Pasi Adami dhe Eva dolën nga kopshti i Edenit, patën shumë fëmijë. Djali i parë, Kaini, u bë bujk, kurse djali i dytë, Abeli, u bë bari.

Një ditë, Kaini dhe Abeli i bënë blatime Jehovait. A e di çfarë është një blatim? Është një dhuratë për Perëndinë. Jehovai ishte i kënaqur me blatimin e Abelit, por jo me atë të Kainit. Kjo e zemëroi shumë Kainin. Jehovai e paralajmëroi Kainin se zemërimi mund ta shtynte të bënte diçka të keqe. Por ai nuk dëgjoi.

Në vend të kësaj, Kaini i tha Abelit: ‘Hajde me mua në fushë.’ Kur ishin vetëm atje, Kaini e sulmoi të vëllanë dhe e vrau. Çfarë do të bënte Jehovai për këtë? Jehovai e dënoi Kainin duke e dërguar larg familjes së tij. Kainit nuk do t’i lejohej të kthehej prapë.

Çfarë mësimi nxjerrim? Mund të nxehemi nëse gjërat nuk shkojnë siç duam. Nëse e ndiejmë se zemërimi po rritet brenda nesh—ose nëse të tjerët na paralajmërojnë sepse e vërejnë zemërimin tonë—menjëherë duhet t’i ndreqim dhe t’i kontrollojmë ndjenjat para se ato të na kontrollojnë ne.

Ngaqë Abeli e donte Jehovain dhe bëri çfarë ishte e drejtë, Jehovai e kujton atë gjithmonë. Perëndia do ta sjellë sërish në jetë Abelin kur ta bëjë tokën parajsë.

Me kalimin e kohës, toka u mbush me njerëz. Shumica ishin të këqij. Madje edhe disa engjëj në qiell u bënë të këqij. Ata ikën nga shtëpia e tyre në qiell dhe erdhën në tokë. A e di pse vepruan kështu? Që të merrnin trupa njerëzorë për t’u martuar me gra.

Engjëjt patën djem me gratë që morën. Këta djem, kur u rritën, u bënë shumë të fortë dhe bullizonin të tjerët. Ata u bënin keq atyre. Jehovai s’mund të lejonte që gjërat të vazhdonin ashtu. Prandaj vendosi që t’i shkatërronte njerëzit e ligj me një përmbytje.

Por ja që një burrë ishte ndryshe nga të tjerët. Ai e donte Jehovain. E quanin Noe. Ai dhe gruaja e tij kishin tre djem: Semin, Kamin dhe Jafetin, e secili kishte gruan e vet. Jehovai i tha Noesë të ndërtonte një arkë të madhe, që ai dhe familja e tij t’i shpëtonin Përmbytjes. Arka ishte një kuti gjigante prej druri që mund të pluskonte mbi ujë. Po ashtu, Jehovai i tha Noesë të fuste shumë kafshë në arkë që edhe ato të shpëtonin.

Menjëherë, Noeja filloi të ndërtonte arkën. Atij dhe familjes së tij iu deshën gati 50 vjet për ta mbaruar. E ndërtuan arkën tamam siç u tha Jehovai. Gjatë asaj kohe, Noeja i paralajmëroi njerëzit për Përmbytjen. Por asnjë s’e dëgjoi.

Më në fund, erdhi koha të hynin në arkë. Le të zbulojmë çfarë ndodhi më pas.