2 සාමුවෙල්

14 අබ්සලොම්ව නැවත දැකගන්න රජු මහත් ආශාවකින්+ සිටින බව ෂෙරුයියාගේ පුත්‍රයා වූ+ යෝවාබ්+ තේරුම්ගත්තේය. 2 එබැවින් ඔහු තෙකෝවා නුවරේ+ සිටි බුද්ධිමත් ස්ත්‍රියකව+ තමා වෙතට ගෙන්වා ඇයට මෙසේ කීවේය. “ඔබේ ඇඟේ තෙල් ආලේප කරගන්නේ නැතුව+ වියෝ දුකෙන් සිටින කෙනෙක් වගේ ඇඳගන්න. ඔබ දවස් ගණනාවක් වියෝ දුකෙන් සිටින කෙනෙක් වගේ රඟපාමින්+ 3 රජ ඉදිරියට යන්න. ඔහු ඉදිරියේ පැවසිය යුත්තේ මොනවාද කියලා මම දැන් ඔබට කියලා දෙන්නම්.” පසුව යෝවාබ්, රජු ඉදිරියේ කිව යුතු දේ ඇයට කියා දුන්නේය.+

4 තෙකෝවා සිට පැමිණි ඒ ස්ත්‍රිය රජු ළඟට ගොස් ඔහු ඉදිරියේ බිම වැටී+ ඔහුට මෙසේ කීවාය. “අනේ රජතුමනි, මාව බේරගන්න!”+ 5 එවිට රජ, “ඇයි ඔබට මොනවද වුණේ” කියා ඇගෙන් ඇසුවේය. ඇයද, “මම වැන්දඹුවක්.+ 6 ඔබේ දාසිය වන මට පුත්‍රයන් දෙදෙනෙක් සිටියා. දවසක් කෙතේදී ඒ දෙන්නා රණ්ඩු කරමින් පොර ඇල්ලුවා.+ රණ්ඩුව බේරන්න කවුරුත් හිටියේ නැහැ.+ ටික වෙලාවකට පස්සේ එක පුත්‍රයෙක් අනික් පුත්‍රයාව මරලා දැම්මා. 7 ඊටපස්සේ මගේ පවුලේ සියලුදෙනාම මට බැණවදිමින් මෙහෙම කිව්වා. ‘ඔබේ පුතා ඔහුගේම සහෝදරයාව මරලා දැම්මා.+ ඒ නිසා දැන් ඔහුව අපිට භාර දෙන්න. ඔහුගේ සහෝදරයාගේ ජීවිතය වෙනුවෙන් ඔහු වන්දි ගෙවිය යුතුයි.+ ඔබේ පවුලේ නම ගෙන යන්න ඉතුරු වෙලා ඉන්නේ ඔහු විතරක් වුණත් අපිට ඔහුව මරලා දාන්න සිද්ධ වෙනවා.’ අනේ රජතුමනි, අපේ පවුලේ නම ගෙන යන්න ඉන්න එකම පුත්‍රයාවත් ඔවුන් මරලා දාන්න හදනවා. එහෙමවුණොත් මගේ පුරුෂයාගේ නම ගෙන යන්නේ කවුද?”+

8 එවිට රජ, “ඔබ දැන් ගෙදර යන්න. ඔබට සාධාරණය ඉටු කර දෙන බවට මම වගබලා ගන්නම්”+ කියා ඇයට කීවේය. 9 එවිට ඒ ස්ත්‍රිය රජුට මෙසේ කීවාය. “අනේ මගේ ස්වාමීනි, මගේ පුත්‍රයාගේ වරදට මමයි මගේ පියාගේ ගෙයි වැසියනුයි වන්දි ගෙවන්නම්.+ එවිට ඔබත් ඔබේ රාජ්‍යයත් ඒ වරදින් නිදහස් වෙයි.” 10 එවිට රජ, “මේ කාරණය ගැන නැවත කවුරු හරි ඔබට කරදර කළොත් ඔහුව මා ළඟට රැගෙන එන්න. ඔබට ආයෙත් කරදර කරන්න මම ඔහුට ඉඩ දෙන්නේ නැහැ” කියා ඇයට කීවේය. 11 නමුත් ඇය ඔහුට මෙසේ කීවාය. “අනේ රජතුමනි, ඔබේ දෙවි වන යෙහෝවාව සිහි කරන්න.+ මගේ පුත්‍රයා කළ දේ නිසා ඔහුව මරා දැමීමට අයිතිය ඇති තැනැත්තාට+ මගේ පවුලට තවත් කරදර කරන්න ඉඩ දෙන්න එපා. අනේ, ඉතුරු වී සිටින මගේ එකම පුත්‍රයාව මරන්න ඔහුට ඉඩ දෙන්න එපා.” එවිට රජ ඇයට මෙසේ කීවේය. “ඔබේ පුත්‍රයාගේ එක කෙස්ගහක්වත්+ බිමට වැටෙන්න මම ඉඩ දෙන්නේ නැහැ කියලා ජීවමාන දෙවි වන යෙහෝවාගේ නමින් දිවුරා ඔබට පොරොන්දු වෙනවා.”+ 12 පසුව ඒ ස්ත්‍රිය, “රජතුමනි, ඔබේ දාසිය+ වන මට තව එක දෙයක් කියන්න අවසර දෙන්න”+ කියා පැවසුවාය. රජද, “කියන්න”+ යයි ඇයට කීවේය.

