යෙරෙමියා

10 ඊශ්‍රායෙල් ජනයෙනි, යෙහෝවා දෙවි ඔබට විරුද්ධව පවසන මේ දේට සවන් දෙන්න. 2 යෙහෝවා දෙවි මෙසේ පවසයි. “වෙනත් ජාතීන් ක්‍රියා කරන ආකාරය ඔබ අනුගමනය නොකරන්න.+ අහසේ ලකුණු දැක ඔවුන් කැලඹුණත්+ ඔබ ඒවා දැක නොකැලඹෙන්න. 3 ජාතීන්ගේ සිරිත් විරිත්වල+ කිසිම හරයක් නැත. කැටයම්කරුවෙක් වනාන්තරයෙන් ගසක් කපාගෙන+ එයින් රූප නෙළයි.+ 4 ඒ රූපවලට රන් හා රිදී ආලේප කර ඒවා අලංකාර කරයි.+ ඉන්පසු මිටියෙන් ඇණ ගසා ඒවා නොසෙල්වෙන සේ සවි කරයි.+ 5 ඒ රූප, පිපිඤ්ඤා වත්තක සිටුවා තිබෙන කතා කිරීමට බැරි පඹයන් මෙනි.+ ඒවාට ඇවිදීමට නොහැකි නිසා ඒවා උසුලාගෙන යා යුතුයි.+ ඒවාට භය නොවන්න. මන්ද ඔබට අනතුරක් කිරීමට ඒවාට නොහැක. ඔබට යහපතක් කිරීමටවත් ඒවාට හැකියාවක් නැත.”+

6 යෙහෝවා දෙවියනි, ඔබට සමාන කිසිවෙක් නැත.+ බලවත්ම දෙවි ඔබය. ඔබේ නාමය ඉතා ශ්‍රේෂ්ඨය.+ 7 සියලු ජාතීන්ගේ රජ්ජුරුවනි,+ ඔබට ගරුබිය නොදක්වන්නේ කවුද?+ සෑම කෙනෙකුම ඔබට ගරුබිය දැක්වීම සුදුසුය. මන්ද ජාතීන් අතරේ ප්‍රඥාවන්තයන් සිටියත් රජවරුන් සිටියත් ඒ කිසිවෙකු කිසි ලෙසකින් ඔබට සම කළ නොහැක.+ 8 ඔවුහු සියලුදෙනා අඥානයෝය. මෝඩයෝය.+ ඔවුන්ගේ ලී රූප නිසා ඔවුහු නිෂ්ඵල දේ කිරීමට පෙලඹෙන්නෝය.+ 9 තර්ෂිෂ්හි සිට ගෙනා රිදී තහඩුවලින්ද+ උෆාස්හි සිට ගෙනා රන්වලින්ද+ ලෝහකරුවෝ සහ කැටයම්කරුවෝ ඒ රූප සාදති. ඉන්පසු ඒවාට නිල් පැහැති නූල් හා රත්නිල් පැහැගැන්වූ ලොම්වලින් සාදාගත් ඇඳුම් පළඳවති. මෙසේ දක්ෂ ශිල්පීහු ඒ රූප සාදති.+

10 නමුත් එකම සැබෑ දෙවි යෙහෝවාය.+ ජීවමාන දෙවිත් ඔහුය.+ සදාකාලයෙන් සදාකාලයටම රජුද ඔහුය.+ ඔහු උදහස් වූ විට මුළු පොළොවම දෙදරුම් කන්නේය.+ ඔහු තම උදහස වගුරුවන විට කිසි ජාතියකට එය දරාගැනීමට නොහැකි වන්නේය.+ 11 සෙනඟෙනි, ඒ ජාතීන්ට මෙසේ පවසන්න. “අහසත් පොළොවත් නොසෑදූ දෙවිවරු+ මේ පොළොවෙන් තුරන් වී යනු ඇත.+ එසේය, අහස්තලය යටින් ඔවුහු සම්පූර්ණයෙන්ම තුරන් වී යනු ඇත.” 12 දෙවි තම බලයෙන් මේ පොළොව සෑදුවේය.+ තම ප්‍රඥාවෙන් එය ස්ථිර ලෙස පිහිටෙව්වේය.+ ඔහු තම නුවණින් අහස්තලය ඇතිරිල්ලක් මෙන් දිගහැරියේය.+ 13 ඔහුගේ හඬට අහසේ ජලය ගිගුරුම් දෙයි.+ ඔහු පොළොවේ සතර දිගින් ජලය වාෂ්ප වී ඉහළට නැඟීමට සැලැස්වූවේය.+ වැසි වස්සවන පිණිස ඔහු අහසේ කවුළු සෑදුවේය.+ ඔහු තම ගබඩාවෙන් සුළං පිටතට ගෙනෙන්නේය.+

