WOTO U WAN SËMBË
Jehovah da mi möön fa mi bi mëni
Mi bi abi 17 jaa, nöö mi bi ta booko mi hedi ku dee soni di njönku sëmbë bi ta booko de hedi, söseei mi bi lo’ u du dee soni di njönku sëmbë bi lo’ u du tu. Mi bi lo’ u du soni makandi ku dee mati u mi. U bi lo’ u go sun, nöö u bi lo’ u pëë bali tu. Ma wan ndeti hën libi u mi bi ko tooka gaanfa seei. Mi bi kai ku wan bölömu, hën mi ko lan. Na wan kamian u mi bi sa buli möön. Di soni aki pasa söwan 30 jaa kaa, nöö sensi di ten dë kandikandi nöö mi ta dë a bedi liba.
De kiija mi a di foto de kai Alicante di dë a Sipanjöluköndë a di së u sonu kumutu. Di libi u di wosudendu ka mi bi dë bi buuja gaanfa seei, nöö fëën mbei mi bi ta dë a sitaati hii juu. Zuntu ku ka mi bi ta libi, wan kamian bi dë ka de ta seeka banti. Mi bi ko dë mati ku wan u dee wookoma u di kamian dë. Hën de ta kai José María. A bi abi sutifasi, nöö a bi ta möön buta pakisei a mi möön leki dee sëmbë u di wosudendu ka mi kumutu. Hii fa a bi gaandi 20 jaa u mi, tökuseei te mi bi abi bookohedi a bi ta heepi mi kuma wan tuutuu mati.
José María bi bigi lei soni u Bëibel ku dee Jehovah Kotoigi. I bi sa si taa a bi lobi di Bëibel, nöö fëën mbei a bi ta konda soni u Bëibel da mi hii juu. Mi bi ta haika te a bi ta fan ku mi, ma ma bi nango sindo pakisei u dee soni a bi ta piki mi, u di mi kuma wan njönku womi mii, mi bi abi woto soni ta pakisei. Ma di libi dë bi o ko tooka.
MI KISI WAN GAAN MAKEI DI TOOKA HII MI LIBI
Ma lo’ u konda di soni di miti mi. Wë mi sa taki taa mi bi ta lëi di bölömu kuma ma bi abi fusutan. Wan daka, hën hii mi libi ko tooka. Mi kuma wan njönku womi mii di bi abi kaakiti u du hii soni, hën wë te u mi kë mëni mi kisi wan gaan makei di bi lan mi buta a hatiwosu. Ma bi saanfa u libi ku di soni di bi miti mi aki. Hii juu mi bi ta hakisi miseei taa: ’Faandi mbei mi dë a libi jeti?’
José María bi ko luku mi. Baka di dë, hën a bi seeka soni wantewante u dee Jehovah Kotoigi u di kemeente a di pisiwata dë ko luku mi a hatiwosu. Mi bi ta fii bunu seei te de bi ta ko luku mi. Kölö sö baka di de puu mi a di kamian ka de ta buta sëmbë di kisi hebi makei, hën mi bigi lei soni u Bëibel. Mi bi ko lei faandi mbei libisëmbë ta pena, faandi mbei sëmbë ta dëdë, söseei faandi mbei Gadu ta da pasi be hogi soni ta pasa. Mi bi ko lei taa Gadu paamusi u taa a di ten di ta ko, telutelu libisëmbë söndö zöndu nöö o dë a hii goonliba. Nöö na wan sëmbë o taki taa: „Mi suwaki” (Jesaaja 33:24). Disi da di fosu pasi di mi ko sabi taa mi sa feni wan möön bunu libi a di ten di ta ko.
Di mi kumutu a hatiwosu, hën mi bi möön go a fesi seei a di lei di mi bi ta lei soni u Bëibel. Ku wan apaiti sutuu di ta tja sëmbë di kisi makei mi bi nango a dee komakandi u dee Jehovah Kotoigi, nöö ku ën seei mi bi nango a di peleikiwooko tu. A 5 u ëlufumu-liba u di jaa 1988 mi tei dopu di mi abi 20 jaa a wan apaiti baki ka sëmbë ta wasi. Jehovah Gadu mbei mi ko ta pakisei wan woto fasi u di libi. Ma andi seei mi sa du u lei Jehovah taa mi tei di heepi di a heepi mi, u bigi?
DI MAKEI DI MI KISI AN TAPA MI U DU DI WOOKO U JEHOVAH
Mi bi sabi taa ma bi musu mbei di makei di mi kisi tapa mi u na du di wooko u Jehovah. Mi bi kë du möön da Jehovah (1 Timoteo 4:15). Bigibigi a bi taanga da mi seei, biga dee famii u mi an bi lobi di dini di mi bi ta dini Jehovah. Ma mi bi ta si dee sëmbë dee mi ku de dë a di wan biibi, kuma mi tuutuu baaa ku sisa. De bi ta heepi mi u mi bi sa go a komakandi hii juu, söseei de bi ta heepi mi u go a di peleikiwooko tu.
Ma baka wan pisiten mi bi ko si taa a bi dë fanöudu u sëmbë ta heepi mi ndeti ku didia tuu. Fëën mbei mi suku kamian ka de ta luku sëmbë di lan. Mi suku tee mi ko feni wan a di foto Valencia di dë söwan 160 kilomëti a bausë u di foto Alicante. A di kamian aki mi ta libi te kuma tide.
