Një vizitë në Kirgizistan

RRETHUAR nga male të larta, majat e të cilave mbulohen me borë, Kirgizistani gjendet në Azinë Qendrore dhe kufizohet me Kazakistanin, Uzbekistanin, Taxhikistanin dhe Kinën. Malet zënë gati 90 për qind të vendit. Në Kirgizistan ndodhet maja më e lartë e vargmalit Tian-Shan, 7.439 metra mbi nivelin e detit. Pyjet mbulojnë rreth 4 për qind të sipërfaqes së tij tokësore. Ndaj, ia vlen të përmendet se një nga pyjet më të mëdha natyrore të arrave në planet është në Kirgizistan.

Populli kirgiz spikat për mikpritjen dhe respektin. Atje e kanë zakon t’i drejtohen me «ju» një më të rrituri e t’i lirojnë vendin në një mjet të transportit publik, si dhe ta nderojnë duke i ofruar vendin më të mirë në tavolinë.

Në përgjithësi, familjet kanë tre fëmijë ose më shumë. Zakonisht, çuni më i vogël rri me prindërit, madje edhe pas martese, dhe kujdeset për ta ndërsa plaken.

Që të vogla, gocat mësojnë si të jenë shtëpiake të mira. Nga mesi i adoleshencës janë goxha të zonja që të mbajnë një familje. Për nusen përgatitet një pajë që përfshin shtresa, lloj-lloj rrobash dhe një qilim të bërë me dorë. Dhëndri paguan çmimin e nuses në pará dhe gjë të gjallë.

Në gëzime dhe funerale therin një dele ose kalë. Ndahet në pjesë dhe secila prej tyre mendohet se kujt t’i jepet. Çdo mysafiri i takon racioni sipas moshës a pozitës, pra sërish respekti është elementi kyç i kësaj tradite. Pastaj shërbehet beshbarmak, gatim tradicional që hahet me duar.