Lei taa i abi degihati

Andi Jesosi bi du?

FËLÖN: Jesosi ta peleiki da Zakeosi

1. Luku di FËLÖN , nasö lesi Lukasi 19:1-7. Baka di dë, nöö i buta pakisei a dee soni aki:

1. Andi bi sa dë di soni di mbei sëmbë an bi ta kë nama ku Zakeosi?

2. Andi bi da Jesosi taanga faa konda di bunu buka dëën tökuseei?

Andi u ta lei a Jesosi?

2. U musu abi degihati fuu sa paaja di buka u di Könuköndë da hii sëmbë di u ta miti.

Djeesi Jesosi

3. Futoou Jehovah. Di santa jeje u Gadu bi da Jesosi kaakiti faa bi sa peleiki, nöö a sa da i taanga tu (Mat. 10:19, 20; Luk. 4:18). Hakisi Jehovah faa da i degihati fii peleiki da dee sëmbë dee i sa ta fëëë u peleiki da.​—Tjab. 4:29.

4. Na kuutu sëmbë a fesi. A sa pasa taa u ta hakisi useei ee u musu peleiki da so sëmbë te u luku dee soni di de bisi, di wooko di de ta du, di fasi fa de ta libi, nasö di biibi di de abi. Ma hoi di soni aki a pakisei:

1. Jehovah ku Jesosi sa si andi dë a sëmbë hati, ma u wa sa du ën.

2. Wa musu si kuma Jehovah an sa heepi wan sëmbë faa kë lei soni fëën.

5. Lei taa i abi degihati, ku lesipeki, ma du soni ku köni tu (Mat. 10:16). Na buja ku sëmbë. Na fan go dou möön ee i sa taa di sëmbë an kë jei soni u di bunu buka, nasö ee i si kuma soni an o waka bunu.​—Nöng. 17:14.