Di fosu mutjama

I SAANDI da di fosu soni Noa du di hën ku hën wosudendu kumutu a di ark dendu ö? A bi da Gadu wan soni. I sa si fa a ta du di soni dë a di peentje a basu aki. Noa kii wan mbeti tjuma u da Gadu tangi, u di a tjubi di wosudendu fëën da di gaan wata.

I pakisei taa Jehovah bi wai ku di soni dë u? Aai, a bi wai seei. Fëën mbei a bi paamusi Noa taa na wan daka a o poi di goonliba ku wan gaan wata möön.

Te wan pisi di goon bi ko dëë kasaa, nöö Noa ku ën wosudendu bi bigi wan njunjun libi a döösë u di ark. Gadu limbo de pasi hën a piki de taa: ’Un musu pai hia mii. Un musu pai miii u te hii di goonliba ko fuu ku sëmbë.’

Ma bakaten te sëmbë bi o jei u di gaan wata, nöö kandë de bi o fëëë taa sö wan gaan wata sa ko baka. Hën mbei Gadu da sëmbë wan maaka taa an o poi hii di goonliba ku wan gaan wata wan daka möön. I sa’ un maaka a da de u? A lei de wan mutjama.

So juu i ta si wan mutjama a liba te sonu jabi baka te tjuba kai. Di mutjama sa abi sömëni hansehanse kulölu. I si ën wan daka u? I ta si wan a di peentje u?

Di soni aki Gadu bi taki: ’Mi ta paamusi unu taa na wan daka wan gaan wata o poi hii libisëmbë ku mbeti möön. Mi o buta di mutjama u mi a dee bundji a liba. Nöö te di mutjama kumutu, mi o si ën, nöö mi o mëni di paamusi u mi.’

Hën da te i si wan mutjama, nöö andi i musu mëni baka? Awa, di paamusi di Gadu mbei taa na wan daka a o poi di goonliba ku wan gaan wata möön.