Di piki goutu kau

WOOLO! Andi dee sëmbë ta du? De ta begi wan piki kau! Faandi mbei de ta du di soni aki?

Di Mosesi go fika longi a di kuun liba, hën dee sëmbë taki taa: ’Wa saandi pasa ku Mosesi. Un boo mbei wan gadu u tja u kumutu a di köndë aki.’

Hën di baaa u Mosesi de kai Alon taa: ’Antoobi, un puu hii dee goutu jesilinga fuunu tja ko da mi.’ Di dee sëmbë du sö kaa, hën Alon jö dee linga mbei wan piki goutu kau. Hën dee sëmbë taa: ’Disi hën da di Gadu fuu di tja u kumutu a Egepiti köndë!’ Hën dee Isaëli sëmbë hoi wan gaan baja u begi di piki goutu kau.

Di Jehovah si di soni aki, hati fëën boonu seei. Hën a piki Mosesi taa: ’Saka paapaa go a goon. Dee sëmbë ta du wan gaan hogi. De fëëkëtë dee wëti u mi go ta bendi hedi da wan piki goutu kau.’

Hën Mosesi bazia di kuun hesihesi. Nöö luku andi a si di a ko möön zuntu. A si dee sëmbë ta kanda ta baja lomboto di piki goutu kau! Mosesi hati boonu sö tee taa a tuwë dee tu paatapaata sitonu ku dee wëti nëën liba booko pisipisi. Hën a jö di piki goutu kau. Baka di dë a booko ën ko toon fania.

Dee sëmbë du wan gaan hogi soni. Fëën mbei Mosesi piki wan tu u dee womi be de go tei dee ufangi u de. Hën a taa: ’Un kii dee hogi sëmbë dee begi di piki goutu kau tuu puu.’ Sö wë dee womi kii 3000 sëmbë! Di soni aki ta lei u taa u musu luku bunu fu wa begi na wan taku gadu, ma u musu begi Jehovah wanwan, na sö nö?