යෙරෙමියා

51 යෙහෝවා දෙවි මෙසේ පවසන්නේය. “මම බැබිලෝනියටත්+ ලෙබ්කේමායිහි* වැසියන්ටත් විරුද්ධව දරුණු සුළඟක් හමා ඒමට+ සලස්වන්නෙමි. 2 ධාන්‍ය පොළන්නාක් මෙන් බැබිලෝනියේ වැසියන්ව පොළා දේශය පාළු කර දැමීමට මම පිරිසක් යවන්නෙමි.+ බැබිලෝනිය පිටට විපත්ති ගෙනෙන දවසේදී ඇයට පහර දීමට ඔවුහු සෑම පැත්තකින්ම ඇයව වට කරගන්නෝය.+

3 “දුනුවායෙනි, ඔබේ දුනු සූදානම් කර නොගන්න.+ යුධ ඇඳුමින් සැරසී සිටින සෙබළුනි, සටන් කිරීම සඳහා නැඟී සිටීමට ඔබට නොහැක.

“ජනයෙනි, ඇගේ තරුණයන්ට කිසිම අනුකම්පාවක් නොපෙන්වන්න.+ ඇගේ මුළු යුධ හමුදාවම විනාශ කර දමන්න.+ 4 කල්දිවරුන්ගේ දේශයේදී ඔවුහු සියලුදෙනා මැරුම් කා ඇද වැටෙනු ඇත.+ කඩුවෙන් පහර කා ඇගේ වීථි පුරා වැටී සිටිනු ඇත.+

5 “ඊශ්‍රායෙල් හා යූදා,+ වැන්දඹුවක මෙන් අසරණ වී නැත. මන්ද ඔවුන්ගේ ස්වාමිපුරුෂයා ස්වර්ගයේ සේනාවල අධිපති වන යෙහෝවා දෙවිය.+ ඔහු ඔවුන්ව අත්හැර දමා නැත. නමුත් කල්දිවරුන්ගේ දේශය ඊශ්‍රායෙල්හි ශුද්ධ තැනැත්තාණන් ඉදිරියේ ඉතා පව්කාර තත්වයක තිබේ.+

6 “දිවි ගලවාගෙන+ බැබිලෝනියෙන් පලා දුවන්න.+ ඇගේ පාපවලට හවුල් වී මැරුම් කන්න එපා.+ මන්ද යෙහෝවා දෙවි ඇයට දඬුවම් කරන කාලය පැමිණ තිබේ.+ ඇය කළ දේවලට සුදුසු දඬුවම දෙවි නියම කරනු ඇත.+ 7 බැබිලෝනිය යෙහෝවා දෙවිගේ හස්තයේ තිබූ රන් කුසලානයක් මෙනි.+ ඒ කුසලානයෙන් ඇය මුළු ලොවම මත් කළාය.+ සියලු ජාතීන් උමතුවෙන් හැසිරුණේ+ ඇගේ කුසලානයේ තිබූ වයින් පානය කළ නිසාය.+ 8 එක මොහොතින් බැබිලෝනිය වැටී විනාශ වී ගියේය.+ ජනයෙනි, ඇයට සිදු වූ විපත නිසා විලාප නඟන්න.+ වේදනාවෙන් පෙළෙන ඇයට බෝල්සම් තෛලය ගෙනත් දෙන්න.+ සමහරවිට ඇයට ඉන් සුවයක් ලැබෙයි.”

9 “බැබිලෝනිය සුව කිරීමට අපි උත්සාහ කළෙමු. නමුත් ඇයට සුවයක් ලැබුණේ නැත. එබැවින් ජනයෙනි, ඇයව අත්හැර+ අපි ආපසු අපේ දේශවලට යමු.+ මන්ද ඇගේ පව් කොතරම්ද කියනවා නම් ඒවා අහස දක්වාම ඉහළට නැඟ ඇත. එබැවින් ඇයට අනිවාර්යයෙන්ම දඬුවම් ලැබෙන්නේය.+ 10 යෙහෝවා දෙවි අපට යුක්තිය ඉටු කර දුන්නේය.+ එන්න, අපි සියොන් වෙතට ගොස් අපේ දෙවි වන යෙහෝවාගේ ක්‍රියා ප්‍රකාශ කරමු.”+