13 එවිට ඇය ඔහුට මෙසේ කීවාය. “රජතුමනි, දෙවිගේ සෙනඟට+ හානියක් වන අයුරින් ඔබ ක්‍රියා කරන්නේ ඇයි?+ ඔබ මට කියූ දෙයින් ඔබත් වරදකරුවෙක් කියලා පැහැදිලියි.+ මන්ද ඔබ ඔබේම පුත්‍රයාව රටෙන් පන්නා දැමුවා. නමුත් ඔහුව නැවත ගෙන්වාගත්තේ නැහැ.+ 14 බිමට වත් කළ වතුර කිසිවිටක නැවත එකතු කරගන්න බැහැ. ඒ වගේ තමයි අපේ ජීවිතත්. අපි හැමෝම යම් දවසක මැරෙනවා.+ ඒක වෙනස් කරන්න කාටවත් බැහැ. නමුත් දෙවි කැමති හැමෝම ජීවත් වෙනවා දකින්නයි.+ ඔහු බලන්නේ පන්නා දැමූ කෙනෙකුව පවා කොහොමහරි නැවත ගෙන්වාගන්නයි. 15 මගේ ස්වාමීනි, සෙනඟ කියූ දේවල් නිසා මට මහත් බියක් දැනුණා. ඔබ ඉදිරියට ඇවිත් මේ කාරණය ගැන කතා කරන්න තීරණය කළේ ඒ නිසයි. ‘රජුට මේ කාරණය ගැනත් කතා කරන්න ඕනේ. සමහරවිට ඔහුගේ දාසිය කියන දේට ඔහු සවන් දෙයි1. 16 මාවත් මට ඉතුරුව සිටින මගේ එකම පුත්‍රයාවත් විනාශ කරලා දෙවිගෙන් අපිට ලැබුණු උරුමය ගන්න හදන කෙනාගෙන් අපිව ගලවගන්න1+ කියා මා කළ ඉල්ලීමට රජු සවන් දුන් නිසා මේ දේටත් සවන් දෙයි’ කියලා ඔබේ දාසිය වන මම හිතුවා. 17 මගේ ස්වාමීනි, සැබෑ දෙවිගේ දූතයෙක් වගේ+ හොඳ නරක විනිශ්චය කරන්න+ ඔබට පුළුවන්. ඒ නිසා, ‘ඔබ අපිට සැනසිලිදායක වචන කතා කරයි’ කියලත් මම හිතුවා. රජතුමනි, ඔබේ දෙවි වන යෙහෝවා ඔබට උපකාර කරයි කියලා මම ප්‍රාර්ථනා කරනවා.”

18 එවිට රජ, “කිසිම දෙයක් හංගන්නේ නැතුව මම අහන දේට උත්තර දෙන්න”+ කියා ඇයට කීවේය. ස්ත්‍රියද, “එසේය මගේ ස්වාමීනි” කියා පිළිතුරු දුන්නාය. 19 එවිට රජ, “ඔබට මේ දේ කරන්න කිව්වේ යෝවාබ්+ නේද”+ කියා ඇගෙන් ඇසුවේය. ඇයද, “අනේ, මගේ ස්වාමීන් වන රජ්ජුරුවනි, ඔබ හිතූ දේ හරි. මම ඔබ ඉදිරියේ දිවුරා කියන මේ දේ සත්‍යයක්.+ ඔබේ සේවකයා වන යෝවාබ් තමයි මට මේ දේ කරන්න කිව්වේ. ඔබ ඉදිරියේ පැවසිය යුත්තේ මොනවාද කියලත් ඔහු මට කියා දුන්නා.+ 20 ඔබේ සේවකයා වන යෝවාබ් මේ දේ කළේ ඔබේ හිත වෙනස් කරන්නයි. එහෙත් දේශයේ සිදු වන කිසිම දෙයක් ඔබෙන් හංගන්න බැහැ. මගේ ස්වාමීනි, සැබෑ දෙවිගේ දූතයෙක් වගේ+ ඔබත් ප්‍රඥාවන්තයි.”

