Mosesi naki di sitonu

DEE jaa ta pasa këdë, 10 jaa, 20 jaa, 30 jaa, 39 jaa pasa! Dee Isaëli sëmbë ta waka lontu a di sabana jeti. Ma a hii dee jaa dë Jehovah sölugu dee sëmbë fëën. A da de mana u njan. A didia a ta tja de ku wan gaan bundji, nöö a ndeti a ta tja de ku wan gaan faja. A hii dee jaa dë koosu u de an bi ta ko gaandi, nöö futu u de an bi ta soi tu.

Dee Isaëli sëmbë waka lontu a di sabana u te di fosu liba u di u 40 jaa dou sensi di de kumutu a Egepiti köndë. Dee Isaëli sëmbë seti kampu a Kadesi baka. Föteni jaa a fesi de bi seti kampu a di wan seei kamian dë di de bi manda dee 12 womi u go luku di köndë Kaana. Mosesi sisa Melijam dëdë a Kadesi. Dee Isaëli sëmbë bigi guunjan baka leti kumafa de bi du a fesi.

De an bi sa feni wata u bebe. Hën mbei de bigi tja kaagi go da Mosesi taa: ’A möön bëtë u bi dëdë. Faandi mbei i tja u kumutu a Egepiti ko a di taku kamian aki ka na wan soni ta göö? Alisi an dë aki, figa an dë aki, doloifi an dë aki, nöö glanaki-apa seei an dë aki tu. Wata u bebe seei an dë.’

Di Mosesi ku Alon go a di tenti u Gadu u go begi, hën Jehovah piki Mosesi taa: ’Tja dee sëmbë ko makandi. Nöö leti a de fesi, i musu fan ku di sitonu di sai dë. Nöö wata o kumutu nëën dendu tjika hii dee sëmbë ku dee mbeti u de.’

Hën wë Mosesi kai hii dee sëmbë ko makandi. Hën a piki de taa: ’Un haika e, un dee sëmbë aki dee na a’ biibi a Gadu! A di sitonu aki dendu mi ku Alon musu puu wata da unu ö?’ Baka di dë, Mosesi naki di sitonu tu pasi ku di pau fëën, hën wata kumutu djulululu a di sitonu dendu. Wata u bebe bi hia tjika hii dee sëmbë ku dee mbeti u de.

Ma Jehovah hati boonu ku Mosesi ku Alon. I sa’ faandi mbei ö? U di Mosesi ku Alon piki dee sëmbë taa de bi o mbei wata kumutu a di sitonu. Ma Jehovah hën bi du sö. Nöö u di Mosesi ku Alon an bi piki dee sëmbë fa soni dë tuutuu, mbei Jehovah piki de taa a o sitaafu de. ’Wan o tja dee sëmbë u mi go a Kaana’, sö a piki de.

An tei longi ufö dee Isaëli sëmbë go kumutu a Kadesi. Te wan pisi de dou a di kuun de kai Holu. A di kuun dë hedi Alon dëdë. A bi a’ 123 jaa di a dëdë. Dee Isaëli sëmbë tjali seei, nöö 30 daka longi de puu këë da Alon. Nöö di womi mii fëën Eliazali toon Gaan Mindima u dee Isaëli sëmbë.