Wan bunuhati womi mii ku wan hogihati wan

LUKU Kain ku Abeli aki. De ko gaan womi. Kain ko wan womi di ta wooko goon. A ta paandi soni kuma alisi, fuuta ku guluntu.

Abeli ko wan kiijama u sikapu. A lo’ u luku sikapu mii. Dee sikapu mii ta göö ko bigi, nöö an tei longi ufö Abeli ko abi gaan hia sikapu u luku.

Wan daka hën Kain ku Abeli tja so u dee soni de bi abi go da Gadu. Kain tja so u dee soni a ta paandi. Nöö Abeli tja di möön bunu sikapu di a abi. Jehovah wai seei ku Abeli ku di soni di a tja go dëën. Ma an wai ku Kain ku dee soni a tja. I sa’ faandi mbei ö?

Na bunu di soni u Abeli bi bunu möön dee u Kain. Ma u di Abeli a’ bunuhati. A lobi Jehovah ku ën baaa. Ma Kain a’ hogihati. An lobi ën baaa.

Fëën mbei Gadu piki Kain taa a musu bia di libi fëën. Ma Kain an bi kë haika. Hati fëën boonu seei u di Gadu bi möön lobi Abeli. Fëën mbei Kain piki Abeli taa: ’Boo go a bakasë.’ Hën wë de go. Nöö di de wanwan dë ala te wan pisi, hën Kain naki ën baaa Abeli tuwë a goon. A naki ën sö taanga taa a kii ën. Na wan gaan hogi Kain du dë u?

Hii fa Abeli dëdë, tökuseei Gadu ta mëni ën jeti. Abeli bi a’ bunuhati, nöö Jehovah an ta fëëkëtë dee lö sëmbë dë. Wan daka Jehovah Gadu o weki Abeli ko a libi baka. A di ten dë Abeli an o dëdë möön. A o sa libi u teego a goonliba aki. An bi o bunu u ko sabi sëmbë kuma Abeli ö?

Ma Gadu an ta wai ku sëmbë kuma Kain. Hën mbei, baka di Kain kii hën baaa, Gadu sitaafu ën. A mbei a go kumutu a dee famii fëën dendu. Di Kain tei pasi u go a wan woto së u di goonliba, hën a tei wan u dee sisa fëën tja go. Nöö di sisa fëën dë ko mujëë fëën.

Te wan pisi Kain ku hën mujëë bigi pai miii. Woto womi mii ku mujëë mii u Adam ku Eva ko toou tu, nöö de seei pai miii. Hesihesi seei sëmbë bi ko hia a goonliba. Boo taki u so u dee sëmbë dë.