Gadu pooba Abahamu luku ee a a’ biibi tuutuu

ITA si andi Abahamu ta du aki ö? A dë ku wan faka nëën maun, nöö a djei kuma a o kii di womi mii fëën. Ma faandi mbei a bi o du sö wan soni? Boo luku fosu unfa Abahamu ku Sala pai di womi mii u de.

Na fëëkëtë taa Gadu bi paamusi de taa de bi o pai wan mii. Ma a bi djei kuma di soni dë an bi sa pasa wan daka, u di Abahamu ku Sala bi gaandi seei. Ma Abahamu bi ta biibi taa Gadu bi o sa du wan soni di djei kuma an kan. Wë nöö andi bi pasa?

Wan hii jaa bi pasa baka di Gadu paamusi de taa de o pai wan womi mii. Nöö di Abahamu bi a’ 100 jaa ku di Sala bi a’ 90 jaa, hën de pai wan womi mii di de bi kai Isaki. Gadu bi hoi ënseei a di paamusi fëën!

Ma di Isaki ko gaan womi, hën Jehovah pooba Abahamu u luku ee a a’ biibi tuutuu. A bai kai ën: ’Abahamu o!’ Hën Abahamu piki: ’Mi dë aki ooo!’ Nöö hën Gadu taa: ’Tei di womi mii fii, di wan kodo womi mii fii, Isaki, nöö go a di kuun liba di mi o lei i. Naandë joo kii di mii fii, nöö joo tjumëën da mi.’

Di taki dë bi mbei Abahamu tjali seei, biga a bi lobi di womi mii fëën gaanfa. Nöö na fëëkëtë taa Gadu bi paamusi Abahamu taa dee mii fëën bi o libi a di köndë Kaana. Ma unfa di soni dë bi o sa pasa ee Isaki dëdë? Abahamu an bi fusutan di soni dë, ma tökuseei a haika Gadu.

Di Abahamu go dou a di kuun liba, hën a tai Isaki, nöö a butëën faa kii tjuma da Gadu. Nöö hën a tei wan faka faa kii di womi mii fëën. Ma wantewante dë, di engel u Gadu bai kai Abahamu tu pasi: ’Abahamu, Abahamu!’ Hën Abahamu piki: ’Mi dë aki ooo!’

’Na du na wan soni ku di mii e’, sö Gadu bi taki. ’Nöunöu mi sabi taa i a’ biibi a mi, u di ja tjubi di mii fii da mi, di wan kodo womi mii fii.’

Abahamu bi a’ biibi a Gadu gaanfa e! A bi ta biibi taa na wan soni dë di Jehovah an sa du, nöö Jehovah bi o sa weki Isaki ko a libi baka. Ma Gadu an bi kë tuutuu taa Abahamu kii Isaki. Fëën mbei Gadu bi mbei wan sikapu go peka a uwii dendu, hën a bi piki Abahamu faa tei ën kii tjuma a di mii fëën kamian.