ගණන් කතාව
5 යෙහෝවා දෙවි මෝසෙස්ට මෙසේ කීවේය. 2 “ලාදුරු රෝගීන් සියලුදෙනාවද+ ශරීරයෙන් ශ්‍රාවයක් ගලන සියලුදෙනාවද+ මළ සිරුරක් ස්පර්ශ කිරීම නිසා අපවිත්‍ර වූ සියලුදෙනාවද+ කඳවුරෙන් පිටතට යවන්න කියා ඊශ්‍රායෙල් සෙනඟට අණ කරන්න. 3 පුරුෂයෙකු වුවත් ස්ත්‍රියක වුවත් එලෙස අපවිත්‍රව සිටින සෑම කෙනෙකුවම කඳවුරෙන් පිටතට යවන්න.+ මාගේ ශුද්ධ කූඩාරම+ පිහිටුවා තිබෙන කඳවුර ඔවුන් නිසා අපවිත්‍ර නොවන පිණිස+ එසේ කරන්න.” 4 යෙහෝවා දෙවි මෝසෙස්ට අණ කළ ලෙසම ඊශ්‍රායෙල් සෙනඟ අපවිත්‍ර වූ සියලුදෙනාව කඳවුරෙන් පිටතට යැව්වෝය.
5 යෙහෝවා දෙවි තවදුරටත් මෝසෙස්ට මෙසේ කීවේය. 6 “ඊශ්‍රායෙල් සෙනඟට මෙසේ කියන්න. ‘පුරුෂයෙකු හෝ ස්ත්‍රියක හෝ යෙහෝවා දෙවි වන මට ද්‍රෝහි වෙමින් මොනයම් ආකාරයක හෝ පාපයක් කළොත් ඒ තැනැත්තා වරදකරුවෙක් වන්නේය.+ 7 ඒ තැනැත්තා තමා කළ පාපය හෙළි කළ යුතුයි.+ තමා අතින් වරද සිදු වූ තැනැත්තාට සම්පූර්ණ අලාභය ඔහු වන්දියක් ලෙස ගෙවිය යුතුයි. ඊට අමතරව අලාභයෙන් පහෙන් කොටසක්ද+ ඔහු එම තැනැත්තාට ගෙවිය යුතුයි. 8 පාඩුව වින්ද තැනැත්තා මිය ගොස් ඇත්නම් ඔහුගේ කිට්ටු නෑදෑයෙකුට වන්දිය දිය යුතුයි. නමුත් වන්දිය භාරගැනීමට කිට්ටු නෑදෑයෙකු නැත්නම් එම වන්දිය යෙහෝවා දෙවිට දිය යුතුයි. එය පූජකයාට අයිති වනු ඇත. වරදකරුගේ පාපයට සමාව ලබාගැනීම සඳහා ඔප්පු කිරීමට ගෙනෙන බැටළුවා සමඟ එම වන්දිය පූජකයාට දිය යුතුයි.+
9 “‘ඊශ්‍රායෙල් සෙනඟ පරිත්‍යාගයක්+ ලෙස පූජකයාට දෙන සෑම ශුද්ධ දෙයක්ම+ පූජකයාට අයිති වන්නේය.+ 10 එක් එක් කෙනා ගෙනෙන ශුද්ධ පරිත්‍යාගයන් පූජකයාට අයිතිය. පූජකයාට දෙන ඕනෑම දෙයක්ද ඔහුට අයිතිය.’”