11 “වැසියෙනි, ඔබේ ඊතල මුවහත් කරගන්න.+ පලිස් සූදානම් කරගෙන යුද්ධයට රැස් වන්න. මන්ද බැබිලෝනියේ වැසියන් තම මාලිගාවට කළ දේට දඬුවම් දීමක් ලෙස+ බැබිලෝනිය විනාශ කර දැමීමට යෙහෝවා දෙවි අරමුණු කළේය.+ ඒ සඳහා යෙහෝවා දෙවි මේදිය ජාතික රජවරුන්ව පෙලඹෙව්වේය.+ 12 බැබිලෝනියේ පවුරු දෙසට මං සලකුණක් තබන්න.+ තව තවත් මුරකරුවන් යොදවා මුරකාවල් වැඩි කරන්න.+ මඟ රැක පහර දීමට සැරසී සිටින්න.+ බැබිලෝනියට විරුද්ධව ක්‍රියා කිරීම යෙහෝවා දෙවිගේ අරමුණ නිසා ඔහු එහි වැසියන්ට විරුද්ධව ප්‍රකාශ කළ දේ අනිවාර්යයෙන්ම ඉටු කරන්නේය.”+

13 “බැබිලෝනිය, යස ඉසුරෙන් පොහොසත්,+ ජල ධාරා මධ්‍යයයේ සිටින+ ඔබේ අවසානය අත ළඟයි.+ බොහෝ සෙයින් ලාභ ඉපයූ ඔබේ ඉසුරුමත් යුගයේ අවසානය කරා ඔබ දැන් පැමිණ තිබේ.+ 14 ‘පළඟැටි රංචුවක් මෙන් වූ විශාල සෙනඟක් මම ඔබ වෙතට එවන්නෙමි.+ ඔවුහු ඔබව පරාජය කර ජය ඝෝෂා නඟනු ඇත’+ කියා ස්වර්ගයේ සේනාවල අධිපති වන යෙහෝවා දෙවි තම නමින් දිවුරා පැවසුවේය.+ 15 දෙවි තම මහත් බලයෙන් පොළොව සාදා+ ප්‍රඥාවෙන්+ එය ස්ථිර ලෙස පිහිටෙව්වේය.+ ඔහු තම නුවණින්+ අහස්තලය ඇතිරිල්ලක් මෙන් දිගහැරියේය.+ 16 ඔහුගේ හඬට අහස්කුසෙහි ඇති ජල කඳ ගිගුරුම් දෙයි. ඔහු පොළොවේ සතර දෙසින් ජලය වාෂ්ප වී ඉහළට ඇදී යෑමට සැලැස්වූවේය.+ වැසි වස්සවන පිණිස ඔහු අහසේ කවුළු සෑදුවේය.+ ඔහු තම ගබඩාවලින් සුළං හමා ඒමට සැලැස්වූවේය. 17 නමුත් මේවා තේරුම්ගැනීමට බැරි තරමටම මනුෂ්‍යයන් අඥාන ලෙස කටයුතු කර තිබේ.+ තමන් සෑදූ රූප නිසා ලෝහකරුවන් සියලුදෙනාම ලැජ්ජාවට පත් වන බව නියතයි.+ ඔවුන් සාදාගෙන තිබෙන රූපවල කිසිම ජීවයක් නැත.+ ඒ සියල්ල පුහු දේවල්ය.+ 18 ඒවා නිෂ්ඵලය.+ ඒවා නිසා අත් වන්නේ නින්දාව පමණි.+ නියමිත කාලය පැමිණි විට ඒවා සියල්ල විනාශ කරනු ලැබේ.+

19 “නමුත් යාකොබ්ගේ දෙවි ඒ රූපවලට වඩා බොහෝ සෙයින් වෙනස්ය.+ සෑම දෙයක්ම සෑදුවේ ඔහුය.+ ඔහුගේ උරුමයට සවිය දෙන්නේද ඔහුය.+ ස්වර්ගයේ සේනාවල අධිපති වන යෙහෝවා යන නාමයෙන් ඔහුව හඳුන්වයි.”+

