DI WOTO DI NAMA KU DI KAFITI | I SA KO FUSUTAN DEE SONI DEE SIKIFI A DI BËIBEL
Faandi mbei u musu ko fusutan dee soni dee sikifi a di Bëibel?
„Di Bëibel da wan keiki buku di sömëni sëmbë sabi. Ma a dë wan buku u woto köndë sëmbë. De an mbei ën da Sinëisi sëmbë.”—LIN, CHINA.
„Ma sa fusutan dee santa buku dee mi abi u di Hindu biibi u mi, nöö unfa seei mi o sa fusutan di Santa Bëibel?”—AMIT, INDIA.
„Mi ta lesipeki di Bëibel u di a dë wan buku di de sikifi gaanduwe kaa, ma mi jei taa hën da di buku di de möön sei a goonliba. Ma ma si wan Bëibel ku mi wojo wan daka.”—YUMIKO, JAPAN.
Sömëni sëmbë a hii së u goonliba abi lesipeki da di Bëibel gaanfa seei. Ma kandë de an sabi soni fëën wan bëtë nasö kandë de an pena sabi seei andi sikifi nëën. Sö milionmilion sëmbë di ta libi a dee köndë u Asia ta si ën, ma sö dee sëmbë dee ta libi a dee sömëni köndë ka di Bëibel dë u feni, ta si ën tu.
Ma kandë i ta hakisi iseei: ’Faandi mbei mi musu ko sabi andi sikifi a di Bëibel?’ Te i ko fusutan dee soni dee sikifi a di Bëibel kaa, nöö joo sa feni dee wini aki:
Joo dë tifihedi ku dee soni i abi, nöö joo abi wan bunu libi
Joo sabi andi i musu du te i abi bookohedi a di wosudendu
Joo sabi andi i musu du te i dë ku fuka
Joo sa libi möön bunu ku wotowan
Joo wooko ku di möni fii a wan köni fasi
Luku di woto u Yoshiko di ta libi a di köndë Japan. A bi hakisi hënseei fuun soni di Bëibel ta taki, nöö fëën mbei a bi bigi lesi ën. Andi bi ko pasa bakaten? A taa: „Di Bëibel heepi mi u ko ta si soni woto fasi, söseei mi ko sabi taa wan möön bunu libi dë a di ten di ta ko. Ma ta fii möön kuma u sösö mi dë a libi.” Amit, di u bi taki fëën djunsu dë, bi buta taa a o lei soni a di Bëibel. A taa: „A bi foondo mi seei. Di Bëibel abi köni lai da hiniwan sëmbë.”
Di Bëibel tooka di libi u milionmilion sëmbë gaanfa seei. Faandi mbei iseei an kë öndösuku ën luku fii ko sabi un wini i sa feni tu?