Gadu ta bigi mbei soni

GADU hën da u hii dee bunu soni u abi. Hën mbei di sonu u tuwë limbo da u a didia, nöö a mbei dee teeja sö taa u sa si limbo te ndeti. Nöö Gadu mbei di goonliba da u fuu sa libi nëën.

Ma na di sonu, di libawojo, dee teeja ku di goonliba, da dee fosu soni Gadu mbei. I saandi da di fosu soni di a mbei ö? Gadu mbei engel. Wa sa si dee engel ku wojo, leti kumafa wa sa si Gadu. Bëibel ta kai de basia u Gadu tu. Gadu mbei dee engel u libi ku ën a liba.

Di fosu engel di Gadu mbei bi dë wan apaiti wan seei. Hën da di fosu Womi Mii u Gadu, nöö a bi wooko makandi ku ën Tata. A bi heepi Gadu mbei hii woto soni. A bi heepi Gadu mbei di sonu, di libawojo, dee teeja ku di goonliba ka u ta libi aki.

Unfa di goonliba bi dë a di bigi? A di bigi, na wan sëmbë bi sa libi a goonliba. Na wan soni bi dë a goonliba, wata nöö bi dë a hii kamian. Ma Gadu bi kë taa sëmbë libi a goonliba. Fëën mbei a bigi seeka di goonliba da u. Andi a bi du?

Wë a di fosu kamian, goonliba bi a’ limbo fanöudu. Fëën mbei Gadu mbei di sonu tuwë di limbo fëën ko a goonliba. A mbei ën a sö wan fasi taa ndeti ku didia tuu bi sa dë. Te u kaba fëën, Gadu mbei goondoti kumutu a basu wata ko a liba.

A di bigi na wan soni bi dë a di goondoti. A bi dë kumafa i ta si a di peentje aki. Na wan folo nasö pau nasö mbeti bi dë. Fisi seei an bi dë a ze. Gadu bi a’ hia wooko u du u mbei di goonliba toon wan hanse kamian ka mbeti ku libisëmbë bi sa libi.