Unfa Gadu ta da sëmbë kötöhati?

Apösutu Paulosu bi taki taa Jehovaha da di Gadu ka „hii kötöhati ta kumutu”, söseei di ta „heepi u fuu feni kötöhati” a hii „dee hia sitaafu ta miti u a di goonliba aki” (2 Kolenti 1:3, 4). Fëën mbei di Bëibel ta lei u taa sëmbë an dë di Gadu an sa heepi, söseei fuka an dë di bigi tee taa di Tata fuu a liba ala an sa heepi u ku ën.

Ma tökuseei u musu du wan soni ee u kë taa Gadu da u kötöhati. Unfa wan data o sa heepi u ee nöiti u mbei wan buka u go a data? Di tjabukama u Gadu de kai Amösu bi taki taa: „Na wan sëmbë o waka ku wan wotowan ee hën ku ën an mbei buka, na sö nö?” (Amösu 3:3). Fëën mbei di Wöutu u Gadu ta piki u taa: „Pusa go a Gadu e, nöö Gadu seei o pusa ko a i tu.”—Jakobosi 4:8.

Unfa u sa dë seiki taa Gadu o pusa ko zuntu ku u? Di fosu soni, hën da u di Gadu ta piki u hii juu taa a kë heepi u. (Luku di pisi di nama ku di woto aki.) Di u tu soni, hën da u di u abi woto u sëmbë di Gadu bi da kötöhati. Dee sëmbë dë da sëmbë di bi libi tuutuu a di ten di pasa, ku sëmbë di bi libi a di ten fuu aki.

Könu Dafiti bi ta suku heepi a Gadu, leti kumafa sömëni sëmbë di ta miti fuka ta suku heepi a Gadu tu. A bi taki taa: „Gaantangi haika mi te mi ta bai kai i, te mi ta begi i fii heepi mi.” Gadu bi piki di begi fëën u? Aai. Dafiti bi toona taki taa: „Mi hati ta piizii u di a heepi mi.”—Psalöm 28:2, 7.

JESOSI ABI DI WOOKO U DA DEE SËMBË DEE TA TJALI KÖTÖHATI

Gadu bi taki a fesi taa Jesosi o abi di wooko u da sëmbë kötöhati. Wan u dee wooko di a bi da Jesosi, hën da a bi musu ta da dee sëmbë dee ta „fii booka saka” kötöhati, söseei a bi „musu kötö hii dee sëmbë hati dee ta tjali” (Jesaaja 61:1, 2). Kumafa a bi taki a fesi, Jesosi ta booko hën hedi ku dee sëmbë dee „dë fukafuka”, söseei ku dee sëmbë dee ’ko wei u dee lai dee de ta tja’.—Mateosi 11:28-30.

Jesosi bi da sëmbë kötöhati ku dee bunu lai di a bi ta da de, ku di fasi fa a bi ta libi ku de, söseei ku di kula di a bi ta kula dee sëmbë dee bi abi peipei siki. Wan daka, wan womi di bi abi di siki de kai kököbë, bi begi Jesosi taa: „Ee, Masa o, mi sabi taa ee i kë i sa kula mi o.” Ku tjali a hati, Jesosi bi taki taa: „Aai mati, mi kë e. Be i ko bunu wante” (Maikusi 1:40, 41). Hën wë di womi ko bëtë.

A di ten aki, di Womi Mii u Gadu an dë a goonliba aki u da hiniwan fuu kötöhati. Ma Jehovah di Tata fëën, di Gadu ka „hii kötöhati ta kumutu”, ta heepi dee sëmbë dee dë ku fuka (2 Kolenti 1:3). Luku fö fanöudu soni di Gadu ta tei u da sëmbë kötöhati.

• Di Bëibel. „Fa de sikifi dee soni a di Buku u Gadu dë, nöö de sikifi de tuu fu de lei u soni e. Biga te u lesi fa dee sëmbë u fesiten bi abi degihati ta hoi pasensi, nöö a ta da u degihati tu fuu hoi dou ta luku dee soni dee Gadu bi paamusi u taa de o pasa nöömö.”—Loomë 15:4.

• Di santa jeje u Gadu. Kölö sö baka di Jesosi dëdë, hën hii dee sëmbë u di kemeente u Keesitu sëmbë, bi ko ta libi fiifii ku deseei. Wë faandi mbei a bi dë sö? ’Di Akaa [santa jeje, NW] u Gadu bi dë ku de ta da de degihati, nöö sömëni oto sëmbë bi ta ko ta nama ku de nöömö. Nöö fa de bi sai dë, de bi ta libi a pasi seei ta lesipeki Masa Gadu’ (Tjabukama 9:31). Di santa jeje u Gadu, di kaakiti fëën, di a ta tei u du soni, ta du gaangaan soni seei. Gadu sa wooko ku ën u da sëmbë kötöhati, aluwasi un fuka ta miti de.

• Begi. Di Bëibel ta piki u taa: „Wan musu ta booko hedi a na wan soni e, ma un musu ta begi Masa Gadu nöömö ta dëën tangi. I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan, nöö a o hoi hii pakisei fii ku i hati tuu a Jesosi Keesitu liba.”—Filipi 4:6, 7.

• Dee baaa ku dee sisa fuu a di biibi sa heepi u. Apösutu Paulosu bi taki taa dee sëmbë dee ku ën bi ta dini Gadu makandi, da sëmbë di ta dëën „degihati seei”, te „sëmbë ta sitaafu” ën ta dëën „fuka.”—Kolosën 4:11; 1 Tesalonika 3:7.

Ma kandë i ta hakisi iseei na un fasi dee baaa ku dee sisa fuu ta da u degihati. Boo luku unfa so sëmbë bi miti dee seei fuka u dee sëmbë dee u bi taki u de a bigi u di woto. Leti kuma dee sëmbë dë, useei sa ko sabi taa Gadu ta du di soni di a paamusi u, di a bi taki taa: „Mi o ta da unu kötöhati hiniwan juu baka, leti kumafa wan mama ta da di womi mii fëën kötöhati.”—Jesaaja 66:13.