2 ලේකම්
17 ආසා රජුගෙන් පසු රජකමට පත් වූයේ ඔහුගේ පුත් යෙහෝෂපාට්ය.+ ඔහු මුළු ඊශ්‍රායෙල් දේශය පුරා තම බලය තහවුරු කරගත්තේය. 2 මුළු යූදා දේශයේද තම පියා වූ ආසා එෆ්‍රායිම් දේශයෙන් අල්ලාගත් නුවරවලද ඔහු මුර කඳවුරු පිහිටෙව්වේය. ඔහු යූදා දේශයේ තිබූ පවුරුවලින් වට වූ සියලුම සුරක්ෂිත නුවරවලට හමුදා භට කණ්ඩායම්ද යැව්වේය.+ 3 යෙහෝෂපාට් ක්‍රියා කළේ තම මුතුන්මිත්තා වූ දාවිත් ක්‍රියා කළ ආකාරයටමය.+ ඔහු බාල් දෙවිවරුන්ට වන්දනාමාන නොකළ නිසා+ යෙහෝවා දෙවිගේ ආශීර්වාදය ඔහුට ලැබිණ.+ 4 ඔහු නිතරම තම පියා නමස්කාර කළ දෙවිගේ මඟ පෙන්වීම් පැතීමට උත්සාහ කළ කෙනෙකි.+ එමනිසා ඔහු ඊශ්‍රායෙල් රාජ්‍යයේ ක්‍රියාකලාපය අනුගමනය නොකර+ දෙවි ආඥා කළ ආකාරයට ක්‍රියා කළේය.+ 5 යෙහෝවා දෙවිගේ උපකාරය ඔහුට ලැබුණු නිසා ඔහුගේ බලය රාජ්‍යය පුරාම තව තවත් තහවුරු විය.+ යූදාහි සියලුම වැසියන් යෙහෝෂපාට් රජුට බොහෝ තෑගිබෝග ගෙනැවිත් දුන්නෝය.+ ඔහු ධනයෙන්ද තේජසින්ද වැජඹුණේය.+ 6 යෙහෝවා දෙවිගේ කැමැත්ත ඉටු කිරීමට නිර්භීතව ක්‍රියා කළ ඔහු,+ බොරු නමස්කාරය සඳහා භාවිත කළ පූජනීය ස්ථානද+ කුලුනුද+ යූදා දේශයෙන් ඉවත් කළේය.
7 ඔහුගේ පාලනයේ තුන්වන අවුරුද්දේදී ඔහු තමන් යටතේ සේවය කළ අධිපතීන් වූ බෙන්-හයිල්, ඔබදියා, සෙකරියා, නෙතනෙල් සහ මිකායා යන අයව කැඳෙව්වේය. ඔහු එසේ කළේ යූදාහි නුවරවල ඉගැන්වීම් කටයුතු සැලසුම් කිරීම සඳහාය. 8 ඒ අධිපතීන්ට අමතරව ඔහු ෂෙමායා, නෙතනියා, සෙබදියා, අසහෙල්, ෂෙමිරාමොත්, යෙහොනාතාන්, අදොනියා, ටොබීයා සහ ටොබ්-අදෝනියා යන ලෙවීවරුන්ද එලිෂාමා සහ යෙහෝරම් යන පූජකයන්ද කැඳෙව්වේය.+ 9 යූදා දේශයෙහි ඉගැන්වීම් කටයුතු ආරම්භ කළ ඔවුහු,+ ඒ සඳහා යෙහෝවා දෙවිගේ නීතිය සඳහන් ලියවිල්ල භාවිත කළෝය.+ ඔවුහු නුවරින් නුවරට ගොස් යූදා දේශයේ සියලුම නුවරවල සිටි සෙනඟට ඉගැන්වූහ.
10 යූදා දේශය අවට රාජ්‍යවල් යටතේ සිටි සෙනඟට යෙහෝවා දෙවි කෙරෙහි මහත් බියක් ඇති වී තිබිණ.+ ඒ නිසා ඔවුහු යෙහෝෂපාට් රජුට විරුද්ධව සටන් කිරීමට පැමිණියේ නැත.+ 11 පිලිස්තිවරු යෙහෝෂපාට් රජුට නොයෙකුත් තෑගිබෝගද+ කප්පම් ලෙස මුදල්ද දුන්නෝය.+ අරාබි ජාතිකයෝ+ ඔහුට බොහෝ සතුන් එනම්, බැටළුවන් හත්දහස් හත්සියයක්ද එළුවන් හත්දහස් හත්සියයක්ද ගෙනැවිත් දුන්නෝය.+
12 යෙහෝෂපාට් දිනෙන් දින බලවත් වූ අතර ඔහු ඉතා ශ්‍රේෂ්ඨ රජ කෙනෙක් බවට පත් විය.+ ඔහු යූදා දේශයෙහි සුරක්ෂිත නුවරවල්ද+ ගබඩා නුවරවල්ද+ ගොඩනැඟුවේය. 13 ඔහු යූදාහි නුවරවල බොහෝ ව්‍යාපෘතිද ආරම්භ කළේය. ඔහු එඩිතර හා බලසම්පන්න+ සෙබළුන්ව+ යෙරුසලමෙහි රැඳෙව්වේය. 14 ඔවුන්ගේ මුතුන්මිත්තන්ගේ පෙළපත්වලට අනුව ඔවුන්ව සංවිධානය කර තිබුණේ මෙලෙසය. යූදා ගෝත්‍රයේ දහසකින් යුත් කණ්ඩායම්වල ප්‍රධානියා වූයේ අද්නාහ්ය. ඔහු සමඟ එඩිතර හා බලසම්පන්න පුරුෂයෝ+ තුන්ලක්ෂයක් සිටියෝය. 15 අද්නාහ් යටතේ ප්‍රධානියෙක් සිටියේය. ඔහුගේ නම යෙහෝහානන්ය. ඔහු සමඟ පුරුෂයෝ දෙලක්ෂ අසූදහසක් සිටියෝය. 16 අද්නාහ් යටතේ තවත් ප්‍රධානියෙක් සිටියේය. ඔහු ෂික්රීගේ පුත් අමසියාය. යෙහෝවා දෙවි වෙනුවෙන් සේවය කිරීමට ඔහු කැමැත්තෙන්ම ඉදිරිපත් විය.+ ඔහු සමඟ එඩිතර හා බලසම්පන්න පුරුෂයෝ දෙලක්ෂයක් සිටියෝය. 17 බෙන්ජමින් ගෝත්‍රයට අයත්+ එඩිතර හා බලසම්පන්න පුරුෂයෙකු වූ එලියාදා සමඟ පලිස් හා දුනුවලින් සන්නද්ධ පුරුෂයෝ දෙලක්ෂයක් සිටියෝය.+ 18 ඔහු යටතේ ප්‍රධානියෙක් සිටියේය. ඔහුගේ නම යෙහොෂාබාද්ය. ඔහු සමඟ හමුදා සේවයට සන්නද්ධ පුරුෂයෝ එක්ලක්ෂ අසූදහසක් සිටියෝය. 19 යූදා දේශය පුරාම තිබූ සුරක්ෂිත නුවරවල+ රඳවා සිටි සෙබළුන්ට අමතරව මේ අයව යොදවා තිබුණේ රජුට සේවය කිරීම සඳහාය.