Di fasi fa de bi tjubi di mii Mosesi

LUKU fa di mii ta këë ta panjan di mujëë finga. Hën da Mosesi. I sa’ ambë da di hanse mujëë dë u? Hën da di könu mujëë mii u Egepiti. Di mujëë mii u Falao.

Mosesi mama tjubi di mii fëën te kuma a abi dii liba, biga an bi kë u dee Egepiti sëmbë kii ën. Ma a bi sabi taa sonte de bi o feni Mosesi. Boo go luku andi a du u tjubi ën.

A tei wan manda, hën a lapu ën sö taa wata an sa go nëën dendu. Hën a kandi Mosesi a di manda dendu, hën a tjëën go buta a wanlö uwii dendu a di lio de kai Nëili lio. A piki Mosesi sisa Melijam be a dë zuntu u di manda u luku andi bi o pasa.

Te wan pisi, hën di mujëë mii u Falao ko wasi a Nëili lio. Wantewante dë a si di manda a dee uwii dendu. Hën a kai wan u dee mujëë köki fëën ko. Hën a piki ën taa: ’Go tei di manda ala da mi.’ Di di mujëë mii u Falao jabi di manda, hën a si wan hanse mii nëën dendu! Mosesi bi ta këë, nöö tjali fëën kisi di mujëë. An bi kë u de kii ën.

Hën Melijam kule go dou. I ta si ën a di peentje aki. Melijam hakisi di mujëë mii u Falao taa: ’Mi sa go kai wan Isaëli mujëë u kiija di mii da i ö?’

’Gaantangi go.’ Sö di mujëë mii u Falao taki.

Hën wë Melijam kule hesihesi go piki ën mama. Di Mosesi mama ko dou, hën di mujëë mii u Falao taa: ’Tei di mii aki kiija da mi, nöö mi o paka i.’

Sö a ko pasa taa Mosesi mama seei kiija di mii fëën. Bakaten di Mosesi ko möön bigi, hën a tjëën go da di mujëë mii u Falao. Nöö di mujëë mii tei ën ko mii fëën. Sö wë Mosesi göö ko gaan womi a di wosudendu u Falao.