1 සාමුවෙල්
4 තමාට හෙළි කළ වචන සාමුවෙල් දිගටම ඊශ්‍රායෙල් සෙනඟට ප්‍රකාශ කළේය.
ඒ කාලයේදී පිලිස්තිවරුන්ට විරුද්ධව සටන් කරන පිණිස ඊශ්‍රායෙල්වරු පිටත්ව ගොස් එබෙන්එසෙර්හි+ කඳවුරු බැඳගත්තෝය. පිලිස්තිවරුන් කඳවුරු බැඳ සිටියේ අපෙක්+ යන ස්ථානයේය. 2 පිලිස්තිවරු ඊශ්‍රායෙල්වරුන්ට විරුද්ධව සටනට සැරසුණෝය.+ සටන ඉතා දරුණු විය. ඊශ්‍රායෙල්වරු පිලිස්තිවරුන්ගේ අතින් පරාජයට පත් වූහ.+ පිලිස්තිවරු යුධ පිටියේ සටන් කරමින් සිටි ඊශ්‍රායෙල්වරුන් හාරදහසක් පමණ මරා දැමුවෝය. 3 පරාජයට පත් වූ ඊශ්‍රායෙල්වරු නැවත ඔවුන්ගේ කඳවුර වෙතට හැරී ගියෝය. ඒ අවස්ථාවේදී ඊශ්‍රායෙල්හි වැඩිමහල්ලෝ එකිනෙකා අතරේ මෙසේ කතා වූහ. “යෙහෝවා දෙවි පිලිස්තිවරුන්ට අපිව පරද්දන්න ඉඩ දුන්නේ ඇයි?+ අපි ෂීලෝ නුවර තියෙන යෙහෝවා දෙවිගේ ගිවිසුම් පෙට්ටිය අරගෙන එමු.+ ඒක ගෙනැවිත් අපි ළඟ තියාගමු. එතකොට අපේ සතුරන්ගෙන් අපිට ආරක්ෂාව ලැබෙයි.” 4 එබැවින් ඔවුහු ෂීලෝ වෙත මිනිසුන් යවා ස්වර්ගයේ සේනාවල අධිපති වන කෙරුබ්වරුන් පිට හිඳගෙන සිටින+ යෙහෝවා දෙවිගේ ගිවිසුම් පෙට්ටිය එතැනට ගෙන්වාගත්තෝය. ඒලීගේ පුත්‍රයෝ දෙදෙනා වන හොප්නී හා පිනෙහාස්ද+ ගිවිසුම් පෙට්ටිය තැබූ තැන සිටියෝය.
5 යෙහෝවා දෙවිගේ ගිවිසුම් පෙට්ටිය කඳවුරට රැගෙන ආ විට සියලු ඊශ්‍රායෙල්වරු මහත් හඬින් කෑගැසුවෝය.+ ඔවුන්ගේ ශබ්දය මුළු ප්‍රදේශය පුරාම දෝංකාර දුන්නේය. 6 ඒ ශබ්දය ඇසුණු පිලිස්තිවරු එකිනෙකාගෙන් මෙසේ ඇසුවෝය. “හෙබ්‍රෙව්වරුන්ගේ කඳවුරෙන් ඝෝෂාවක්+ ඇහෙන්නේ ඇයි?” පසුව යෙහෝවා දෙවිගේ ගිවිසුම් පෙට්ටිය ඊශ්‍රායෙල්වරුන්ගේ කඳවුර තුළට ගෙනැවිත් තිබෙන බව ඔවුන්ට ආරංචි විය. 7 එය දැනගත් විට පිලිස්තිවරු භය වී මෙසේ කීවෝය. “කඳවුර ඇතුළට දෙවියන් ඇවිල්ලා!+ මේ වගේ දෙයක් මීට කලින් වෙලා නැහැ! අපිට දැන් කිසි ගැලවීමක් නැහැ! 8 මේ බලවත් දෙවියන්ගේ අතින් අපිව ගලවාගන්නේ කවුද? ඊජිප්තුවරුන්ට විරුද්ධව විවිධ පීඩා ගෙනැවිත් පාළුකරයේදී ඔවුන්ව විනාශ කළේ මේ දෙවියන් නේද?+ අපිට දැන් කොහෙත්ම ගැලවෙන්න බැහැ!” 9 “පිලිස්තිවරුනි, භය වෙන්න එපා, ධෛර්යවත් වෙන්න! පුරුෂයන් වගේ සටන් කරන්න. අපි කාලයක් හෙබ්‍රෙව්වරුන්ව යටත් කරගෙන සිටියා කියලා අමතක කරන්න එපා.+ දැන් අපිව යටත් කරගන්න ඔවුන්ට ඉඩ නොදී පුරුෂයන් වගේ සටන් කරමු!” 10 ඉන්පසු පිලිස්තිවරු සටනට පිටත්ව ගියෝය. ඊශ්‍රායෙල්වරු අන්ත පරාජයට පත් වී+ තම තමන්ගේ කූඩාරම් වෙත පලා ගියෝය.+ එදින විශාල සෙනඟක් පිලිස්තිවරුන්ගේ අතින් මැරුම් කෑවෝය.+ ඊශ්‍රායෙල්වරුන්ගේ පාබළ හමුදාවෙන් තිස්දහසක්ම මිය ගියෝය.+ 11 ඒලීගේ පුත්‍රයෝ වන හොප්නී හා පිනෙහාස්ද මිය ගියෝය.+ දෙවිගේ ගිවිසුම් පෙට්ටියද පිලිස්තිවරු පැහැරගත්තෝය.+