20 “ඔබ මාගේ අතෙහි ඇති මුගුරය. යුධ ආයුධයය.+ මම ඔබ මාර්ගයෙන් ජාතීන්ව සුනුවිසුනු කර දමන්නෙමි. රාජ්‍යයන් කඩා බිඳ දමන්නෙමි. 21 ඔබ මාර්ගයෙන් අශ්වයන්වත් අසරුවන්වත් සුනුවිසුනු කර දමන්නෙමි. යුධ රථත් ඒවා පදවන්නන්වත් කැබලි කර දමන්නෙමි.+ 22 ස්ත්‍රීන් හා පුරුෂයන්වද බාලයන් හා මහල්ලන්වද තරුණයන් හා තරුණියන්වද මම ඔබ මාර්ගයෙන් විනාශ කර දමන්නෙමි. 23 එඬේරුන් හා ඔවුන්ගේ රැළවල්ද ගොවියන් හා ඔවුන්ගේ සතුන්වද ආණ්ඩුකාරයන්වද නිලධාරීන්වද මම ඔබ මාර්ගයෙන් සහමුලින්ම නැති කර දමන්නෙමි. 24 නමුත් බැබිලෝනිවරුන් හා කල්දිය දේශයේ වැසියන් ඔබේ ඇස් ඉදිරියේම සියොන්හිදී කළ දුෂ්ටකම්වලට මම ඔවුන්ට දඬුවම් කරන්නෙමි”+ කියා යෙහෝවා දෙවි පවසන්නේය.

25 යෙහෝවා දෙවි මෙසේද පවසන්නේය. “බැබිලෝනිය, ඔබ මුළු පොළොවම නැති නාස්ති කර දමන+ විනාශකාරී කන්දක් මෙනි.+ නමුත් මම ඔබට විරුද්ධව නැඟී සිටිමි.+ මම මාගේ හස්තය දිගු කර කඳු අතරේ වැජඹෙන ඔබව පෙරළා දමන්නෙමි. ඔබව පිලිස්සී ගිය කන්දක් මෙන් වීමට සලස්වන්නෙමි.”+

26 “ගොඩනැඟිල්ලක කොනේ තැබීම සඳහාවත් අත්තිවාරමක් සඳහාවත් මිනිස්සු ඔබෙන් කිසි ගලක් ගෙන යන්නේ නැත.+ ඔබ සදහටම පාළුවට යන්නෙහිය”+ කියා යෙහෝවා දෙවි පවසන්නේය.

27 “ජනයෙනි, දේශයෙහි සංඥාවක් ඔසවන්න.+ ජාතීන්ට ඇසෙන සේ හොරණෑව පිඹ බැබිලෝනියට විරුද්ධව යුද්ධයට යෑමට ඔවුන්ව සූදානම් කරන්න.*+ අරරත්,+ මින්නි සහ අෂ්කෙනස්+ යන රාජ්‍යයන්ද යුද්ධයට යෑමට කැඳවන්න. ඇයට විරුද්ධව යුද්ධයට යන හමුදාව ගොඩනැංවීමට නිලධාරියෙකුව පත් කරන්න. පළඟැටි සේනාවක් මෙන් අශ්ව සේනාව+ රැගෙන යුද්ධයට එන්න. 28 බැබිලෝනියට විරුද්ධව යුද්ධයට යෑමට ජාතීන්වද මේදියාවේ රජවරුන්වද+ එහි ආණ්ඩුකාරයන්වද සියලු නිලධාරීන්වද ඔවුන් යටතේ තිබෙන දේශවල වැසියන්වද සූදානම් කරන්න. 29 සියලුදෙනා පුදුමයට පත් කරමින් බැබිලෝනිය කිසි මිනිසෙකු වාසය නොකරන පාළු ස්ථානයක් බවට පත් කිරීමට යෙහෝවා දෙවි තීරණය කර ඇත.+ එබැවින් පොළොව දෙදරුම් කන්නේය. මහත් සේ වේදනාවට පත් වන්නේය.+

30 “බැබිලෝනියේ දක්ෂ යුධ සෙබළු සටනින් පසුබැස ඔවුන්ගේ බලකොටු තුළම රැඳී සිටිති. ඔවුන්ගේ බලය සිඳී ගොසින්ය.+ ඔවුහු ස්ත්‍රීන් මෙන් දුර්වල වී සිටිති.+ බැබිලෝනියේ වාසස්ථානවලට ගිනි තබා ඇත. ඇගේ දොරටුවල අගුලු සියල්ල කඩා බිඳ දමා ඇත.+

31 “නගරය සෑම පැත්තෙන්ම අල්ලාගෙන ඇති බව බැබිලෝනියේ රජුට දන්වන පිණිස+ පණිවිඩකරුවෝ පිට පණිවිඩකරුවෝ පැමිණෙති.+ 32 ඔවුහු රජු වෙතට පැමිණ සතුරන් තොටුපොළවල් සියල්ල අල්ලාගත් බවත්+ පැපිරස් බෝට්ටු සියල්ල ඔවුන් ගිනිබත් කළ බවත් සිදු වූ දේ නිසා යුධ භටයන් සියලුදෙනා වියවුල් වී සිටින බවත්+ දන්වති.”

