Di soni mbei Mosesi fusi go

LUKU fa Mosesi ta fusi kumutu a Egepiti köndë. I ta si dee womi dee ta kule nëën baka u? I sa’ faandi mbei de kë kii Mosesi ö? Boo go luku ee u sa sabi faandi mbei.

Mosesi göö ko bigi a di wosudendu u Falao, di tiima u Egepiti köndë. A toon wan gaan köni womi, nöö në fëën bai tu. Mosesi sabi taa hën na Egepiti sëmbë. A sabi taa dee gaan sëmbë fëën bi dë Isaëli sëmbë di bi dë saafuma u Egepiti.

Di Mosesi bi a’ 40 jaa, hën wan daka a go luku fa soni nango ku dee sëmbë fëën. A hati ën seei di a si fa de bi ta pena de. A si fa wan Egepiti womi bi ta naki wan saafuma di dë wan Isaëli sëmbë. Hën Mosesi tuwë wojo luku a hii së. Di a si taa na wan sëmbë bi ta luku ën, hën wë a naki di Egepiti womi gbougbou kii. Nöö hën Mosesi bei di sinkii tjubi a sandu basu.

Di debooko fëën, hën Mosesi go luku dee sëmbë fëën möön. A bi mëni taa a bi sa heepi de u de an dë saafu möön. Ma Mosesi si tu Isaëli sëmbë ta feti ku deseei, hën a hakisi di wan di an bi a’ leti taa: ’Faandi mbei i ta naki di baaa fii sö?’

Hën di womi piki ën taa: ’Ambë buta i kuma tiima nasö kuutuma fuu? Joo kii mi leti kumafa i kii di Egepiti womi ö?’

Wë nöö Mosesi ko fëëë. A sabi taa sëmbë ko sabi andi a du ku di Egepiti womi. Falao seei bi ko jei di woto, hën a manda sëmbë u go kii Mosesi. U di soni dë mbei Mosesi musu fusi kumutu a Egepiti köndë.

Di Mosesi go kumutu a Egepiti köndë, a hai go seei te a wan köndë de kai Midian. Na-ala a miti dee sëmbë u di wosudendu u Jetilo, hën a toou ku wan u dee mujëë mii fëën de kai Zipola. Mosesi toon wan kiijama u sikapu, nöö a bi ta luku dee sikapu u Jetilo. A libi 40 jaa longi a di köndë Midian. A di ten dë a bi a’ 80 jaa. Hën wan daka di Mosesi bi ta luku dee sikapu u Jetilo, wan foombo soni pasa di tooka di libi u Mosesi. Bia di bladsëidë, nöö luku andi da di foombo soni dë.