12 බෙන්ජමින් ගෝත්‍රයේ මිනිසෙක් යුධ පිටියේ සිට ෂීලෝ නුවර වෙත දුවගෙන ආවේය. ඔහු වස්ත්‍ර ඉරාගෙන+ හිසේ දූවිලි දමාගෙන+ සිටියේය. 13 ඔහු පැමිණෙන විට ඒලී පාර අසල බංකුවක් උඩ හිඳගෙන මඟ බලාගෙන සිටියේය. මන්ද ඔහු සැබෑ දෙවිගේ ගිවිසුම් පෙට්ටිය+ ගැන බියෙන් සිටියේය. ඒ මිනිසා නුවරට ඇතුල් වී සිදු වූ සියල්ල දැනුම් දුන්නේය. නුවර වැසියෝ එය අසා කෑගසමින් හැඬුවෝය. 14 ඒ මහත් ඝෝෂාව ඇසුණු විට ඒලී මෙසේ ඇසුවේය. “මිනිස්සු මෙච්චර හයියෙන් කෑගහන්නේ ඇයි?”+ ඉන්පසු ඒ මිනිසා සිදු වූ සියල්ල ඒලීට දන්වන පිණිස ඔහු ළඟට ගියේය. 15 (ඒ වන විට ඒලීට වයස අවුරුදු අනූඅටක් විය. ඔහුගේ දෑස් නොපෙනෙන තරමටම දුර්වලව තිබිණ.)+ 16 ඔහු ඒලීට මෙසේ කීවේය. “මම දැන් ආවේ යුධ පිටියේ ඉඳන්. මට එහෙන් පලා එන්න සිද්ධ වුණා.” එවිට ඒලී මෙසේ ඇසුවේය. “ඇයි පුතේ, එහෙ මොනවද සිද්ධ වුණේ?” 17 එවිට පණිවිඩකරු ඔහුට මෙසේ කීවේය. “ඊශ්‍රායෙල්වරු අන්ත පරාජයකට පත් වුණා. පිලිස්තිවරුන් වෙතින් ඔවුන්ට පලා යන්න සිද්ධ වුණා.+ ඔබේ පුතුන් දෙන්නා වන හොප්නී සහ පිනෙහාසුත් මැරුණා.+ පිලිස්තිවරු සැබෑ දෙවිගේ ගිවිසුම් පෙට්ටියත් පැහැරගත්තා.”+
18 ඔහු සැබෑ දෙවිගේ ගිවිසුම් පෙට්ටිය ගැන සඳහන් කළ විට දොරටුව අසල බංකුවක් මත හිඳගෙන සිටි ඒලී පිටුපසට වැටුණේය. ඔහු මහලු තරබාරු කෙනෙක් වූ නිසා බෙල්ල කැඩී ඔහු මිය ගියේය. ඔහු අවුරුදු හතළිහක් පුරා විනිශ්චයකරුවෙකු ලෙස ඊශ්‍රායෙල්වරුන්ට සේවය කළේය. 19 ඔහුගේ ලේලි වන පිනෙහාස්ගේ බිරිඳ ඒ වන විට දරු ප්‍රසූතියට ආසන්නව සිටියාය. සැබෑ දෙවිගේ ගිවිසුම් පෙට්ටිය පැහැරගත් බවත් ඇගේ මාමා හා පුරුෂයා මිය ගිය බවත් ආරංචි වූ විගස ඇයට ප්‍රසව වේදනාව ඇති වී+ එවෙලේම දරුවා බිහි කළාය. 20 පසුව ඇය මිය ගියාය. නමුත් ඇය මිය යන මොහොතේදී ඇය ළඟ සිටි ස්ත්‍රීහු ඇයට මෙසේ පැවසුවෝය. “භය වෙන්න එපා. ඔබට පුතෙක් ලැබුණා.”+ නමුත් ඇය ඒ ගැන සතුටු වුණේවත් ඔවුන්ට කිසි දෙයක් පැවසුවේවත් නැත. 21 ඇය තම පුත්‍රයාට ඊකාබොද්*+ යන නම තබමින් මෙසේ කීවාය. “ඊශ්‍රායෙල්හි තේජස නැති වී ගිහින්.”+ ඇය එසේ පැවසුවේ සැබෑ දෙවිගේ ගිවිසුම් පෙට්ටිය සතුරන් පැහැරගෙන ගිය නිසාත් ඇගේ මාමාද පුරුෂයාද මිය ගොස් සිටි නිසාත්ය.+ 22 ඇය නැවත මෙසේ කීවාය. “සැබෑ දෙවිගේ ගිවිසුම් පෙට්ටිය සතුරන් අතට හසු වූ නිසා+ ඊශ්‍රායෙල්හි තේජස දැන් නැති වී ගිහින්.”+