33 ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පවසන්නේය. “බැබිලෝනීය දියණිය, ඔබ ධාන්‍ය මඩින කමතක් මෙනි.+ ටික දිනකින් අස්වැන්න කපන කාලය පැමිණෙන්නේය.+ එවිට ඔබව සම්පූර්ණයෙන්ම පාගා දමනු ලබන්නේය.”

34 “බැබිලෝනියේ රජු වන නෙබුකද්රෙෂර් මාව කා දැමුවේය.+ ඔහු මාව වියවුලට පත් කළේය. භාජනයක් පෙරළා හිස් කර දමන්නාක් මෙන් ඔහු මාව සම්පූර්ණයෙන්ම හිස් කර දැමුවේය. දැවැන්ත සර්පයෙකු මෙන් ඔහු මාව ගිල දැමුවේය.+ මා සතු අගනා දෙයින් ඔහු තම කුස පුරවාගෙන මාව වීසි කර දැමුවේය. 35 ‘අපටත් අපේ පෙළපතටත් කළ දරුණු අපරාධ සියල්ල බැබිලෝනිය පිටටත් පැමිණේවා’ කියා සියොන් දියණිය පවසන්නීය.+ ‘දේශය තුළ වැගිරෙවූ ලේවලට කල්දිය දේශයේ වැසියන්ට දඬුවම් කරන්න’ කියා යෙරුසලම පවසන්නේය.”+

36 එබැවින් යෙහෝවා දෙවි මෙසේ පවසන්නේය. “මා ඔබේ නඩුව විභාග කර+ ඔවුන් ඔබට කළ දේට මම ඔවුන්ට දඬුවම් කරන්නෙමි.+ මම බැබිලෝනියේ මහ ගංගාව සිඳී යෑමට සලස්වන්නෙමි. ඇගේ දිය උල්පත් සියල්ලද වියළී යෑමට සලස්වන්නෙමි.+ 37 බැබිලෝනියේ ඉතුරු වන්නේ නටබුන් ගොඩක් පමණි.+ එය මනුෂ්‍ය වාසයක් නැති හිවලුන්ගේ රාජධානියක් බවට පත් වනු ඇත.+ සියලුදෙනාගේ අපහාසවලට ලක් වන ඇය දෙස සියල්ලෝ පුදුමයෙන් බලා සිටිනු ඇත.+ 38 බැබිලෝනියේ වැසියෝ තරුණ සිංහයන් මෙන් ගොරවන්නෝය. ඔවුහු සිංහ පැටවුන් මෙන් කෑ මොර ගසන්නෝය.”

39 යෙහෝවා දෙවි මෙසේ පවසන්නේය. “ඔවුන් උමතු වී සිටින විට මම ඔවුන්ට උත්සවයක් සූදානම් කර මත් වන තුරු ඔවුන්ට බීමට දෙන්නෙමි.+ ප්‍රීතියෙන් කුල්මත්ව සිටින ඔවුහු නොදැනුවත්වම සදාකාල නින්දකට වැටෙනු ඇත. කිසි දිනක ඔවුහු ඒ නින්දෙන් අවදි නොවනු ඇත.+ 40 බැටළුවන් හා එළුවන් මෙන් මම ඔවුන්ව මරණයට ගෙන යන්නෙමි.”+

41 “අහෝ, ෂේෂක් පරාජයට පත් වූ හැටි!+ මුළු ලොවෙහි කීර්තිය දිනාගත් නගරය බිඳ වැටුණු හැටි!+ බැබිලෝනිය සියලු ජාතීන්ගේ පුදුමයට ලක් වූ හැටි!+ 42 මහ සයුර බැබිලෝනියට එරෙහිව පැමිණියේය. මහා රළ පහරින් ඇයව සම්පූර්ණයෙන්ම යට වී ගියේය.+ 43 සියලුදෙනාව පුදුමයට පත් කරවමින් ඇගේ නගර සියල්ල කිසිවෙකු නොවසන පාළු කාන්තාරයක් බවට පත් වී ඇත.+ ඒ මැදින් කිසි මිනිසෙක් ගමන් නොකරයි.+ 44 බැබිලෝනියේ සිටින බෙල්ට මම දඬුවම් කරන්නෙමි.+ ඔහු ගිල දැමූ සෑම දෙයක්ම එදාට ඔහුට වැමෑරීමට සිදු වන්නේය.+ පෙර මෙන් ජාතීහු ඔහු වටා එක් රොක් වන්නේ නැත.+ බැබිලෝනියේ පවුරුද බිඳී වැටෙන්නේය.+

