse mendon se disa e kanë në majë të gjuhës këtë shprehje? Mos ndoshta sepse mendimi i tyre bie ndesh me atë të Biblës? Shumë e hedhin poshtë Fjalën e Perëndisë, ngaqë ajo kundërshton atë që ata duan të besojnë. Kjo pikëpamje është e cunguar dhe ne duhet ta kapërcejmë këtë mendjengushtësi.

Por ç’të bësh nëse të tërheq dikush i të njëjtit seks? A do të thotë kjo medoemos se je homoseksual? Jo. Ki parasysh se je në «lulen e rinisë», në kohën kur, do apo s’do ti, lindin dëshirat seksuale. (1 Korintasve 7:36) Nëse ndonjëherë të tërheq i njëjti seks, të jesh i sigurt se kjo s’do të thotë se je gei. Prirje të tilla zakonisht veniten me kalimin e kohës. Ndërkohë duhet të frenosh veten që të mos përfshihesh në praktika homoseksuale. Si?

Lutu. Përgjëroju Jehovait siç bëri Davidi: «Më heto fund e krye, o Perëndi, dhe njihe zemrën time. Më shqyrto dhe njih mendimet që më turbullojnë. Shih nëse ka tek unë ndonjë udhë që do të më sillte dhembje, dhe më drejto për në udhën e përjetësisë.» (Psalmi 139:23, 24) Jehovai mund të të japë forcë me një paqe që «kapërcen çdo mendim». Kjo paqe mund ‘të të ruajë zemrën dhe fuqitë mendore’ dhe të të japë ‘fuqi përtej asaj që është normale’, që të frenohesh e të mos praktikosh dëshira të gabuara.​—Filipianëve 4:6, 7; 2 Korintasve 4:7.

Mbushe mendjen me mendime të pastra. (Filipianëve 4:8) Lexoje Biblën çdo ditë. Ajo ka fuqi të ndikojë për mirë në mendjen dhe zemrën tënde, dhe këtë mos e nënvlerëso asnjëherë. (Hebrenjve 4:12) Një djalë i ri me emrin Xhejson, thotë: «Bibla, veçanërisht shkrime të tilla si 1 Korintasve 6:9, 10 dhe Efesianëve 5:3, ka pasur një ndikim të fuqishëm tek unë. I lexoj këto shkrime sa herë më vijnë dëshira të gabuara.»

Qëndroji larg pornografisë dhe gjithçkaje që nxit homoseksualizmin. (Kolosianëve 3:5) Rriji larg çdo gjëje që ngjall dëshira imorale. Këtu bën pjesë pornografia, disa filma dhe programe televizive, e ndoshta edhe revista të modës ose të bodybuilding-ut, që paraqesin modele gati të zhveshura. Këmbeji mendimet negative me mendime pozitive. «Sa herë kam impulse homoseksuale, meditoj për shkrimin tim të preferuar»,—thotë një adoleshent.

Dihet, disa thonë se gjithë kjo luftë s’ka kuptim, se thjesht duhet «ta presësh krahëhapur prirjen tënde seksuale» dhe «ta pranosh veten siç je». Por Bibla thotë se mund të bësh më shumë se kaq. Për shembull, në Bibël tregohet se disa nga të krishterët e parë që kishin qenë homoseksualë, më pas ndryshuan. (1 Korintasve 6:9-11) Edhe ti mund ta fitosh këtë betejë, paçka se për momentin mund të jetë vetëm në kokën tënde.

Po nëse tërheqja ndaj të njëjtit seks vazhdon? Mos u dorëzo! Jehovai i dënon aktet homoseksuale. Prandaj, një njeri që lufton me dëshirën për të shkuar me të njëjtin seks, vihet përballë një synimi të arritshëm: ai ose ajo ka në dorë të mos veprojë sipas këtyre dëshirave.

Të bëjmë një shembull: një njeri mund të jetë tip që «nxehet kollaj». (Proverbat 29:22) Në të kaluarën mund të mos e ketë frenuar veten. Megjithatë, nga studimi i Biblës kupton se duhet të kultivojë vetëkontrollin. A do të thotë kjo se përbrenda s’do të ndiejë më kurrë zemërim? Jo. Sidoqoftë, duke ditur çfarë thotë Bibla për zemërimin e pakontrolluar, bën të pamundurën të mos i dorëzohet kësaj ndjenje.

