Di pau u Alon buta folo

LUKU dee folo ku dee lepi amanda dee ta göö a di pau aki. Di pau u Alon wë disi e. Dee folo ku dee lepi fuuta bi göö a di pau u Alon a wan kodo ndeti nöö. Boo go luku faandi mbei.

Dee Isaëli sëmbë waka lontu a di sabana wan pisiten kaa. So u dee sëmbë an feni ën bunu taa Mosesi dë fesima u de, nasö taa Alon dë Gaan Mindima u de. Koola da wan u dee sëmbë di ta pakisei sö. Daatan, Abilam ku 250 fesima u dee sëmbë ta pakisei sö tu. Hii de tuu ko a Mosesi, hën de hakisi ën taa: ’Faandi mbei i hopo iseei buta a u liba?’

Mosesi piki Koola ku dee bakama fëën taa: ’Amanjan mamate un tei faja panu, nöö un buta sumëë suti soni a de dendu. Nöö un ko a di tenti u Jehovah. Woo si ambë Jehovah o tei.’

Di debooko fëën, hën Koola ku dee 250 bakama fëën go a di tenti u Gadu. Sömëni woto sëmbë go hoi baka da de. Jehovah hati boonu seei. Hën Mosesi piki de taa: ’Un go kumutu a dee wosu u dee hogihati womi aki. Wan panjan na wan soni u de.’ Dee sëmbë haika, hën de go kumutu a Koola, Daatan ku Abilam wosu.

Baka di dë, hën Mosesi taki taa: ’Di soni aki hën o mbei taa un sabi ambë Jehovah tei. Di goon o jabi wajaa, nöö a o guli dee hogihati womi aki.’

Mosesi an kaba fan seei, hën di goon jabi wajaa. Di wosu u Koola ku dee soni fëën, Daatan, Abilam ku dee sëmbë dee dë ku de, kai go a goon basu, hën di goon tapa de. Di dee sëmbë jei di wolo u dee sëmbë dee ta kai go a goon basu, hën de bai taanga taa: ’Un kule ooo! Di goon o guli u tu!’

Koola ku dee 250 bakama fëën dë jeti a di tenti u Gadu bandja. Fëën mbei Jehovah mbei faja ko tjuma hii de tuu puu fiaa. Baka di dë, hën Jehovah piki di womi mii u Alon de kai Eliazali faa tei dee faja panu u dee womi dee dëdë, nöö a mbei wan soni u tapa hii di begi tafa. Di soni dë musu lei dee Isaëli sëmbë taa Alon ku dee womi mii fëën nöö musu dini Jehovah kuma mindima, ma na wan woto sëmbë möön.

Ma Jehovah kë taa sëmbë fusutan bumbuu taa Alon ku dee womi mii fëën a buta kuma mindima. Fëën mbei a piki Mosesi taa: ’Be hiniwan u dee fesima u dee lö u Isaëli tja hën pau ko. Be Alon tja di u fëën pau ko da di lö u Leifi. Nöö buta hiniwan u dee pau aki a fesi u di Këdë u di Buka di dë a di tenti u Gadu. Nöö di womi di mi tei kuma mindima, di pau fëën hën o buta folo.’

Di Mosesi go luku a di debooko fëën, hën a si di pau u Alon ku dee folo ku dee lepilepi amanda aki dee ta göö nëën! Wë i fusutan awaa faandi mbei Jehovah mbei di pau u Alon buta folo u?