Bibla në gjeorgjisht

GJEORGJISHTJA ishte një nga gjuhët e para në të cilat u përkthye Bibla, përkrah atyre armene, koptike, latine, siriake e të tjera. Dorëshkrime të hershme të Ungjijve, letrat e Pavlit dhe Psalmet në gjeorgjisht datojnë në mesin e shekullit të pestë të erës sonë, madje edhe më herët. Në shekujt vijues Bibla u përkthye e u kopjua gjithnjë e më shumë dhe si rezultat pati disa versione të saj.a

Bibla ndikoi thellë në letërsinë dhe në vlerat kulturore të popullit gjeorgjian. Për shembull, historia tragjike e mbretëreshës Shushanikë, ndoshta e shkruar në fund të shekullit të pestë, u referohet drejtpërdrejt ose tërthorazi pjesëve nga Bibla. Në poemën e tij epike Vepkhis tqaosani (Kalorësi me lëkurë pantere), të shkruar rreth vitit 1220, poeti Shota Rustaveli iu referua vlerave morale të krishtere. Ai shkroi për miqësinë, bujarinë dhe dashurinë për të panjohurin, vlera që ende shihen si ideale morale për popullin gjeorgjian.