14 නමුත් මේවා තේරුම්ගැනීමට බැරි තරමටම මනුෂ්‍යයන් අඥාන ලෙස කටයුතු කර තිබේ.+ තමන් සෑදූ රූප නිසා ලෝහකරුවන් සියලුදෙනාම ලැජ්ජාවට පත් වන බව නියතයි.+ ඔවුන් සාදාගෙන තිබෙන රූපවලට කිසිම ජීවයක් නැත.+ ඒ සියල්ල පුහු දේවල්ය.+ 15 ඒවා නිෂ්ඵලය. ඒවා නිසා අත් වන්නේ නින්දාව පමණි.+ නියමිත කාලය පැමිණි විට ඒවා සියල්ල විනාශ කරනු ලැබේ.+

16 නමුත් යාකොබ්ගේ දෙවි+ ඒ රූපවලට වඩා බොහෝ සෙයින් වෙනස්ය. සෑම දෙයක්ම සෑදුවේ ඔහුය.+ ඔහුගේ උරුමයේ වටිනාම කොටස ඊශ්‍රායෙල් සෙනඟය.+ ස්වර්ගයේ සේනාවල අධිපති වන යෙහෝවා යන නාමයෙන් ඔහුව හඳුන්වයි.+

17 විපත්තියකට හසු වී සිටින තැනැත්තිය,+ ඔබේ බඩු මල්ල රැගෙන සූදානම් වන්න.+ 18 යෙහෝවා දෙවි මෙසේ පවසයි. “මම දේශයේ වැසියන්ව පන්නා දමන්නෙමි.+ ඔවුන් තේරුම්ගන්නා පිණිස මම ඔවුන් පිටට විපත්ති ගෙනෙන්නෙමි.”+

19 මට සිදු වූ විපතක මහත!+ මගේ තුවාලය සුව කිරීමට බැරි තරම් දරුණුය. මම මෙසේ කියාගත්තෙමි. “මෙය මගේ පීඩාවයි. මෙය දරාගැනීමට සිදු වන්නේ මටමයි.+ 20 මගේ කූඩාරම නැති නාස්ති කර ඇත. එහි ලණු සියල්ල දෙකට කඩා දමා ඇත.+ මගේ කූඩාරම දිගහැර එහි රෙදි අතුරන්නවත් කිසිවෙක් නැත. මගේ පුත්‍රයන්ට මාව අත්හැර යෑමට සිදු විය. මට නැවත ඔවුන්ව දකින්න ලැබෙන්නේ නැත.+ 21 එඬේරුන් කටයුතු කළේ අඥාන ලෙසය.+ ඔවුහු යෙහෝවා දෙවිගේ මඟ පෙන්වීම් පැතුවේ නැත.+ මනා අවබෝධයකින් ක්‍රියා කිරීමට ඔවුන්ට නොහැකි වුණේ ඒ නිසාය. ඔවුන්ගේ මුළු රැළ සෑම තැනකටම විසුරුවාහැර ඇත.”+

22 මේ පුවතට කන් දෙන්න. මහත් ඝෝෂාවක් උතුරු දෙසින් නික්මෙයි.+ එයින් යූදාහි නගරවල් හිවලුන් ලගින පාළු ප්‍රදේශයක් බවට පත් වෙයි.+

23 යෙහෝවා දෙවියනි, මිනිසෙකුට තමන් යා යුතු මාර්ගය කුමක්ද කියා තනිව තීරණය කිරීමට අයිතියක් නැති බව මම හොඳින් දනිමි. තම ජීවන ගමනේ පියවර තැබිය යුත්තේ කෙසේද කියා තනිව තීරණය කිරීමට ඔහුට හැකියාවක්ද නැත.+ 24 යෙහෝවා දෙවියනි, ඔබේ ධර්මිෂ්ඨ ප්‍රමිතිවලට අනුව මාව නිවැරදි කරන්න.+ නමුත් ඔබේ උදහසින්+ මාව විනාශ කර නොදමන්න.+ 25 ඔබව නොසලකාහැරිය+ ජාතීන් පිටටත්+ ඔබේ නාමය කියා කන්නලව් නොකළ ගෝත්‍ර පිටටත්+ ඔබේ උදහස වගුරුවන්න. ඔවුහු යාකොබ්ගේ පෙළපත සම්පූර්ණයෙන්ම නැති නාස්ති කළෝය.+ ඔහුව විනාශ කර දැමුවෝය.+ ඔහුගේ වාසස්ථානය පාළු කර දැමුවෝය.+