11 යෙහෝවා දෙවි තවදුරටත් මෝසෙස්ට මෙසේ කීවේය. 12 “ඊශ්‍රායෙල් සෙනඟට මෙසේ කියන්න. ‘ස්ත්‍රියක් තම පුරුෂයාට ද්‍රෝහි වෙමින්+ 13 වෙනත් පුරුෂයෙකු සමඟ සයනය කර+ එය ඇගේ පුරුෂයාගෙන් සඟවනු ලැබුවොත්+ ඇගේ වරද හෙළි නොවීමට ඉඩ තිබේ. එමෙන්ම ඇය එම දූෂ්‍ය ක්‍රියාව කළ බවට ඇයට විරුද්ධව සාක්ෂි දීමට කිසිවෙකු නොසිටින්නට පුළුවන. 14 නමුත් පසු කලෙක, ඇය ද්‍රෝහි වී ඇතැයි කියා පුරුෂයාට සැකයක් ඇති වී ඔහු ඇයට වෛර කිරීමට ඉඩ තිබේ.+ එසේත් නැත්නම් භාර්යාව එවැනි දූෂ්‍ය ක්‍රියාවක් නොකළත් ඇය ද්‍රෝහි වී ඇතැයි කියා පුරුෂයාට සැකයක් ඇති වී ඇයට වෛර කිරීමට ඉඩ තිබේ. එවැනි අවස්ථාවකදී ඔහු කළ යුත්තේ මෙයයි. 15 එම පුරුෂයා තම භාර්යාවව පූජකයා වෙතට ගෙනා යුතුයි.+ පූජාවක් ඔප්පු කිරීම සඳහා බාර්ලි පිටි ඒපාවකින්* දහයෙන් කොටසක්ද ගෙනා යුතුයි. එය සැකයක් ඇති වූ නිසා ඔප්පු කරන ධාන්‍ය පූජාවක් වන බැවින් පිටි මත තෙල් හෝ කට්ටකුමංජල්+ හෝ නොදමන්න. ඔහු එය ඔප්පු කරන්නේ එම වරද සිහි කරන පිණිසය. එම පූජාව සිහිවීමේ ධාන්‍ය පූජාවකි.
16 “‘පූජකයා ඇයව යෙහෝවා දෙවි වන මා ඉදිරියට කැඳවිය යුතුයි.+ 17 ඉන්පසු පූජකයා මැටි භාජනයකට පිරිසිදු වතුර* ටිකක් ගෙන ශුද්ධ කූඩාරමේ භූමියෙන් ගත් පස් ටිකක් එම වතුරට මිශ්‍ර කළ යුතුයි. 18 පූජකයා යෙහෝවා දෙවි වන මා ඉදිරියට කැඳවූ එම ස්ත්‍රියගේ කොණ්ඩේ ලිහා සිහි වීමේ ධාන්‍ය පූජාව එනම්, සැකයක් ඇති වූ නිසා ඔප්පු කරන පූජාව+ ඇගේ අල්ල මත තැබිය යුතුයි. ශාපයක් ගෙනෙන තිත්ත වතුර සහිත භාජනය පූජකයා තම අතේ තබාගත යුතුයි.+
19 “‘ඉන්පසු පූජකයා ඇගෙන් දිවුරුම් ගනිමින් මෙසේ කිව යුතුයි. “ඔබ ඔබේ පුරුෂයා යටතේ සිටින කාලයේදී වෙන පුරුෂයෙකු සමඟ කිසිවිටෙකවත් සයනය කළේ නැත්නම්+ ඔහුට විරුද්ධව කිසි දූෂ්‍ය ක්‍රියාවක් කළේ නැත්නම් ශාපයක් ගෙනෙන මේ තිත්ත වතුරෙන් ඔබට කිසි හානියක් සිදු නොවේවා! 20 නමුත් ඔබ ඔබේ පුරුෂයා යටතේ සිටියදී+ වෙනත් පුරුෂයෙකු සමඟ සයනය කර+ ඔබේ පුරුෂයාට විරුද්ධව දූෂ්‍ය ක්‍රියාවක් කළේ නම් . . .” 21 ශාපයක් ඇතුළත් මෙම දිවුරුම පූජකයා ඇයට ප්‍රකාශ කළ යුතුයි.+ “ඔබ බොරු දිවුරුමක් දුන් නිසා යෙහෝවා දෙවි මේ ශාපය ඔබ පිටට ගෙනෙනු ඇත. ඔබේ සෙනඟට එය පාඩමක් වන්නේය. යෙහෝවා දෙවි ඔබේ බඩ ඉදිමීමට සලස්වනු ඇත. ඔබ ඔබේ ජීවිත කාලයේදී වඳ ස්ත්‍රියකව* සිටිනු ඇත.+ 22 ශාපයක් ගෙනෙන මේ වතුර ඔබ බිවූ විට ඔබේ බඩ ඉදිමෙන්නේය. ඔබ වඳ ස්ත්‍රියක වනු ඇත.” එවිට ස්ත්‍රිය, “එසේම වේවා! එසේම වේවා”* කියා පැවසිය යුතුයි.
