2 සාමුවෙල්

17 පසුව අහිතොෆෙල්, අබ්සලොම්ට මෙසේ කීවේය. “අද රෑම මිනිස්සු දොළොස්දහසක් සමඟ දාවිත් පසුපස ලුහුබැඳගෙන යන්න මට අවසර දෙන්න.+ 2 රජ වෙහෙසට පත්ව දුර්වලව ඉන්න කොට+ මම ඔහු ඉන්න තැනට කඩාපැනලා ඔහුව භය ගන්වන්නම්. එතකොට ඔහු සමඟ ඉන්න මිනිස්සු එතැනින් පලා යයි. ඔහු තනි වුණාම මම ඔහුව මරලා දාන්නම්.+ 3 ඔහු සමඟ ගිය සෙනඟ මම ආපහු ඔබ ළඟට රැගෙන එන්නම්. ඔබ අල්ලගන්න හදන කෙනාව මරලා දැම්මොත් සෙනඟ නිකම්ම ඔබේ පැත්තට එයි. එතකොට මුළු සෙනඟ සමාදානයෙන් ජීවත් වෙයි.” 4 අබ්සලොම්ද ඊශ්‍රායෙල්හි සියලු වැඩිමහල්ලෝද අහිතොෆෙල් දුන් උපදෙස් ඉතා හොඳ බව පිළිගත්තෝය.+

5 එහෙත් අබ්සලොම්, “අර්කීවරයෙක් වන හූෂයිවත්+ මෙතැනට කැඳවන්න. මේ ගැන ඔහු මොනවද හිතන්නේ කියලා ඔහුගෙන් අහලා බලමු” කියා කීවේය. 6 හූෂයි අබ්සලොම් ඉදිරියට පැමිණි විට අබ්සලොම් ඔහුට මෙසේ කීවේය. “අහිතොෆෙල් අපිට දුන් උපදෙස් හොඳයිද කියලා කියන්න. ඔහු කියූ විදිහට අපි කරන්නද? නැත්නම් ඔබට හොඳයි කියලා හිතෙන වෙන විදිහක් තියෙනවද?” 7 එවිට හූෂයි අබ්සලොම්ට මෙසේ කීවේය. “අහිතොෆෙල් ඔබට දුන් උපදෙස් හොඳ නැහැ.”+

8 හූෂයි තවදුරටත් මෙසේ කීවේය. “ඔබ හොඳින්ම දන්නවා ඔබේ පියාත් ඔහු සමඟ ඉන්න අයත් කොච්චර බලවත්ද කියලා.+ අනික ඔවුන් ඉන්නේ හරියට පැටව් නැති වුණ වැලහින්නියක් වගෙයි.+ ඔබේ පියා ගොඩක් දක්ෂ සටන්කරුවෙක්+ කියලත් අමතක කරන්න එපා. ඔහු අද රෑ සෙනඟ සමඟ ඉන්න එකක් නැහැ. 9 ඔහු පර්වත අතරේ නැත්නම් වෙන කොහේ හරි හැංගිලා ඉන්නවා ඇති.+ ඔහු හැංගිලා ඉන්න තැනකින් ඇවිත් ඔබේ මිනිසුන්ට පහර දුන්නොත්, ‘අබ්සලොම්ගේ සෙනඟ පරාජය වෙලා’ කියලා කතාවක් පැතිරෙයි. 10 එතකොට ඔබේ සෙනඟ අතරේ සිංහයන් වගේ+ එඩිතරව ඉන්න අයත් අධෛර්යයට පත් වෙයි.+ මුළු ඊශ්‍රායෙල් සෙනඟම දන්නවා ඔබේ පියා කොච්චර දක්ෂ සටන්කරුවෙක්ද+ කියලා. ඔහු සමඟ සටනට දක්ෂ, එඩිතර මිනිසුන් ඉන්නවා.+ 11 දාන් ඉඳන් බෙයර්-ෂෙබා දක්වා+ මුහුදු වෙරළේ වැලි වගේ+ ඉන්න මුළු මහත් ඊශ්‍රායෙල් සෙනඟව ඔබ ළඟට රැස් කරගන්න. ඊටපස්සේ ඒ සෙනඟ සමඟ ඔබ සටනට යන්න.+ 12 අපි ඔහු හැංගිලා ඉන්න තැන හොයාගෙන යමු.+ ඊටපස්සේ පොළොවට පිනි+ වැටෙනවා වගේ අපි හැමෝම හෙමින් සැරේ ගිහින් ඔහුට පහර දෙමු. ඔවුන්ගෙන් එක් කෙනෙක්වත් ඉතුරු නොකර පහර දෙමු. 13 ඔහු නුවරක හැංගිලා හිටියොත් අපි මුළු ඊශ්‍රායෙල් සෙනඟ සමඟ එතැනට ගිහින් ගල් කැටයක්වත් ඉතුරු නොවෙන්න+ ඒ නුවර විනාශ කරලා දාමු. නුවරේ හැම දෙයක්ම කඹවලින් ඇදලා ගඟට වීසි කරමු.”

