Jehovah buta dee wëti fëën

SÖWAN tu liba pasa di dee Isaëli sëmbë kumutu a Egepiti, hën de go dou a di kuun de kai Sinai. Di kuun dë de ta kai Holeb tu. A di kamian dë seei Jehovah bi fan ku Mosesi ka di uwii bi ta kisi faja. Dee sëmbë seti kampu naandë u de tan wan pisiten.

Mosesi subi go a di kuun liba, hii di dee sëmbë dë ta wakiti a di kuun basu. A di kuun hedi dë Jehovah taki da Mosesi taa a kë u dee Isaëli sëmbë piki ën buka, nöö de o toon apaiti sëmbë fëën. Di Mosesi bazia di kuun, hën a konda da dee Isaëli sëmbë andi Jehovah piki ën. Nöö dee sëmbë taki taa de o piki Jehovah buka, biga de kë toon apaiti sëmbë fëën.

Hën Jehovah du wan foombo soni. A mbei sumuku kumutu pitii a di kuun hedi, hën a mbei gaangadu ta bai. Söseei a piki dee sëmbë taa: ’Mi da Jehovah di Gadu fuunu di tja unu kumutu a Egepiti köndë.’ Hën a buta wan wëti taa: ’Wan musu dini woto gadu boiti mi.’

Gadu da dee Isaëli sëmbë nëigi woto wëti möön. Dee sëmbë ko fëëë seei. De piki Mosesi taa: ’Ju musu fan ku u baa, biga u ta fëëë taa u sa dëdë ee Gadu fan ku u.’

Bakaten Jehovah piki Mosesi taa: ’Ko a mi a di kuun liba. Mi o da i tu paatapaata sitonu ka mi sikifi dee wëti dee mi kë u dee sëmbë hoi.’ Hën Mosesi subi go a di kuun liba möön. A sai ala 40 daka ndeti ku didia.

Gadu abi gaan hia wëti da dee sëmbë fëën. Mosesi sikifi hii dee wëti dë tuu. Söseei Gadu da Mosesi dee tu paatapaata sitonu tu. A dee sitonu dë Gadu seei sikifi dee 10 wëti dee a bi da dee sëmbë. De ta kai de dee Teni Wëti.

Dee Teni Wëti dë gaan fanöudu wëti. Ma sö nöö dee sömëni woto wëti di Gadu da dee Isaëli sëmbë dë fanöudu tu e. Wan u dee wëti dë ta taki taa: ’I musu lobi Jehovah i Gadu te dou ku hii i hati ku hii i pakisei ku hii i libi ku hii di kaakiti di i abi.’ Wan wotowan ta taki taa: ’I musu lobi di wotowan fii leti kumafa i lobi iseei.’ Di Womi Mii u Gadu, Jesosi Keesitu, bi taki taa dee disi da dee tu möön gaan wëti di Jehovah bi da dee Isaëli sëmbë. Bakaten woo lei sömëni soni u di Womi Mii u Gadu, ku dee soni a bi lei sëmbë.