Wan womi di bi a’ degihati

DI SËMBË bi ta ko möön hia a goonliba, gaansë u de bi ta du hogihati soni kuma Kain. Ma wan womi bi tooka a de dendu. Di womi dë de bi ta kai Enöku. Enöku bi dë wan womi di bi a’ degihati. Hii fa dee sëmbë dee bi lontu ën bi ta du gaan hogihati soni, tökuseei Enöku bi ta dini Gadu go dou.

I sa’ faandi mbei dee sëmbë u di ten dë bi ta du hogihati soni sö u? Wë pakisei pikisö. Ambë bi mbei taa Adam ku Eva bi pasa Gadu buka u te de njan di fuuta di Gadu taa de an bi musu njan? Awa, a bi dë wan hogi engel. Di Bëibel ta kai ën Saatan. Nöö a ta pooba u mbei hii sëmbë du hogi.

Wan daka Jehovah Gadu bi mbei Enöku konda wan soni da dee sëmbë di de an bi kë jei. Enöku piki de taa: ’Wan daka Gadu o kii hii dee hogihati sëmbë puu.’ A bi sa dë sö taa dee sëmbë hati bi boonu seei di de jei di soni dë. Kandë de bi pooba seei u kii Enöku. Fëën mbei Enöku bi musu a’ degihati u konda da dee sëmbë andi Gadu bi o du.

Gadu an bi mbei Enöku libi longi a dee hogihati sëmbë dë dendu. Enöku bi libi 365 jaa nöö. Faandi mbei u taki „365 jaa nöö”? U di sëmbë u di ten dë bi taanga möön sëmbë u di ten fuu aki, nöö de bi ta libi möön longi tu. Di womi mii u Enöku, Metusela, bi libi dou 969 jaa!

Wë baka di Enöku dëdë, möönmöön dee sëmbë bi ta du hogi. Di Bëibel ta taki taa ’hogi nöö de bi ta mëni’, nöö a ta taki söseei taa ’hogi bi fuu goonliba’.

I sa’ wan u dee soni di mbei taa hogi bi dë a goonliba sö a di ten dë u? Wan u dee soni, hën da Saatan bi feni wan njunjun fasi u mbei sëmbë du hogi. Woo taki u di soni dë a di woto di ta ko.