14 එය අසා අබ්සලොම්ද සියලු ඊශ්‍රායෙල් පුරුෂයෝද මෙසේ කීවෝය. “අහිතොෆෙල්ගේ උපදෙස්වලට වඩා අර්කීවරයෙක් වන හූෂයි දුන් උපදෙස් හොඳයි.”+ අහිතොෆෙල්ගේ උපදෙස් නැණවත් වුවත්+ එය අසාර්ථක වන බවට+ යෙහෝවා දෙවි කලින්ම නියම කර තිබිණ.+ යෙහෝවා දෙවි එසේ කළේ අබ්සලොම්ව විපතට පමුණුවන පිණිසය.+

15 පසුව හූෂයි, පූජකයන් වන සාදොක්ට+ හා අබියාතර්ට මෙසේ කීවේය. “අහිතොෆෙල්, අබ්සලොම්ට හා ඊශ්‍රායෙල්හි වැඩිමහල්ලන්ට මේ විදිහට තමයි උපදෙස් දුන්නේ. නමුත් මම අබ්සලොම්ට මේ විදිහට උපදෙස් දුන්නා. 16 දැන් ඉක්මනට දාවිත් රජුට මෙහෙම දන්වලා යවන්න.+ ‘අද රෑ පාළුකරයේ රැඳිලා ඉන්නේ නැතුව ගඟෙන් එගොඩ වෙලා යන්න.+ නැත්නම් මේ අය ඇවිත් ඔබවත් ඔබ සමඟ ඉන්න සියලුදෙනාවත් මරලා දායි.’”+

17 යොනාතාන්ට+ හා අහිමයාෂ්ට+ නුවරට ඇතුල් වීමට නොහැකි වූ නිසා ඔවුහු ඒන්-රොගෙල්+ අසලට වී පණිවිඩයක් ලැබෙන තෙක් බලා සිටියෝය. එවිට මෙහෙකාරියක් ඔවුන් සිටි තැනට පැමිණ ඔවුන්ට සියල්ල දැන්වූවාය. ඉන්පසු ඒ සියල්ල දාවිත් රජුට දන්වන පිණිස ඔවුහු පිටත්ව ගියෝය. 18 නමුත් තරුණයෙක් ඔවුන් දෙදෙනාව දැක ඒ ගැන අබ්සලොම්ට කීවේය. එබැවින් ඔවුහු ඉක්මන් කර බහුරීම් නම් ගම්මානයේ+ ජීවත් වූ මිනිසෙකුගේ නිවසට ආවෝය. ඔහුගේ ගෙයි මිදුලේ ළිඳක් තිබුණේය. ඔවුහු ළිඳට බැස සැඟවුණෝය. 19 ඒ මිනිසාගේ භාර්යාව ළිං කට වසා ඊට උඩින් කෙටූ ධාන්‍ය ඇතුරුවාය.+ ඔවුන් ළිඳ ඇතුළේ සැඟවී සිටින බව කිසිවෙක් දැන සිටියේ නැත. 20 පසුව අබ්සලොම්ගේ සේවකයෝ ඒ නිවසට පැමිණ ස්ත්‍රියගෙන් මෙසේ ඇසුවෝය. “අහිමයාෂ් හා යොනාතාන් කොහේද?” එවිට ඇය, “ඔවුන් මෙහේ ඉඳන් ගඟ පැත්තට ගියා”+ කියා කීවාය. අබ්සලොම්ගේ සේවකයන් ඔවුන්ව සෙවූ නමුත් ඔවුන්ව සම්බ වූයේ නැත.+ එබැවින් ඔවුහු හැරී නැවත යෙරුසලමට ගියෝය.