21 පසුව රජ යෝවාබ්ට මෙසේ කීවේය. “ඔබ කියූ දේ කරන්න මම කැමතියි.+ දැන් ගිහින් අබ්සලොම්ව එක්කගෙන එන්න.”+ 22 එය අසා යෝවාබ්, රජු ඉදිරියේ දණින් වැටී පොළොව දෙසට හිස නමා, රජුට ආශීර්වාද කරමින්+ මෙසේ කීවේය. “මගේ ස්වාමීනි, මගේ ඉල්ලීම ඉටු කරන්න ඔබ කැමති වුණා. රජතුමනි, මට ඔබෙන් කරුණාව ලැබිලා තියෙන බව මම අද එයින් දැනගත්තා.”+ 23 පසුව යෝවාබ් ගෙෂූර්+ වෙත ගොස් අබ්සලොම්ව නැවත යෙරුසලමට+ රැගෙන ආවේය. 24 නමුත් රජ යෝවාබ්ට මෙසේ කීවේය. “අබ්සලොම්ට මාව බලන්න එන්න එපා කියන්න.+ ඔහුට ඔහුගේම ගෙදරට යන්න කියන්න.” එබැවින් අබ්සලොම්, රජු වෙත නොගොස් තම නිවසට ගියේය.

25 ඊශ්‍රායෙල් දේශය පුරාම අබ්සලොම් තරම් කඩවසම් පුද්ගලයෙකු තවත් නොවීය.+ ඔහුගේ පෙනුමේ කිසි අඩුපාඩුවක් තිබුණේ නැත. ඔහුගේ පෙනුම නිසා ඔහුව බොහෝ සෙයින් වර්ණනා කරනු ලැබීය. 26 ඔහුගේ හිසකෙස් ප්‍රමාණය මොන තරම්ද+ කිවහොත් සෑම අවුරුද්දකම අවසානයේදී ඔහු තම හිසකෙස් කැපුවේය. කැපූ හිසකෙස් රජමාලිගාවේ තිබූ ෂෙකෙලයට* අනුව මැන බලද්දී එහි බර ෂෙකෙල් දෙසියයක් විය. 27 අබ්සලොම්ට දාව පුත්තු තුන්දෙනෙක්ද+ එක් දියණියක්ද උපන්නෝය. ඔහුගේ දියණියගේ නම තාමර්ය. ඇය ඉතා රූමත් කාන්තාවකි.+

28 අබ්සලොම් අවුරුදු දෙකක්ම යෙරුසලමෙහි වාසය කළේය. නමුත් ඒ මුළු කාලයේදීම ඔහු රජුව දුටුවේ නැත.+ 29 පසුව අබ්සලොම් තමාව හමු වීමට එන ලෙස යෝවාබ්ට පණිවිඩයක් යැව්වේය. ඔහු එසේ කළේ යෝවාබ්ව රජු ළඟට යැවීමේ අදහසින්ය. නමුත් යෝවාබ් ඔහු වෙතට ආවේ නැත. එබැවින් ඔහු නැවත වරක් යෝවාබ්ට පණිවිඩයක් යැව්වේය. ඒ වතාවේදීවත් යෝවාබ් ආවේ නැත. 30 එබැවින් අබ්සලොම් තම සේවකයන්ට මෙසේ අණ කළේය. “මගේ ඉඩම ළඟ තියෙන යෝවාබ්ගේ බාර්ලි කෙතට ගිනි තියන්න.”+ අබ්සලොම්ගේ සේවකයෝද ඔහු අණ කළ ලෙසම කළෝය.+ 31 ඉන්පසු යෝවාබ් අබ්සලොම්ගේ නිවසට පැමිණ ඔහුගෙන් මෙසේ ඇසුවේය. “ඔබේ සේවකයන් මගේ බාර්ලි කෙතට ගිනි තිබ්බේ ඇයි?” 32 එවිට අබ්සලොම්, “මාව හමු වෙන්න මෙහෙට එන්න කියලා මම ඔබට පණිවිඩ එව්වේ, මං වෙනුවෙන් ඔබ රජු ඉදිරියට ගිහින් මේ දේ රජුට දැන්වීමටයි. ‘මාව ගෙෂූර් ඉඳන් ගෙන්නගත්තේ ඇයි?+ මම එහෙට වෙලාම හිටියා නම් මීට වඩා හොඳයි. දැන් ඔබ ඉදිරියට එන්න මට අවසර දෙන්න. මම වරදක් කරලා තියෙනවා නම්+ ඔබම මාව මරලා දාන්න.’”

33 පසුව යෝවාබ්, රජු ඉදිරියට ගොස් අබ්සලොම් කී දේ ඔහුට පැවසුවේය. එවිට අබ්සලොම්ව රජු ඉදිරියට කැඳවනු ලැබීය. අබ්සලොම් දණින් වැටී පොළොව දෙසට හිස නමා රජුට ආචාර කළේය. ඉන්පසු රජ අබ්සලොම්ව සිප වැලඳගත්තේය.+