Kumutu a di ten Gadu bigi mbei soni te dou di ten u di Gaan Wata

Naasë di mundu ku di goonliba kumutu? Unfa a du ko taa di sonu, di libawojo, dee teeja, ku dee hia soni a goonliba, ko dë? Di Bëibel ta da u di tuu piki. A ta konda da u taa Gadu hën mbei dee soni dë. Fëën mbei di buku aki ta bigi ku woto u Bëibel ka Gadu bi bigi mbei soni.

U ta lei taa dee fosu soni di Gadu mbei, da jeje kuma hënseei. De da engel nasö basia u Gadu. Ma Gadu mbei goonliba da libisëmbë kuma u. Gadu bi mbei wan womi ku wan mujëë, Adam ku Eva, hën a buta de a wan hanse djai dendu. Ma de pasa Gadu buka, fëën mbei de an bi a’ di leti u libi go dou.

Kumutu a di ten Gadu mbei Adam, te dou di ten u di Gaan Wata, u ta konda 1656 jaa. Sömëni hogihati sëmbë bi libi a di pisiten dë. A liba i bi abi Saatan ku dee taku engel fëën, di wa sa si ku wojo. A goonliba i bi abi Kain ku woto hogihati sëmbë. I bi abi söseei wanlö womi di taanga gaanfa möön libisëmbë. Ma bumbuu sëmbë bi dë a goonliba tu, kuma Abeli, Enöku ku Noa. A Pisi WAN woo lesi u hii dee sëmbë aki ku dee soni dee bi pasa.