21 පසුව යොනාතාන් හා අහිමයාෂ් ළිඳෙන් පිටතට පැමිණ දාවිත් සිටින තැනට ගොස් ඔහුට සියල්ල දන්වා මෙසේ කීවෝය. “අහිතොෆෙල් ඒ විදිහට උපදෙස් දීලා තියෙන නිසා+ ඔබ ඉක්මන් කරලා ගඟෙන් එගොඩ වෙලා යන්න.” 22 එබැවින් දාවිත් රජ හා ඔහු සමඟ සිටි සෙනඟ විගස යොර්දාන් ගඟෙන් එගොඩ වීමට පටන්ගත්තෝය.+ උදෑසන වන විට ඔවුහු සියලුදෙනාම ගඟෙන් එගොඩ වී සිටියෝය.

23 තමා දුන් උපදෙස් පිළි නොගත්+ බව දුටු අහිතොෆෙල් බූරුවෙකුව ගමනට සූදානම් කරගෙන තම නුවර+ බලා පිටත් විය. ඔහු තම නිවසට පැමිණි පසු පවුලේ කාරණා සැලසුම් කළේය.+ ඉන්පසු ඔහු එල්ලී+ මැරුණේය.+ ඔහුගේ මුතුන්මිත්තන්ගේ සොහොන් ගෙයි ඔහුව තැන්පත් කරනු ලැබීය.+

24 පසුව දාවිත් රජ මහනායිම්+ වෙත පැමිණියේය. අබ්සලොම්ද සියලු ඊශ්‍රායෙල් පුරුෂයෝද යොර්දාන් ගඟෙන් එගොඩ වූවෝය. 25 අබ්සලොම්, යෝවාබ්+ වෙනුවට හමුදාපති ලෙස පත් කළේ අමාසාවය.+ අමාසාගේ පියා ඊශ්‍රායෙල් ජාතිකයෙකු වූ ඉත්රාය.+ අමාසාගේ මව නාහාෂ්ගේ දියණිය වන අබිගායිල්ය.+ ඇයට ෂෙරුයියා නම් වූ සහෝදරියක් සිටියාය. ෂෙරුයියා යෝවාබ්ගේ මවය. 26 අබ්සලොම් ඊශ්‍රායෙල් සෙනඟ සමඟ ගිලියද්හි+ කඳවුරු බැඳගත්තේය.

27 දාවිත් රජ මහනායිම් නුවරට පැමිණි විට අම්මොන්වරුන්ගේ+ නුවරක් වූ රබ්බා+ සිට පැමිණි නාහාෂ්ගේ පුත්‍රයා වන ෂෝබිද ලො-දේබාර්හි අමියෙල්ගේ පුත්‍රයා+ වන මාකීර්ද+ රොගේලීම් නුවරේ+ ගිලියද්වරයෙකු වන බාසිල්ලයිද+ ඔහුව හමු වීමට ආවෝය. 28 ඔවුහු ඇඳන්ද බේසම්ද මැටි භාජනද රැගෙන ආවෝය. ඔවුහු තිරිඟු, බාර්ලි, පිටි,+ බැදපු ධාන්‍ය,+ වියළි ධාන්‍ය, බෝංචි,+ පරිප්පු,+ 29 මීපැණි,+ වෙඬරු,*+ මුදවපු කිරි හා බැටළු මස්ද රැගෙන ආවෝය.+ ඔවුහුද, “පාළුකරයේ ඉන්න නිසා සෙනඟට හුඟක් මහන්සි ඇති. ඔවුන්ට බඩගිනි ඇති. තිබහත් ඇති” යයි කියමින් ඒවා දාවිත් රජුට හා ඔහු සමඟ සිටි සෙනඟට දුන්නෝය.+