3 A ta heepi i fii hoi dou te i abi bookohedi

Wa sa kule da so bookohedi di u abi a di ten aki, nöö wa sa puu de tu. Ee wan sëmbë fii ko lasi libi nasö ee i abi wan siki di data an sa kula, nöö libi nöö joo abi u libi ku di pen di di soni dë ta tja ko da i. Ma di Bëibel sa heepi i a dee taanga ten dë u?

TE I ABI WAN SIKI DI DATA AN SA KULA

Rose taki taa: „Mi abi wan siki di ta mbei mi ta fii hebi pen hiniwan juu. A ta poi mi libi seei.” Wan u dee möön gaan bookohedi di a bi abi, hën da so juu an bi sa ta buta pakisei a dee soni dee a bi ta lei a Bëibel, söseei a woto soni di nama ku di dini u Gadu. Ma dee soni dee Jesosi bi taki, di sikifi a Mateosi 19:26 bi heepi ën gaanfa seei. A sikifi naandë taa: „Soni seei an dë di [Gadu] an sa du.” Rose ko si taa sömëni fasi dë fa i sa lei soni u Bëibel. U di di pen a ta fii ta mbei an sa ta lesi so juu, mbei a bi bigi ta haika di Bëibel ku dee woto soni di de lesi.a A taki taa: „Ee de an bi mbei dee soni aki u mi ta haika, ma sabi fa mi bi o sa dë mati ku Gadu.”

Te Rose ta tjali u di an sa du wan soni di a bi ta du fosu, nöö a ta feni kötöhati a di soni di sikifi a 2 Kolenti 8:12, di ta taki taa: „Ee wan sëmbë i kë da sëmbë soni, nöö an dë a di fa di soni hia ma fu di i kë da. Ja o da wan soni di ja abi ma joo da di i abi, nöö Gadu o si taa a bunu kaa.” Di soni aki ta heepi Rose faa fusutan taa Gadu ta wai ku dee soni dee a ta du, u di a ta du hii soni di a sa du, hii fa a ta taanga dëën.

TE I TA TJALI GAANFA

Delphine, di u bi taki fëën kaa, ta taki taa: „Baka di di mujëë mii u mi u 18 jaa bi ko dëdë, hën di pen bi ko hebi sö tee taa ma bi si kuma mi bi o sa libi go dou. Soni an bi o dë kuma fosu möön.” Ma a bi feni kötöhati a di soni di sikifi a Psalöm 94:19, ka di psalöm sikifima bi piki Gadu taa: „Di dee soni mi bi ta pakisei, bi ko möön hebi da mi, nöö ju hën bi da mi kötöhati, sö taa mi bi sa ta dë waiwai baka.” A taa: „Mi bi begi Jehovah faa heepi mi u mi feni soni u du, di bi o heepi mi ku di pen di mi bi ta fii.”

A bi go ta du wan wooko u heepi wotowan. Bakaten a bi taki taa a bi dë kuma wan potulöutu di piki mii ta kulölu soni, hii fa a dë bookobooko. Delphine bi si taa a sa heepi wotowan jeti. A taa: „Mi bi ko si taa te mi bi ta tei dee lai u Bëibel u da dee sëmbë dee bi ta lei soni u Bëibel, kötöhati, nöö a sö wan fasi Jehovah bi ta kötö mi hati tu.” Delphine bi sikifi dee në u sëmbë di woto u de sikifi a Bëibel, di bi ta tjali gaanfa tu. A bi taki u de taa: „Hii de tuu bi dë sëmbë di bi lo’ u begi Gadu.” A bi ko lei tu taa di lesi di i ta lesi di Bëibel nöö sa heepi i fii hoi dou.