45 “මාගේ සෙනඟෙනි, ඇගෙන් ඉවත්ව පලා දුවන්න.+ යෙහෝවා දෙවිගේ මහත් උදහසට+ හසු නොවී ඔබේ ජීවිත බේරාගන්නා පිණිස+ ඇගෙන් ඉවත්ව යන්න. 46 නැත්නම් ඔබට දේශයේදී අසන්න ලැබෙන ආරංචි නිසා ඔබේ හදවත් සසල වී+ ඔබ භීතියට පත් වනු ඇත. පොළොව පුරා සිදු වන සැහැසිකකම් ගැනද එක් රජෙකු තවත් රජෙකුට විරුද්ධව නැඟී සිටීම ගැනද අවුරුද්දක් අවුරුද්දක් පාසා ඔබට අසන්න ලැබෙනු ඇත. 47 සෙනඟෙනි, මෙය අසන්න. මම බැබිලෝනියේ තිබෙන දේවතා රූප සියල්ල විනාශ කරන කාලය පැමිණෙන්නේය.+ එදාට ඇගේ මුළු දේශයම මහත් ලැජ්ජාවකට පත් වන්නේය. පහර කන සියලුදෙනා ඇය තුළම මැරී වැටෙන්නෝය.+

48 යෙහෝවා දෙවි මෙසේ පවසන්නේය. “බැබිලෝනිය කොල්ල කා එය විනාශ කර දැමීමට උතුරු දෙසින් පිරිසක් පැමිණෙන නිසා+ අහසත් පොළොවත් එහි වෙසෙන සියලුදෙනාත් ප්‍රීති ඝෝෂා නඟන්නෝය.+ 49 එවැනි විපතක් අත් වන්නේ ඔවුන් ඊශ්‍රායෙල්වරුන්ව මරා දැමූ නිසා පමණක් නොව+ පොළොවේ සිටින වෙනත් ජාතීන්වද බැබිලෝනියේදී මරා දැමූ නිසාය.+

50 “කඩු පහරින් තම දිවි ගලවාගත් සියල්ලෙනි, නොනැවතී පලා දුවන්න.+ ඈත එපිට පිහිටි යෙරුසලම ඔබේ මතකයට නඟාගන්න.+ යෙහෝවා දෙවිව සිහි කරන්න.”+

51 “අපට අසන්න ලැබුණු නින්දාසහගත දේවල් නිසා+ අපි ලැජ්ජාවට පත් වුණෙමු.+ අවමානය නිසා අපි අපේ මුහුණු සඟවාගත්තෙමු.+ අපි මේ දේවල් අද්දුටුවේ යෙහෝවා දෙවිගේ මාලිගාවේ ශුද්ධස්ථානවලට ඇතුල් වීමට නුසුදුසු අය එයට ඇතුල් වූ නිසාය.”+

52 “බැබිලෝනියේ තිබෙන දේවතා රූප සියල්ල මා විනාශ කර දමන කාලය පැමිණෙන්නේය.+ එදාට තුවාල ලැබූවන් නඟන මර ළතෝනිය දේශය සිසාරා පැතිර යනු ඇත”+ කියා යෙහෝවා දෙවි පවසන්නේය.

53 “බැබිලෝනිය අහස තරම් උසට නැඟුණත්+ කිසිවෙකුට ළඟා විය නොහැකි තරමටම ඇය තම සුරක්ෂිත බලකොටු උස්ව තනාගත්තත්+ මම ඇයව විනාශ කර දැමීමට සෙනඟක් එවන්නෙමි”+ කියා යෙහෝවා දෙවි පවසන්නේය.