23 “‘පූජකයා එම ශාපය ලියවිල්ලක සටහන් කර+ එය තිත්ත වතුරෙන් මකා දැමිය යුතුයි.+ 24 ඉන්පසු පූජකයා ශාපයක් ගෙනෙන එම තිත්ත වතුර ස්ත්‍රියට බොන්න දිය යුතුයි.+ එම වතුර පානය කළ විට ඇයට වේදනාවක් ඇති වන්නේය. 25 සැකයක් ඇති වූ නිසා ඔප්පු කිරීමට ගෙනා ධාන්‍ය පූජාව+ ඇගේ අතින් ගෙන පූජකයා එය සෙලවීමේ පූජාවක් ලෙස යෙහෝවා දෙවි වන මා ඉදිරියේ ඒ මේ අත සෙලවිය යුතුයි. ඉන්පසු එය පූජාසනය ළඟට ගෙනා යුතුයි. 26 පූජකයා එම ධාන්‍ය පූජාවෙන් ටිකක් ගෙන සිහිගැන්වීමක් ලෙස+ පූජාසනය මත දැවිය යුතුයි. ඉන්පසු ස්ත්‍රියට තිත්ත වතුර බොන්න දිය යුතුයි. 27 ඇය තම පුරුෂයාට ද්‍රෝහි වී දූෂ්‍ය ක්‍රියාවක් කර ඇත්නම්+ ශාපයක් ගෙනෙන එම වතුර බිවූ පසු ඇයට වේදනාවක් දැනෙනු ඇත. එවිට ඇගේ බඩ ඉදිමෙන්නේය. ඇය වඳ ස්ත්‍රියක වන්නේය. එම ස්ත්‍රිය සෙනඟ ඉදිරියේ ශාප ලත් තැනැත්තියක වන්නීය.+ 28 නමුත් ස්ත්‍රිය තම පුරුෂයාට විරුද්ධව දූෂ්‍ය ක්‍රියාවක් කර නැත්නම් එම දඬුවම ඇය පිටට පැමිණෙන්නේ නැත.+ ඇය දරුවන් පිළිසිඳගන්නීය.
29 “‘සැකයක්+ ඇති වූ විට අනුගමනය කළ යුතු නීතිය එයයි. ස්ත්‍රියක තම පුරුෂයා යටතේ සිටින කාලයේදී+ ඔහුට විරුද්ධව+ දූෂ්‍ය ක්‍රියාවක් කළොත් හෝ 30 ඇය ද්‍රෝහි වී ඇතැයි කියා පුරුෂයාට සැකයක් ඇති වී ඔහු ඇයට වෛර කරන්න පටන්ගත්තොත් හෝ ඔහු තම භාර්යාවව යෙහෝවා දෙවි වන මා ඉදිරියට ගෙනා යුතුයි. පූජකයාද ඉහත සඳහන් නීතිය එලෙසම ක්‍රියාත්මක කළ යුතුයි. 31 ස්ත්‍රිය තමා කළ වරදට ප්‍රතිඵල විඳින්නීය. නමුත් පුරුෂයා එයින් නිදොස් වන්නේය.’”