Di lei di Delphine bi lei soni u Bëibel bi heepi ën a wan woto soni tu. A bi heepi ën faa buta pakisei a di ten di ta ko, ma na a di ten di pasa. Di soni di sikifi a Tjabukama 24:15 ta dëën kötöhati. A sikifi naandë taa: „[Te] sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu.” Unfa Delphine dë seiki tjika taa Jehovah o weki di mujëë mii fëën ko a libi baka? Luku andi hënseei taki: „Mi ta si di mujëë mii u mi a di ten di ta ko kaa. Mi dë seiki taa mi o si ën baka u di mi Tata sikifi di daka buta kaa. Mi ta si fa mi ku ën o dë a di djai dendu fuu, ta du soni makandi.”

a Dee lö soni aki dë u feni a di website jw.org

Di Bëibel sa heepi i fii feni kötöhati aluwasi soni ta taanga da i gaanfa seei

UNFA GADU SA HEEPI U?

Di Bëibel ta piki u gbelingbelin unfa a ta du ën. A taa: „ Jehovah dë zuntu ku hii dee sëmbë dee ta kai ën. A dë zuntu ku dee sëmbë dee ta bai kai ën ku wan limbo hati. A o mbei taa hii dee sëmbë dee ta lesipeki ën, feni dee soni hati u de ta kë. Te de ta suku heepi nëën, a o jei de, nöö a o puu de a fuka” (Psalöm 145:18, 19). Di soni aki ta da u kötöhati seei. Ma unfa Gadu o piki dee begi u dee sëmbë dee ta mbei möiti u suku lai nëën?

A TA DA U KAAKITI:

Dee bookohedi u di libi sa mbei u fii bookosaka, de sa mbei u ta dë weiwei, de sa mbei u ta tjali, söseei de sa mbei u ko suwaki a di biibi (Nöngö 24:10). Ma Jehovah ’ta da wan sëmbë di wei kaakiti’, nöö „te wan sëmbë an abi kaakiti a ta mbei a ko taanga seei” (Jesaaja 40:29). Apösutu Paulosu di gaan tesi bi miti, bi taki taa: „ Mi sa du hii soni, u di di sëmbë di ta heepi mi ta da mi kaakiti” (Filipi 4:13). Di santa jeje u Gadu bi da Paulosu kaakiti. I sa hakisi Gadu faa da i di santa jeje fëën tu.—Lukasi 11:13.

A TA DA U KÖNI:

Andi i musu du ee i kë ko fusutan dee soni dee sikifi a di Bëibel, nöö i du dee soni dee i lei? Di bakama u Jesosi de kai Jakobosi sikifi taa: „Ee wan sëmbë i si taa ja a’ fusutan tjika a soni, nöö i musu begi Gadu faa da i fusutan e, nöö a o da i ën. An o tei i u hogi biga a lo’ u da sëmbë bumbuu soni” (Jakobosi 1:5). I sa du soni di ta kai ku dee begi fii, te i ta lesi di Bëibel ku te i ta du dee soni dee i lei (Jakobosi 1:23-25). Te i du ën, nöö joo ko si fa dee lai fëën bunu tjika.

A TA DA U KÖTÖHATI:

Aluwasi i ta booko i hedi gaanfa seei, tökuseei Jehovah sa heepi i fu ja ta dë pantapanta. Di Wöutu fëën ta taki taa: „Wan musu ta booko hedi a na wan soni e, ma un musu ta begi Masa Gadu nöömö ta dëën tangi. I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan, nöö a hoi hii pakisei fii ku i hati tuu a Jesosi Keesitu liba” (Filipi 4:6, 7). Ja bi o kë hakisi Jehovah faa da i kötöhati ö?

Ma andi i musu du ee dee bookohedi fii an ta kaba hesihesi? Ja musu si kuma Gadu go disa i. Aluwasi dee bookohedi fii dë jeti, Gadu sa da i di degihati ku di taanga di i abi fanöudu fii sa hoi dou (1 Kolenti 10:13). Di Bëibel ta piki u tu taa di ten o dou ka dee bookhedi fuu an o dë möön seepiseepi!