54 “බැබිලෝනියෙන් නැඟෙන විලාප දීමේ හඬට ඇහුම්කන් දෙන්න.+ කල්දිවරුන්ගේ දේශයෙන් නික්මෙන විනාශයේ හඬට ඇහුම්කන් දෙන්න.+ 55 යෙහෝවා දෙවි බැබිලෝනිය විනාශ කර ඇයව නිහඬ කරන්නේය.+ ඇගේ සතුරෝ මුහුදේ රැලි මෙන් ඝෝෂා නඟමින් ඇයට විරුද්ධව නැඟී එන්නෝය.+ ඔවුන්ගේ ඝෝෂාව බොහෝ සෙයින් වැඩි වන්නේය. 56 බැබිලෝනිය විනාශ කර දැමීමට තැනැත්තෙක් පැමිණෙන්නේය.+ ඇගේ බලවන්තයන් සියලුදෙනාව යටත් කරගෙන+ ඔවුන්ගේ දුනු කැබලිවලට කඩා දමනු ලබන්නේය.+ මන්ද යෙහෝවා දෙවි මිනිසුන්ගේ ක්‍රියාවලට සුදුසු ප්‍රතිඵල ලබා දෙන දෙවි කෙනෙකි.+ එබැවින් ඔහු අනිවාර්යයෙන්ම ඔවුන්ට දඬුවම් කරන්නේය.”+ 57 ස්වර්ගයේ සේනාවල අධිපති වන යෙහෝවා යන නමින් හඳුන්වන+ රජ+ මෙසේද පවසන්නේය. “මම ඇගේ අධිපතීන්ටද ප්‍රඥාවන්තයන්ටද ආණ්ඩුකාරයන්ටද නිලධාරීන්ටද දක්ෂ යුධ භටයන්ටද මත් වන තුරුම බීමට දෙන්නෙමි.+ එවිට ඔවුහු නොදැනුවත්වම සදාකාල නින්දට වැටෙනු ඇත. කිසි දිනක ඔවුහු ඒ නින්දෙන් අවදි වන්නේ නැත.”+

58 ස්වර්ගයේ සේනාවල අධිපති වන යෙහෝවා දෙවි තවදුරටත් මෙසේ පවසන්නේය. “බැබිලෝනියේ පවුර කොතරම් පළල් වුණත් එය නිසැකවම කඩා බිඳ දමනු ලබන්නේය.+ ඇගේ දොරටු කොතරම් උසට සාදා තිබුණත් ඒවා ගින්නෙන් දවා දමනු ලබන්නේය.+ මනුෂ්‍යයන්ගේ වෙහෙසින් කිසිම පලක් වන්නේ නැත.+ ජාතීන් දැරූ උත්සාහය ගින්නෙන් දැවී යන්නේය.+ ඔවුන්ගේ වෙහෙස නිෂ්ඵල වන්නේය.”

59 මසේයාගේ පුත්‍රයා වූ+ නෙරියාගේ පුත්+ සෙරායා, යූදාහි රජු වූ ශෙදකියා සමඟ බැබිලෝනියට යන අවස්ථාවේදී අනාගතවක්තෘ යෙරෙමියා ඔහුට කිරීමට යම් පැවරුමක් දුන්නේය. යෙරෙමියා, රජුගේ ප්‍රධාන නිලධාරියෙකු වූ සෙරායාට එම පැවරුම දුන්නේ ශෙදකියා රජු පාලනය කළ හතරවන අවුරුද්දේදීය. 60 බැබිලෝනිය පිටට පැමිණෙන සියලු විපත්ති එනම්, බැබිලෝනියට විරුද්ධව පැවසූ ඒ සියලු දේ ගැන යෙරෙමියා ලියවිල්ලක සටහන් කළේය.+ 61 යෙරෙමියා එය සෙරායාට දී ඔහුට මෙසේ පැවසුවේය. “ඔබ බැබිලෝනියට ඇතුල් වූ විට මෙහි සඳහන් දේවල් ශබ්ද නඟා කියවන්න.+ 62 එමෙන්ම ඔබ මෙසේද පවසන්න. ‘යෙහෝවා දෙවියනි, බැබිලෝනිය සදහටම කිසි මිනිසෙකුවත් සතෙකුවත් වාසය නොකරන පාළු ස්ථානයක් බවට පත් වෙනවා කියා ඔබ පැවසුවා.’+ 63 ඔබ මේ ලියවිල්ලේ සඳහන් දේ කියවා අවසන් වූ පසු එයට ගලක් බැඳ යුප්‍රටීස් ගඟට වීසි කර+ 64 මෙසේ කියන්න. ‘මේ ලියවිල්ල ගඟේ පත්ලටම ගිලී ගිය ලෙසම මම බැබිලෝනිය පිටට ගෙනෙන විපත්ති නිසා ඇය නැවත කිසිදාක උඩට මතු නොවන ලෙස ගිලී යන්නේය.+ එය ගොඩගැනීමට දරන සියලු උත්සාහයන්ද අසාර්ථක වන්නේය.’”+

මෙතෙක් සඳහන් වූයේ යෙරෙමියා පැවසූ දේය.