Njësoj është edhe me atë që e tërheq i njëjti seks, por që tani ka mësuar çfarë thotë Bibla për praktikat homoseksuale. Me raste, prapë mund të nxjerrë kokë ndonjë dëshirë e gabuar. Megjithatë, duke pasur pikëpamjen e Jehovait për homoseksualizmin, mund të gjejë forcë për t’i rezistuar kësaj dëshire.

Mos u dorëzo!

Nëse lufton me dëshirat homoseksuale, ndoshta ndihesh si një djalë që tha: «Çfarë s’kam bërë për ta hequr këtë prirje. I jam lutur Jehovait për ndihmë. Kam lexuar Biblën. Kam dëgjuar fjalime për këtë temë. S’di ç’të bëj tjetër.»

Nëse e sheh veten në këtë situatë, kuptohet që ke një betejë të vërtetë përpara. S’ka kurë të lehtë. Megjithatë, kush dëshiron t’i pëlqejë Perëndisë, duhet të përputhet me normat e tij morale dhe të mos ndotet me sjellje imorale, sado e vështirë qoftë. Mos harro asnjëherë se Perëndia e kupton çfarë beteje ke në zemër dhe se ai tregon dhembshuri për ata që i shërbejnë.a (1 Gjonit 3:19, 20) Kur u bindesh urdhërimeve të Perëndisë, u hap rrugën bekimeve të tij. Në fakt, nëse zbaton urdhërimet e Perëndisë, «merr shpërblim të madh». (Psalmi 19:11) Madje, që tani në këtë botë të trazuar, do të bësh jetën më të mirë.

Pra, mbështetu te Perëndia dhe rezistoju këtyre dëshirave të gabuara. (Galatasve 6:9) Përpiqu ‘të urresh thellësisht atë që është e ligë’ dhe ‘kapu fort pas asaj që është e mirë’. (Romakëve 12:9) Po të përpiqesh për njëfarë kohe, ka shumë mundësi t’i shohësh këto dëshira të zbehen. Por, mbi të gjitha, duke qëndruar larg praktikave homoseksuale, do të kesh shpresën për të jetuar përgjithmonë në botën e re e të drejtë të Perëndisë.

[Shënimi]

SHKRIMI KYÇ

«Më shqyrto dhe njih mendimet që më turbullojnë. Shih nëse ka tek unë ndonjë udhë që do të më sillte dhembje.»​—Psalmi 139:23, 24.

KËSHILLË

Për një pikëpamje të shëndoshë për tiparet e vërteta të një mashkulli, shqyrto shembullin e Jezuit. (1 Pjetrit 2:21) Ai ishte modeli i përsosur ku burrëria ndërthurej me butësinë.

A E DIJE . . . ?

Megjithëse mund të mos i kontrollosh plotësisht dëshirat, mund të kontrollosh veprimet. E ke ti në dorë nëse do t’i plotësosh apo jo dëshirat e gabuara.

HAPAT QË DUA TË BËJ . . .

Nëse dikush më pyet pse Bibla e dënon homoseksualizmin, do të them: ․․․․․

Nëse dikush thotë se pikëpamja e Biblës është mendjengushtë, do të arsyetoj me të duke thënë: ․․․․․

Pyetje që dua t’u bëj prindërve: ․․․․․

ÇFARË MENDON?

● Pse Perëndia e dënon homoseksualizmin?

● Ç’hapa praktikë mund të marrësh që të mosbiesh në kurthin e homoseksualizmit?

● Nëse ndjek pikëpamjen e Perëndisë për homoseksualizmin, a është kjo homofobi (domethënë, një urrejtje ose një ndjenjë e fortë mospëlqimi ndaj homoseksualëve)?

[Diçitura në faqen 236]

«Pikëpamja e shtrembëruar e botës ndikoi në mendjen time dhe m’i pështjelloi më shumë shijet e mia seksuale. Tani i rri larg çdo gjëje ose çdokujt që nxit homoseksualizmin.»​—Ana

[Figura në faqen 233]

Të gjithë të rinjtë janë para një vendimi: të ndjekin normat e ulëta të botës për prirjet seksuale ose të ndjekin moralin e lartë të Fjalës së Perëndisë