Hii u tuu abi kötöhati fanöudu

I sa mëni jeti di i bi kai wan daka di i bi dë miii ö? Kandë i bi kai koti maun nasö i bi kai koti kini. I sa mëni jeti fa i mama bi da i kötöhati ö? Kandë a bi feki di koti buka, hën a buta deesi dëën. Kandë i bi ta këë, ma di i mama bi fan ku i a wan suti fasi, söseei di a baasa i, hën i ko ta fii bunu. Di i bi dë miii, nöö te wan soni bi pasa ku i, nöö hesihesi seei de bi ta da i kötöhati.

Ma te i ta ko gaan sëmbë, nöö di libi ta ko möön taanga. Dee bookohedi fii ta ko möön hia, söseei a ta ko möön taanga u sëmbë da i kötöhati. A tjali u si taa te gaan sëmbë abi bookohedi, nöö sëmbë an sa da de kötöhati kumafa wan mama bi o da di mii fëën kötöhati. Luku andi wantu sëmbë bi taki.

• I bi fii booko saka kaa, u di i bi lasi wooko u? Wan womi de kai Julian taki taa di de puu ën a wooko, nöö a bi fii booko saka seei. A bi ta hakisi hënseei taa: ’Unfa mi o du sölugu dee sëmbë u mi wosudendu. Luku fa mi wooko taanga sömëni jaa da di wookope aki, nöö faandi mbei de ta si kuma ma ta tja wini ko da di wookope?’

• Kandë i ta fii booko saka u di i booko tööu. Wan mujëë de kai Raquel taki taa: „Mi manu tuwë mi 18 liba kaa, nöö di soni aki bi mbei mi fii booko saka seei. A bi djei kuma mi hati latja a tu pisi. Ma bi ta a’ kaakiti u du na wan soni, söseei mi bi ta fii booko saka. Di soni aki bi ta da mi bookohedi seei.”

• Kandë i abi wan siki di ta mbei i ta si kuma soni an ta tooka möönsö. So juu i sa fii kuma Jöpu, di bi taki taa: „Mi ta buuse di libi u mi, ma kë libi möön” (Jöpu 7:16). Nasö kandë i ta fii kuma di womi de kai Luis, wan womi di abi söwan 80 jaa, di taki taa: „So juu mi ta kë dëdë.”

• A sa dë sö taa di dëdë di wan sëmbë fii dëdë, hën ta mbei i ta fii booko saka. Wan womi de kai Robert bi taki taa: „Di di womi mii u mi dëdë a wan opolani di bi kai, nöö a bi taanga da mi seei u biibi di soni dë. Bakaten, hën mi ko ta fii di pen di di Bëibel ta taki taa dë kuma te de suti i ku ufangi a i hati.”—Lukasi 2:35.

Robert, Luis, Raquel, ku Julian, bi feni kötöhati, hii fa de bi dë ku g aan bookohedi. De bi feni kötöhati a di möön bunu sëmbë. Di sëmbë dë da di Gadu di abi hii makiti. Unfa a ta da sëmbë kötöhati? A o da i di kötöhati di i abi fanöudu tu ö?