Hii fa mi lan, tökuseei mi ta konda soni u di biibi u mi da wotowan nöömö
Hii fa ma sa kumutu a bedi möön, tökuseei mi ta dini Jehovah go dou. Mi bi bai wan computer ku wan tëlëfön ku di möni di de ta da mi u di ma sa wooko. Hën mi mbei de seti de buta leti a di bedi u mi bandja. Nöunöu hiniwan mamate wan u dee sëmbë di ta luku mi ta ko sëndë di computer ku di tëlëfön da mi. Mi ta tei wan soni kuma pau sö di mi ta buta a mi agba basu u mi sa wooko ku di computer. Söseei mi abi wan woto soni kuma wan pau sö di mi hoi a mi buka. Nöö ku di pau aki mi ta zin dee lëtë a di computer, söseei ku ën mi ta zin dee nöbu a di tëlëfön.
Ku wan soni kuma pau mi ta zin nöbu a di tëlëfön
Unfa dee soni aki heepi mi tjika? Wë de ta heepi mi u mi sa go a di website jw.org, söseei a di Waktitoren LIBRARY TAPU INTERNET. Di website aki ta heepi mi seei! Hiniwan daka mi ta lei soni u Bëibel, nöö mi ta öndösuku soni a dee buku fuu sömëni juu longi. A sö wan fasi mi ta lei soni u Gadu, ku dee bunu fasi fëën nöömö. Nöö te mi ta fii bookosaka pikisö, nöö hii juu mi ta feni wan soni a di website fuu di ta da mi degihati baka.
Di computer u mi ta heepi mi u haika soni a dee kemeente komakandi. A ta heepi mi u ta da piki, u begi, hoi taki, söseei u lesi di Hei Wakitimawosu te de piki mi taa mi musu lesi. Hii fa ma sa go a dee komakandi, ma tökuseei mi ta fii kuma mi dë wan sëmbë u di kemeente.
Di computer ku di tëlëfön di mi abi ta heepi mi tu, u mi sa du di peleikiwooko hii juu. A dë sö tuu taa ma sa go peleiki da dee sëmbë a de pisi kumafa dee woto Jehovah Kotoigi ta du ën. Ma di soni dë an ta tapa mi u peleiki. Di computer ku di tëlëfön u mi ta heepi mi u konda soni u di biibi u mi da woto sëmbë. Mi lo’ u peleiki da sëmbë ku tëlëfön gaanfa seei. Fëën mbei dee gaanwomi hakisi mi ee mi sa seeka soni u woto baaa ku sisa sa ta peleiki ku tëlëfön tu. Di lö fasi u peleiki aki ta heepi dee baaa ku sisa u di kemeente dee an sa kumutu a de wosu u go peleiki.
Mi ta lei wan sëmbë soni u Bëibel
Ma na ku computer ku tëlëfön nöö mi ta fan ku sëmbë. Ma hiniwan daka dee mati u mi ta ko luku mi. De ta tja dee famii u de, söseei dee mati u de di kë sabi möön soni u Bëibel. Hiniwan juu de ta hakisi mi u konda wan soni u Bëibel da de. Te dee sëmbë u wan wosudendu ko luku mi tu, nöö de ta hakisi mi ee mi kë dë a di Wosudendu Dini u de makandi ku de. Di soni di mi möön lobi, hën da te dee piki mii ta sindo a di bedi buka u mi ta konda da mi faandi mbei de lobi Jehovah.
Mi dë a wan Wosudendu Dini ku wan tu mati u mi
Mi ta tei ën u bigi seei taa sëmbë ta ko luku mi. Hiniwan juu di kamba u mi ta fuu ku dee mati u mi di ta ko luku mi. So u de ta libi zuntu ku ka mi ta libi, ma wotowan ta kumutu a longi kamian ko luku mi. Di ko di sëmbë ta ko luku mi ta foondo dee sëmbë dee ta heepi mi ka mi ta libi. Hiniwan daka mi ta da Jehovah tangi u di a da mi di okasi u dë wan u dee sëmbë u di ölganisaasi fëën.
DI FETI NANGO DOU
Te wan sëmbë da mi odi, nöö a hakisi mi unfa a nango ku mi, nöö mi ta piki ën taa: „Wë mi dë leti aki, mi ta feti jeti!” Mi sabi taa na mi wanwan dë a di feti. Aluwasi andi ta miti u nasö un bookohedi u abi, tökuseei hii Keesitu sëmbë dë a wan feti. Di feti dë hën da „di bunu feti [u di biibi] go dou te nöö i feni di libi u teego” (1 Timoteo 6:12). Andi ta heepi mi u mi sa ta feti hii dee jaa aki? Wë mi ta begi, söseei mi ta da Jehovah tangi hiniwan daka, u di a mbei mi ko ta pakisei woto fasi u di libi. Nöö mi ta pooba u ta du hii soni di mi sa du a di dini di mi ta dini Gadu, nöö mi ta buta pakisei nöömö a di bunu libi di mi sa feni a di ten ta ko.
José María
Hii juu mi ta pakisei fa a o dë a di njunjun goonliba te mi o sa ta kule ta djombo baka. So juu mi ta mbei sipootu ku di mati u mi José María di abi wan pei lan siki tu. Mi ta hakisi ën ee ambë o wini te woo fia kule a di njunjun goonliba. A ta piki mi taa: „Aan toobi ambë o wini. Ma di möön fanöudu soni hën da mi musu kule u dou a di paladëisi.”
A dë wan taanga soni da mi u libi ku di soni di pasa ku mi aki. Mi sabi taa kuma wan njönku womi mii, mi bi du wan don soni, nöö mi ta tja di sitaafu u di don soni di mi du. Tökuseei mi ta da Jehovah tangi taa an disa mi. A da mi hia soni. A da mi hia baaa ku sisa a di biibi. A mbei mi ko ta pakisei woto fasi u di libi u mi. Söseei a mbei mi ko sabi taa mi sa feni wan bunu libi a di ten di ta ko. Ee mi musu konda unfa mi ta fii, nöö mi bi o taki taa Jehovah da mi möön fa mi bi mëni.