Abahamu bi dë wan mati u Gadu

WAN u dee kamian teka sëmbë bi go libi baka di Gaan Wata, bi dë di köndë de kai Uli. A bi toon wan gaan köndë ku hansehanse wosu. Ma dee sëmbë naandë bi ta dini taku gadu. Sö nöö dee sëmbë u Babel bi ta du tu. Dee sëmbë u Uli ku Babel an bi dë kuma Noa ku di womi mii fëën, Semi, di bi ta dini Jehovah go dou.

Baka 350 jaa baka di gaan wata, di limbohati Noa ko dëdë. Nöö tu jaa baka di dë, hën de pai di womi i ta si a di peentje aki. A bi dë wan apaiti womi da Gadu. Hën në da Abahamu. Hën ku ën wosudendu bi ta libi a di köndë Uli.

Wan daka Jehovah piki Abahamu taa: ’Womi, foloisi kumutu disa Uli ku dee sëmbë fii aki, nöö go a wan woto köndë di mi o lei i fii go.’ Abahamu bi piki Gadu buka u? A bi go disa di suti libi u Uli ö? Aai. Nöö u di Abahamu bi ta piki Gadu buka hii juu, mbei sëmbë ko sabi ën kuma wan mati u Gadu.

So u dee famii u Abahamu bi go ku ën di a bi go kumutu a Uli. Hën tata Teela ku hën baaa mii, Lotu, bi go ku ën tu. Nöö Abahamu mujëë seei, Sala, bi go tu. Baka wan pisiten, de go dou a wan kamian de kai Halan, ka Teela dëdë. Halan an bi dë zuntu ku Uli.

Bakaten Abahamu ku ën wosudendu kumutu a Halan, hën de go a wan köndë de kai Kaana. Naandë Jehovah taki taa: ’Di köndë aki wë mi o da dee mii fii.’ Abahamu bi tan libi a Kaana a pelawosu.

Gadu bi dë ku Abahamu sö taa a bi ko abi gaan hia sikapu ku woto mbeti ku höndöhöndö futuboi. Ma hën ku Sala an bi pai na wan kodo mii seei.

Di Abahamu bi abi 99 jaa, hën Jehovah piki ën taa: ’Mi ta paamusi i taa joo toon tata u sömëni nasiön sëmbë.’ Ma unfa di soni dë bi o sa pasa? Biga Abahamu ku Sala bi gaandi kaa u pai miii.